اوغانستان ئٹ بلوچ باہوٹی تا اُرا تیا طالبان تا جلہو و کوزہ
دی بلوچستان پوسٹ – تیدری
میران مزار
اوغانستان آ طالبان نا کنٹرول آن گڈ کندھار شار نا نیامٹ ئٹ ہندی بلوچ باہوٹی عبدالغنی بنگلزئی اوغانستان ئٹ ہندی بلوچ باہوٹی تا بدحالیتی نا بابت ٹی بی پی تون ہیت کریسہ پارے کہ “منہ دے مالو درزن آتا حساب آ طالبان جنگجوک ننا اُرا ٹی پیہار و اُرا ءِ خالی کننگ نا حکم تسر۔ ننا اُرا ٹی ساڑی اسہ گاڑی ئسے آ طالب آتا اسہ ذمہ وار مولوی نصیب کامران کوزہ کریسہ تینتون درے و دا وخت آ ہم ننے کشیسہ آن گڈ ننا اُرا غا درزن آتا حساب آ طالب آک تینا تڈہ کرینو۔
قطر ئٹ طالبان و امریکہ نا نیامٹ معاہدہ آن گڈ طالبان ترندی تون اوغانستان نا تیوہ غا بھلا شار تیا کوزہ کریسہ معاہدہ نا گڈی تاریخ آن مُسہ ہفتہ مُست 15 اگست آ اوغانستان نا دارالحکومت کابل ئٹ پیہا۔ ہرانا سوب آن حکومت بُھس مس، اوغان صدر اشرف غنی ءِ ہشتاف اٹ ملک ہلوئی تما و طالبان تیوہ غا اسلامی امارات نا ہڈتس نا پڑو کرے۔ انداڑتون امریکہ نا اوغانستان ئٹ بیست سال آن برجاء کبین نرخ آ جنگی ہندی مننگ تینا ایسری آ سر مس۔
بھلا سلاء تیتون طالبان جنگول آک دارالحکومت کابل ئٹ ہر پارہ غا خننگار، اوفک ہورک آ صدارتی ماڑی آن ہلیس ٹریفک نا بست و بند اسکان تینا دوٹی ہلکر۔ اسہ ہفتہ ئسے اسکان کابل بالی پٹ آ چِک و تاڑ برجاء مس، بالی گراب و جاز آک برجاء بال آتیا تالان امریکی فوجی و امریکی فوج نا اوغان کمکار آتے اوکان کشنگ ئٹ گٹ مسر۔ سم کاری و جاز آتیا درنجوک نرنگ نا تدینی تیٹ بھازاک کسکر۔
بندغی حق آتا جہانی تنظیمک و زالبول تا حق ئنا جتا تنظیمک دا خلیس نا درشانی کریر کہ طالبان نود نا وخت نا ڈول تُرند ءُ حکومت اس ٹہیفسہ زالبول آتیان اوفتا آجوئی ءِ پلیرہ و بیر ہلنگ نا کاروائی تا بناء کریسہ اسہ پوسکنو زنک کُشی اس کیرہ۔ دافتا ورندی ءِ طالبان ترجمان ذبیح اللہ مجاہد پریس کانفرنس کریسہ تس، او دا خلیس ءِ رَد پاریسہ پارے کہ طالبان داسہ بدل مسونے۔
اسہ بیم بش کروک ءُ ویل اس ہرا دائسکان جہانی میڈیا و بندغی حق آتا جہانی ادارہ غاتا پارہ بے پام مریسہ ءِ، او اوغانستان ئٹ باہوٹی بلوچ آتا ویل ءِ۔ تدوک بیست سال آن بلوچ آجوئی خواہوک سلاء بند گل و پاکستانی فوج نا نیامٹ جنگ و ترند فوج کشی تا سوب بھلو کچ اسیٹی بلوچ لڈ ہنپ کریسہ اوغانستان ئٹ باہوٹی نا زند گدریفنگ ءِ۔ ہیومن رائٹس کمیشن آف پاکستان نا اسہ رپورٹ ئسے نا ردئٹ بیرہ سنہ 2006 ئٹ فوج کشی ئٹ بلوچستان نا بیرہ ڈیرہ بگٹی و کوہلو نا ضلع آتیان پنجا ہزار آن زیات بندغ لڈ و ہنپ کننگ آ بیوس مسوسر۔
اوغانستان ئٹ بلوچ باہوٹی تے رجسٹر کننگ نا ہچو وڑ ڈول اس ساڑی اف ولے اسہ گمان ئسے نا ردئٹ دا وخت کم و وَد بلوچستان نا جتا علاقہ آتیان فوج کشی نا سوب ہفت ہزار آن زیات خاہوت اوغانستان نا جتا صوبہ آتیٹ باہوٹ ہلوک ءُ۔
ہفتاد نا وخت آ ہراتم بلوچستان ئٹ فوج کشی ئٹ ترندی بس گڑا کم و وَد ہشتاد ہزار بلوچ اوغانستان ہنپ کریسہ باہوٹی نا زند گدریفنگ آ بیوس مسوسر۔ ولے نود نا وختا اوغانستان آ طالبان نا کنٹرول آن گڈ دا بلوچ باہوٹی تیا ہڑدے ہی بنماس آ جلہوک بناء کننگار ہرانا سوب آن اوفتے ساہ ءِ دلدستہ آ تخیسہ واپس بروئی تما۔ داسہ تاریخی مالو نا ندارہ و طالبان و پاکستان نا مننگ کروک خڑک سیالی تے اُریسہ اوغانستان ئٹ ہندی بلوچ باہوٹیک تینا رکھ نا سوب اسیکہ وا بیم نا گواچی ءُ۔
اوغانستان آ طالب آک کوزہ آن گڈ جنوبی صوبہ کندھار ئٹ بلوچ باہوٹی تا اُرا تیا چھاپہ تا لڑ بناء کرینو، دا وخت اسکان حوال تا ردئٹ کم و وَد اِرا اُراتیان زالبول و چُناتے زوراکی ئٹ کشیسہ طالب آک بلوچ باہوٹی تا اُرا تیا کوزہ کروک ءُ۔ داڑان بیدس پنچ پین اُراتیا چھاپہ و پٹ و پول آن گڈ چار گاڑی تینتون درینو۔
کندھار نا ضلع تختہ پل ئٹ مہاجرت نا زند گدریفوک عبدالولی مری ٹی بی پی تون ہیت کریسہ پارے کہ “تدوک بھاز دے آن برجاء، موٹر سائیکل آ بروک طالبان جنگول آک ننے تینا اُرا تے یلہ کننگ نا پاننگ ءُ و ہراتم نن دا طالب جنگول آتیان سوج کرین کہ نمے دیر رادہ کرینے گڑا اوفک تینا چاہنداری مولوی خلیل نا سنگت آتا ڈول ئٹ کریر و ننے اسہ وٹس ایپ نمبر اس ہم حوال کن تسر ہراکہ پاکستان نا یوفون کمپنی نا نمر ئسے و پاریر کہ نم مولوی خلیل تون حوال کبو و زوت آن زوت کندھار صوبہ آن پیشن مبو۔”
ٹی بی پی اسہ پین بلوچ باہوٹی حاجی محمد جان بلوچ تون دا بابت حال احوال کرے گڑا او پارے کہ “کنا اُرا ٹی بروک طالب تینا پن ءِ حافظ نثار پارے و اُرانا پٹ پول آن گڈ گاڑی آ کوزہ کریسہ تینتون درے۔”
دا بابت نن بلوچ نیشنل موومنٹ نا کماش خلیل بلوچ تون حوال کریسہ اونا ہیت آتے بننگ نا کوشست کرین، او پارے کہ “دا وخت بلوچ باہوٹی تا تیوہ غاتیان زیات کچ اوغانستان ئٹ آبات ءِ۔ ہراڑے اوفتے مالو آن بے کچ سختی تیتون مون تروئی تمنگ ءِ، ہراٹی جہانی ادارہ غاتا و اوغان ریاست نا کمک، بنماسی آسراتی تا مفرنگ آن بیدس رکھ آن ہورکی اوار ءُ۔ داسہ طالب آتا بننگ اوفتا سختی و بے جاراتی ئٹ بھاز ودکی کرینے۔”
او مُستی پارے کہ “اوغانستان نا ارٹمیکو بھلا شار کندھار ئٹ سلاء بند بندغاک ہرا تینا چاہنداری ءِ اوغان طالب نا دروشم ئٹ کننگو، اوفک باقاعدہ بلوچ باہوٹی تا برخلاف منصوبہ بند کاروائی تا بناء کرینو۔ سلاء بند طالبان آک زالبول و چنا تے اُرا تیان کشیسہ اُرا تیا کوزہ کننگو، مخلوق ءِ بیم نا گواچی کننگو و مال و اُراتے لُٹنگ ءُ، دا سلاء بند بندغاک ایلو گڑا تیان بیدس کم از کم چار گاڑی کوزہ ٹی ہلیسہ تینتون درینو۔”
خلیل بلوچ دا حالیت ءِ بیم بش کروک پاریسہ پارے کہ “دا بھاز بیم بش کروک و امیت مفروک ءُ حوال ئسے انتیکہ بلوچ باہوٹیک اوغان راج نا مہمان ءُ، ہرافتا رکھ اوغانستان نا راجی و ملی ذمہ واری ءِ، جہان ئٹ بھاز گڑا مٹ کننگ مریرہ ولے ہمسایہ غاک مٹ کننگ مفسہ، بلوچ و اوغان راج نا نیامٹ سد آ سال تیان ایلمی سیالیک ءُ، ہرافتے بھاز آ طاغت آک نسخان تننگ نا کوشست کرینو ولے دا سیالی وخت ئنا ہر امتحان آ سلامت گدرینگانے۔”
بی این ایم چیئرمین طالبان راہشون تیان دا ویل ءِ ایسر کننگ آ زور شاغیسہ پارے کہ “ای اوغان طالبان راہشون تیان خواست کیوہ کہ کندھار ئٹ مروک تدینی تا پٹ و پول کیر و اوغانستان ئٹ ساڑی بلوچ باہوٹی تا جان و مال نا رکھ ءِ یخینی کیر۔”
یاتی مرے کہ اوغانستان آ طالبان نا کوزہ آن مُست ہم اوڑے ساڑی بلوچ باہوٹی آتیا بھاز وار جلہوک مسونو، ہرافتا سوب آن درزن آتا بلوچ باہوٹیک بیران مسونو۔ بلوچ سیاسی جماعت آک و باہوٹیک دا جلہو تا دوبہ ءِ پاکستانی ڈھکوک ادارہ و اوفتا مننگ کروک پراکسی گروہ تیا خلیرہ۔ ڈیہہ ئنا حالیت آ چمشانک تخوک آک داسہ دا خلیس نا درشانی کننگو کہ ساری حالیت آن فائدہ ارفیسہ بلوچ باہوٹی تیا ساہ ہلوک جلہو تا لڑ ئٹ ودکی مننگ کیک۔
بلوچستان آن تعلقدار صحافی “باہوٹ بلوچ” اوغانستان ئٹ ساڑی حالیت آ ٹی بی پی تون ہیت کریسہ پارے کہ “اوغانستان ئٹ بلوچ باہوٹی تے طالبان نا پارہ غان بیم نا گواچی کننگ، بے اُرا کننگ و اوفتا اُرا و گاڑی تیا کوزہ کننگ بھاز نا مناسب، غیر اسلامی و غیر انسانی کاریم ئسے، طالبان راہشون تیکن الّمی ءِ کہ او دننگا بندغ تے تورر ہرا اِرا ایلم راج و ہمسایہ تا نیامٹ بدی و مُری ودی کننگ نا کوشست کننگو۔”
او مُستی پارے کہ “اوغانستان ئٹ بلوچ باہوٹی تے بیم نا گواچی کننگ، بلوچستان و سندھ ئٹ اوغان باہوٹی تیکن سختی تا سوب مننگ کیک۔”
طالبان بیست سال نا مُرغن آ جنگ آن گُڈ جائی بدل مسونے یا بلوچ باہوٹی تیتون اوفتا رویہ ہمو مرو ہرا نود نا وختا ئس؟ بلکن دا سوج ئنا ورندی بروک آ وخت اٹ رسینگہ ولے اوغانستان نا ساڑی سرگڑدانی ئٹ بلوچ باہوٹیک تا بھلا ویل آن بے پام مننگپک و دا ہیت پاش مرے کہ بلوچ باہوٹی تا رکھ نا گواچنی ذمہ وار یو این ایچ سی آر ءِ۔