بلوچ ورناک نشانہ غا
دی بلوچستان پوسٹ سرگپ
مورخہ 4 ستمبر آ بلوچستان نا بنجائی شار کوئٹہ ئٹ برام ئسے نا مجلس اس برجاء ئس، ولے خوشی نا دا مُد ئٹ اوار مخلوق نا دروشم آ فریشانی بسوسس۔ دا فریشانی نا نا ہچو خاص ءُ سوب اس اَلو، بلکن دانا تعلق بلوچستان و کوئٹہ نا لس حالیت ئس، ساڑی حالیت آک مخلوق ءِ اسہ برجاء بے باوری ندارہ ئسے نا گواچی کرینو۔ مخلوق نا بیم ہمو وخت راستکی پک مس ہراتم پاکستانی فوج و کاونٹر ٹریرزم ڈیپارٹمنٹ (سی ٹی ڈی) نا کارندہ غاک ناگمان برام نا مجلس آ چھاپہ خلکر۔ واہم دا چھاپہ نا گواچن سوب آک دائسکان سما تمتنو۔
دا تدینی نا شابینی حوال دائسکان لوڑ گوڑ ءِ، دانا تیوہ آتیان بھلا سوب دادے کہ تینٹ بیگواہ مننگ نا خُلیس آن ہچو خن خنوک شاہد اس مونا بننگ کن تیار اف۔ ولے اسہ ہیت اس پاش ءِ کہ دا چھاپہ نا وختا ہشت ورنا ءِ دزگیر کریسہ نادرست ہند ئسے آ دننگاسس۔ اوکان گڈ خاہوت آک تھانہ غا پیری خلیسہ کریر، بندغی حق آتا ادارہ تیان خواست کریسہ کریر کہ اوفتا مخلوق ءِ مونا ہتنگ کن کڑدار ایسری تننگے۔ ولے دا تیوہ غا کوشست آک دائسکان بے فائدہ خننگسہ ءُ۔
ہرا ورنا تے دا مجلس آن دزگیری آن گڈ بیگواہ کننگاسس اوفتا چاہنداری منصور قمبرانی، واسع قمبرانی، داود قمبرانی، زبیر قمبرانی، عزیر زہری، شکیل شاہوانی، عمیر زہری و شبیر سمالانی نا پن تیان مسونو۔ دا تیوہ غا ورناک اسٹ ایلو تون سیال ءُ۔
چار دے آن گڈ مورخہ 8 ستمبر آ اندا خاہوت نا اسہ پین بندغ فخرالدین قمبرانی ءِ ہم قانود ٹہیفوک ادارہ غاک چھاپہ خلیسہ تینتون دریر ہرا بیگواہ ءِ۔
دا تیوہ غا بیگواہ بندغ تا بابت دائسکان پین ہچ ءُ معلومداری رسینگ کتنے، نئے اوفتے اسہ پولیس تھانہ ئسے آ تخنگانے و نئے بیست و چار گھنٹہ گدرینگ آن گڈ اوفتے اسہ عدالت ئسے نا مونا ہتنگانے۔
بلوچ ورنا تا برخلاف ریاستی ادارہ غاتا دا تُرند آ رویہ بیرہ بیگواہی تے اسکان سلوک اف، پاش اندن خننگک کہ دا ترند رویہ ہمو بلوچ ورنا تا برخلاف ہم مننگے ہرا بیرہ تینا تعلیمی ویل آتا ایسری کن توار ارفنگ ءُ۔ 8 ستمبر آ کوئٹہ نا میڈیکل نا خوانندہ غاتا اسہ برانز ئسے آ میڈیا کیمرہ تا اسُل مونا پولیس لٹ کُٹ ءِ بناء کرے، ہرانا سوب آن بھاز خوانندہ غاک ٹپی مسر۔
دا بیرہ اسہ اِرا تدینی افس بلکن ہر تُوہ بلوچستان نا سیاسی جماعت و بندغی حق آتا تنظیم تے فورسز نا پارہ غان دننگا تُرند بیدادی نا رویہ تا رپورٹ کیرہ۔ داسہ دا ہڑدے ئی گڑاس مسونے۔
بلوچستان نا اسہ سیاسی جماعت بلوچ نیشنل موومنٹ تینا تدوک تُوئی رپورٹ ئٹ دعویٰ کرینے کہ بیرہ اگست نا تُوہ ئٹ بلوچستان آن 40 ورنا ءِ فورسز زوراکی تون بیگواہ کرینے۔ 24 ورنا ءِ دزگیری نا وخت آ بیدس قانود کسفسہ اوفتا جوْن تے خسنگانے۔ ہرافتیان بھلو کچ ئسے بدنام زمانہ سی ٹی ڈی گمانی وڑئٹ دروغ نا مون تس ئٹ کسفینے۔
بندغی حق ئنا تنظیمک، گچین ورئٹ وائس فار بلوچ مسنگ پرسنز نا دعویٰ ءِ کہ زوراکی تون بیگواہ کننگوک مخلوق نا بھلو کچ اس میڈیا ئٹ پاش کروک کچ آن بھاز زیات ءِ انتیکہ بھازا بندغ آک فورسز نا تڑی آن گڈ میڈیا آ بننگ آن بیم نا گواچی ءُ۔ انتیکہ دا خُلیس مریک کہ اگہ او میڈیا ئٹ دا ادارہ تا پِن ءِ ہلکر گڑا اوفتا بیگواہ بندغ تے کسفنگک۔
دی بلوچستان پوسٹ ءِ پک ذریعہ تیان رسینگوک معلومداری تا ردئٹ 20 اگست آ چینی انجینئر آتیا مروک جلہو آن گڈ بیرہ گوادر آن درزن آتا کچ بلوچ ورنا تے دزگیر کریسہ بیگواہ کننگانے ولے دافتیان ہچو کیس ئسے خُلیس نا سوب آن میڈیا غا ہتنگتنے۔
پن کروک تدینیک بلوچستان نا بیست سال نا حالیت آ بیرہ اسہ چنکو ندارہ اس ءُ۔ دائسکان بلوچستان آن ہزار آتا کچ ئٹ ورناک سال آتیان بیگواہ ءُ و بھاز آتے “خلبو و خسبو” پالیسی نا ردئٹ کسفنگانے۔
ورناک اسہ چاگڑد ئسے نا مُخ ئنا ہڈ مریرہ، او دیمروی و بدلی ہتنگ نا ضامن مریرہ۔ اوفتے موقع تننگک و اوفتا رکھ ءِ یخینی کننگک ولے بلوچستان ئٹ ورناک برجاء چِک و تاڑ نا اولیکو ٹِک مریسہ بسونو۔
بلوچستان نا سیاسی جماعت، بندغی حق آتا ادارہ و بلوچ اُلس کن تیوہ غاتیان گوڑیفوک آ گڑا دا مسونے کہ بلوچستان ئٹ برجاء بندغی حق آتا لتاڑنگ ءِ ہچو جہانی ادارہ ئسے نا پام ءِ دائسکان تینا پارہ غا کننگ ئٹ بے سُہب مسونے ہرا یخینا اسہ المیہ ئسے آن کم اف۔