طوفان گلاب بلوچستان نا پارہ غا مون اڑسا، داسا کراچی و سندھ ئنا جہندمی علاقہ آتیان مون اڑسیسہ دے کہی آن قطبی دے کہی نا پارہ آ یعنی داسا دا طوفان نا مون بلوچستان نا کنڈا اڑسینگانے۔
داڑان سندھ ئٹی سمندری طوفان و بد انگا پِر تا گمان کم مسونے، داسکان خلیس مُر مننگ آن بیدس محکمہ مد کراچی ٹی جمعہ غا اسہ اسہ جاگہ آ نیامئی و تروند پر ئنا گمان نا درشانی کرینے، اندن بلوچستان نا ساحلی علاقہ آتیٹ داسکان بھاز پر ئنا گمان نا درشانی کننگتنے انتئے کن ڈیپ ڈپریشن جہندمی دے کہی نا کنڈان ہننگ ءِ۔
خراب مد ئنا گمان آن گڈ کراچی نا سمندر ٹی غسل کننگ آ ہم پنج اکتوبر اسکان پابندی خلینگانے اندن جمعہ آ شار ئٹی مخلوق نا سیل و سوات نا پڑو کننگانے۔
صوبہ سندھ ئٹی تیوہ آ تعلیمی ادارہ آک بند کننگانو، کراچی یونیورسٹی ٹی امتحان آک توننگانو، و ہلہلئی حالیت تون مون تننگ کن خاص بند و بست کننگانے۔
یاتی مرے کہ بلوچستان نا ساحلی علاقہ زوت وخت آتیٹ مروکا پر تا سوب آن وار وار ناگمان بروکا نوکاپ نا دیر آن زیمی مننگ ءُ۔
محکمہ مُد نا رد ئٹ بروکا شش گھنٹہ ٹی ڈپریشن سائیکلون آن بارانگا طوفان ٹی بدلی مرو دا دے کہی قطبی نا پارہ آ مکران کوسٹ آ مون اڑسینگ کیک۔
کراچی آن 160 کلو میٹر مُر تدوکا یانزدہ گھنٹہ ٹی دا کڑمب ڈپریشن ٹی بدلی مروک طوفان پانزدہ کلومیٹر اسہ گھنٹہ نا ترندی آن سے پوسکنو کسر ارفے۔