قطب دے کہی بحیر ءِ بلوچ ئٹ بلوچ سمندر طوفان “گلاب” آں بلوچستان نا ساحلی پٹی ئٹ بُھس کاری چھپ تما، واہم طوفان نا سوب مُد ئٹی بدلی تیان بلوچستان قطبی دے کہی ساحلی علاقہ آک زیمی مسونو۔
تُرند آ تہو تیتون اوار پِڑ برجاء ءِ و سمندر ئٹ چُلک آتا حالیت ءِ۔
کوالخوا تا ردئٹ گوادر و اونا ہیب کیب نا علاقہ آتیٹ شیفکو علاقہ غاک دیر ئٹ ڈُب ہلکنو، بجلی بیست گھنٹہ اف، و بُڑز آ چُلک و تُرند آ تہو تیان ساحل آ سلوک مُسہ درزن آن زیات کشتیک پنانو۔
ہفتہ نا دے محکمہ مُد کراچی ئٹ ساڑی ٹروپیکل سائیکلون وارننگ سینٹر نا پارہ غان شینک کروک پامداری پڑو نا ردئٹ سمندری طوفان گلاب تدوک دوانزہ گھنٹہ ئٹ 10 کلومیٹر نا تُرندی تون بحیر بلوچ نا قطبی کہی ہلنگوک پارہ غا روان مسونے۔
داسہ دا طوفان گوادر آن قطب ئٹ کم و وَد 125 کلومیٹر نا مُری ٹی ءِ۔ اورماڑہ نا قطبی کہی ہلنگ ئٹ 250 کلومیٹر و کراچی آن کہی ہلنگ ئٹ 470 کلومیٹر نا مُری ٹی ءِ۔ طوفان نا بُنجاہ نا رہی آ 110 آن 120 کلومیٹر اسہ گھنٹہ نا تُرندی تون تہو ءِ ہراڑا سمندر چُلک ہلنگ نا حالیت ئٹی ءِ۔
محکمہ مُد گمان نا درشانی کرینے کہ سمندری طوفان ہفتہ نا بیگہ دے کہی آن شمال دے کہی نا پارہ غا ہنیسہ کرو و دوارہ قطبی کہی ہلنگ ئٹ عمان نا شمالی ساحل نا پارہ غا مون ہڑسو۔