حوال تا رد ئٹ بورہ نا نرخ آتیٹ دے تیٹ نا بلکن گھنٹہ آتیٹ ودکی مننگ ءِ، اسہ دے ئٹی تیوہ آ سندھ ئٹ بورہ نا ایکس مل نرخ 9 رپئی ودکی آن 136 رپئی اندن لاہور ٹی بورہ نا ہول سیل ریٹ 132 آن ودیسہ141 رپئی کلو اسکان سر مسونے۔
لاہور ہول سیل مارکیٹ ٹی بورہ نا نرخ آتے پرہ لگا، بورہ نا نرخ پٹرول ءِ ہم پدی ہلا، ہول سیل مارکیٹ ٹی ہندی بورہ نا نرخ آؤٹ آف کنٹرول مسونے، اسہ دے ئٹی 50 کلو بورہ نا بیگ نا نرخ ئٹی 850 رپئی نا ودکی کننگانے۔
50 کلو بورہ نا نن باچک 6200 رپئی آن ودیسہ 7050 رپئی نا مسونے ہول سیل مارکیٹ ٹی بورہ نا اسہ کلو نرخ 141 رپئی تخنگانے اندن پرچون ٹی پورہ نا نرخ 145رپئی اسہ کلو اسکان سرمسو، ودوکا کبینی لس مخلوق ءِ سخت خواری تا گواچی کرینے مارکیٹ ٹی بورہ ءِ ہلوک آتکن شاری اورک انگا دو تون پدی اڑسنگ آ بیوس مسونو۔
مارکیٹ ٹی درآمدی خوڑت انگا بورہ ریسنگک ولے ہلوک آتے ہندی بورہ نا پٹ و پل ءِ۔ شوگر ڈیلرآک نرخ آتیٹ پین ودکی نا گمان نا درشانی کننگ ءُ، شوگر ملز ٹی کرشنگ سیزن بناء مننگ ٹی اسہ تو اس ارے ولے بورہ نا نرخ آک آسمان تون ہیت کننگ ءُ۔
انڈسٹری ماہرین نا پاننگ ءِ کہ گنڈیری نا کرشنگ نا سیزن اُرے آ بناء مننگ ٹی طلب و رسد نا فرخ ودینگ ءِ، ہرانا سوب آن بورہ نا نرخ آتیٹ برجاہ ودکی مننگ ءِ، وفاقی و صوبائی حکومت آتا کنڈان سہی وخت آ فیصلہ ہلپرنگ آ لس مخلوق ءِ بھلو نرخ اس تروی تمک۔
اندن سندھ کابینہ گنڈیری نا نرخ 2 نیم سد رپئی اسہ چل کلو گرام کننگ نا درشانی کرینے سندھ اسمبلی ٹی اجلاس آ بریفنگ تریسہ وزیر اطلاعات سعید غنی پارے کہ کھاد و ڈیزل کبین مننگ نا سوب آن محکمہ کشت و کشار غلہ نا نرخ آتے ودفینگ سلہ تسوسس، ہراڑا اسٹیک ہولڈرز آن صلہ کننگا۔
صوبائی وزیر توانائی امتیاز شیخ نا پاننگ اس کہ ویسٹ انرجی پالیسی نا مسودہ مونا ہتنگانے، ہرانا رد ئٹ کچاری آن انرجی ودکی کننگو، کابینہ اجلاس ٹی محکمہ کالج ایجوکیشن ءِ پانزدہ سد انٹرنی شاغینگ موکل تننگانے اندن الیکٹرک نا چالیس ایکڑ ارضی آ گرڈ اسٹیشن کننگ نا خواست آ سب کمیٹی ہڈ تننگانے۔