مارشت – درناز رحیم بلوچ

الّمی خوانبو

رخصت اف – مرید بلوچ

مزاحمت زند ءِ ’’ای، ہمو ہراکہ جہانی امن ئنا ٹیکی ءِ دوئی کرینٹ، مونجائی تون انداسرپد مریوہ کہ بیدس تشدد...

بلوچ سلہہ بند تنظیم تا کروکا گڑاس فیصلہ تا جاچ __میرین بلوچ

جنگ اٹ ہچبر رحم مفک بلکہ جنگ ءِ نفسیاتی پڑا کٹوئی مریک جسمانی طاغت آن زیات نفسیاتی طاغت جنگ...

تاریخ نا پنہ غاک (چارمیکو بشخ) | خان خدائیداد خان – محبوب شاہ

تاریخ نا پنہ غاک (چارمیکو بشخ) خان خدائیداد خان نوشت: محبوب شاہ دی بلوچستان پوسٹ - براہوئی کالم 1896ء اٹی(No.7) و 1870ء...

مارشت

نوشت: درناز رحیم بلوچ

دی بلوچستان پوسٹ

سہب ئنا پیہنی داسا پوشکنی ٹی مٹ مسوسس۔ مخلوق تینا ہڑدے نا کاریم تیٹی گٹ ئس۔ کسس پاٹ کن ہناسس، کسس خڑک ئنا ہینڈ پمپ آن دیر ئنا ڈبہ تے پُر کننگ کن ہننگ ئس تو کسس رزان و روفہ ٹی لگوک ئس۔ خلق ئنا ہندا تو زیبائی ءِ کہ داڑے مخلوق قدرت آن بھاز خُڑک مریک و شاری مخلوک نا وڑ اوفتا سہب پیشیم آ بناء مفک۔

حاجرہ ام اینو ہڑدے آن چَپ سہب ئنا ماہلو بش مسوس حالانکہ ہرا وخت او شار ئٹی مسکہ، یونورسٹی نا دے تے آن بیدس پیشیم آ بش مسکہ و یونورسٹی نا دے تیٹ ہم بدحالی اسیٹ بش مسکہ۔

ولے اینو گمان مریک کہ دے پین کنڈ ئسے آن ٹک تسوسس۔ حاجرہ سہب نا مالو بش ام مسوسس و حویلی ٹی سیخا ٹی تالان چٹائی آ کل اُرا والا تیتون چاہ ئنا پیالہ دو ٹی تولوک ام ئس ولے مُست ئنا بشخندہ، مخنگ و شیطانی خننگتوکہ ہرا کہ اونا شخصیت نا بشخ ئسر، نہ کہ بھلا باوہ ءِ تنگ کننگ ئس بلکہ چھپی ئٹ کل ءِ بننگ ئس و اسیکہ اسیکہ مچے بشخندہ کننگ ئس۔

کل تینا چاہ ئنا پیالہ آتے دو ٹی توروک ہیت ئٹی گٹ ئسر، مننگ کیک کل حاجرہ ٹی دا غیر معمولی بدلی ءِ ماراسُر ولے کل تینا است آن اونا چُھپی ءِ سوب اس تسر و کس اوڑان سر و سوج کننگ نا گمان کتو۔ ولے مونا تولوک بھلا باوہ اونا مون ئنا پاش سوبری کن تینے آن تینٹ سوب گمان کتو۔ او دا بدلی نا سوب ءِ سوج کننگ خواہاکہ ولے وخت ئنا زی آ۔

چاہ ارغ آن پد کل اسٹ اسٹ آ مش مسر۔ نرینہ غاک تینا کاریم تیا پیشتمار او نیاڑیک اُرا نا کاریم تے ٹی گٹ مسر۔ حاجرہ و بھلا باوہ سیخا ٹی تولوک ئسر۔

حاجرہ دو ٹی فون ءِ ارفوک گڑاس لکھنک ئس۔ بلکن نوٹس ئٹی گڑاس یات محفوظ کننگ ئس۔ انتیکہ نیٹورک نا جنجال ہر ارٹمیکو خلق ئٹی ئس ولے داڑے تو نیٹورک نا جند الو۔ حاجرہ دائسکا داڑے مسکہ فون آن بیرہ لکھنگ و فوٹو ہلنگ نا کاریم ہلککہ۔
لکھنگ لکھنگ ئٹی دوک تہ سلیسر، مونے مچے بڑزا کرے و بھلا باوہ ءِ اُرا۔ بھلا باوہ غوڑتی ئٹ اودے اوننگ اس۔ بلکن اونا تاثر آتان گڑاس پوہ مننگ نا کوشست کننگ ئس ۔

” باوہ، گڑاس پاننگ خواہسہ ” نرم لہجہ ٹی شرف ئتون حاجرہ پارے
” نہ، پاننگ تو ہچ خواہپرہ، بلکن گڑاس سوج کننگ خواہوہ ” بشخندہ کرسا مہر ئٹ پارے۔ حاجرہ ام بشخندہ کرے
” ہئو؟ انت ہریفنگ خواسہ باوہ؟ ایہن باوہ ۔۔۔۔ نی ہرا وختان کنے آن گڑاس ہریفنگ آن مُست تمہید تفنگ بناء کرینس؟” لہجہ ٹی تہ شیطانی و شرف تومکا ئسر۔
” ہرا وخت آن نی دن سوبر و چُھپ مسونس۔ شیطانی ءِ ہلانس۔ بھلا باوہ ءِ تینا تنگ کننگ ہلانس۔ و دروغ نا بشخندہ ئٹ مخلوق ءِ رد تننگ بناء کرونس کہ او نا تہہ ئنا حالیت ءِ پوہ مفس” بھلا باوہ اسٹ اسٹ آ اندن کل سوج آتے کرے۔ حاجر نا بشخندہ یخ تفے ولے او چھپ اُروک مس۔
” حاجرہ بی بی، نی انت گمان کیسہ کہ ای دے آ پژہ آتے پیہن کرینٹ کہ تینا چنا ءِ پوہ مننگ کپر۔ او ام کل آن دوست انگا چنا ءِ”، مونا تہ داسکا بشخندہ تالان اس و حاجرہ ءِ اوننگ اس ہرا کہ یخ تفوک ئس و خنک تا ڈغار اٹ خوڑتی تون خلوک ئسر ۔

” گڑا داسا پاننگ نا ارادہ نا ارے کہ ویل انت ءِ؟” باوہ مہر ئٹ حاجرہ نا کاٹم آ دو ءِ تخا۔ او دا مہر ئنا لمس ءِ تینا کاٹم آ محسوس کرسا اودے لگا کہ داسا او پین برف مننگ کپک۔ دا برف ئنا دیر مننگ نا ساعت ئس۔
” کنے گمان مریک باوہ کہ ای بے سہب ءُ بندغ ئسے اُٹ، ای ہچ اس ام کننگ کپرہ، و کنتو ہر گڑا خراب مریک۔ کنے گمان مننگ ءِ کہ کنا زند ئنا کل آن بھلا فیصلہ رد ئس۔” دا ہیت آتے پاننگ نا وختا اودے لگا کہ اوداسا ایسا ہوغو ولے تیوہ غا خڑینک آتے کیدسہ او بارن ولے بے وس آ خن تیٹ بھلا باوہ ءِ اوننگ آ لگا ولے بھلا باوہ ہچ پاتو۔ گمان مسکہ کہ پین گڑاس ام بِننگ خواہک۔ و حاجرہ اودے پوہ مس۔
”ای گمان کتوسٹ کہ ای وختس دا ڈول تینے آ دوبہ خلوٹ۔ای ساندہ تینا زند آن بھاز اُست جم ئسوٹ۔ ہر گڑا جوان ئس۔ ولے ۔۔۔۔ ولے داسا کنے گمان مریک کہ ای تینا زند ئٹ بھاز پدی سلیسنٹ۔ ہمو گڑاتے کتنوٹ ہرافتے کروئی ئس۔ ہمو گڑاتے پوہ متوٹ ہرافتے پوہ مروئی ئس۔ ای انتئے پدی سلیسٹ باوہ” خڑینک آتا لوپ گٹ ئٹ تا اڑینگسا کرے، خنک تا گلابی مسر ولے او اوغنگ خواتوکہ و خڑینک آتے کیدا، خنک تا داسکان شیف ئسر۔
” زند ئٹی بھاز آ گڑاک بھاز اُرے آ ننے آ پاش مریرہ ولے گڑاس پاننگ آن مُست ای چاننگ خواوہ کہ نی انتئے دا پوہ مریسہ کہ نی بے سہب اُس یا نی پدی سلیسنس؟” توار ٹی تہ مہر ولے تاثرآک تا سوبر ئسر۔

” انتئے کہ باوہ کنے تینا غلامی نا احساس بھاز اُرے آ مسنے۔ ای تینا زند ئنا اسے بشخ اس تہارمئی ٹی گدریفینٹ۔غلامی نا تہارمئی ٹی ۔ و دا تہارمئی کنے کنا قوم آن بے سما تخاسس۔ کنا خنتیا تفوک غلامی نا پٹی کنے حق و راستی ءِ خننگ آن توریسس۔ ای تینا زند ئنا اسہ بشخ اس تینے وفادار شاری اس سمجھنگ ئٹ گدریفیٹ ولے راستی دادے کہ ای بیرہ وفادار غلام اس ئسوٹ” اونا خنک خیسن اڑسینگاسر۔ او اسہ وخت آ بھازا کیفیت آتیان گدرینگ ئٹی ئس ولے خنک تہ داسا شیف خلوک الور بلکن بھلا باوہ نا خنتیٹی اوننگ ئس۔

”و دا کل ئنا ذمہ وار نی تینے پوہ مننگ اُس؟” بھلا باوہ داسکان سنجیدہ ئس۔

” تو پین دیر ءِ دا کل ئنا ذمہ وار ؟ دا مگہ کنا ردی اف کہ ای دا وخت اسکان ظلم کروک آتون تفوک ئسوٹ؟ ای منیوہ کہ ای کس آ مون پہ مون ظلم کتنٹ ولے ظلم کروکا تا مُخ تفی تو کرینٹ و دا ام ظلم پاننگک باوہ۔ ای اسہ وخٹ اس تینے ریفینٹ۔ چُنکی ٹی وختس فوجیک ننا سکول آ چھاپہ خلکرہ، کتاب آتے پٹارہ و ننا تاریخ یا سیاست نا بابت کتاب خنارہ ننا استاد آتے تڑی تسرہ ہنارہ تو ای گمان کریٹہ کہ دا ننا جُوانی کن مننگ ءِ۔ کنا باوہ ام کنے اندا پاریکہ کہ دا کل ننا جوانی کن مننگ ءُ۔ ہرا وخت خلق آن بندغ آتے ارفیرہ دریرہ ای پاریٹہ کہ الّمی دہشت گردی ٹی اوار ئسر کہ دریر تا ولے ای رد ئسوٹ۔ دا ظلم ننا قوم تون اندا خاطر آ مننگ ءِ انتیکہ او تینے آقا و ننے تینا غلام پوہ مریرہ” اونا توار ئٹ لڑزہ ئس، سوختئی ئس، بے وسی ئس، او انت انت الو۔

” ای دا پوہ مفرہ کہ نی قصور وار اُس” کڑمب ءُ دم اس ہلیسہ بھلا باوہ خنتے حاجرہ نا کنڈ آن ہڑسیسہ مونا زیتون نا رخت ئنا کنڈ آ کرے۔ حاجرہ گوڑینگوک ئس۔
” ولے باوہ۔۔۔۔” (حاجرہ نا ہیت کٹتویسس کہ بھلا باوہ تینا ہیت ءِ برجا تخا) ”نی قصور وار افیس حاجرہ”۔
” و ای امر قصور وار افٹ باوہ؟” توار سبک و خنک تا گوڑینگوک ئسر۔حاجرہ اسہ وڑ بھلا باوہ ءِ اوننگ ئس۔
” نی خوش بخت ئسے اُس کہ وخت آ دا ہیت ءِ پوہ مسوس ولے پوہ مننگ بس مفک گام ام ارفوئی تمک۔ ہرا گڑا ءِ ردی پوہ مسوس اونا برخلاف جنگ ام کروئی تمک۔ نی بے سہب افیس نہ کہ نی پدی سلیسنس۔ نی داسا ام دا لائخ اریس کہ دا تہارمئی آن پیشتمنگ نا کوشست کیس۔ غلامی نا تہارمئی آن پیشتمنگ نا کوشست کیس” آخریکو ہیت ءِ بھلا باوہ رخت آن خنتے مر کریسہ حاجرہ نا خنتیٹی اُرا پارے۔

” واقعی ای پدی سلتنٹ؟ ولے ۔۔۔ داسا ای انت کیو کہ کنا پشیمانی ایسر مرے۔ ہمو پشیمانی ہرادے ای ظالم نا مُخ تفی کرسا کھٹانٹ؟ ای تو تینا مخلوق نا خلاف مسوسٹ باوہ۔ بے سمائی ٹی ولے ای ظلم ئتو اوار ئسوٹ۔ کنا ہمو سنگت آک ہرا غلامی نا برخلاف جہد کننگو ہرا ظلم ئنا خلاف توار بڑز کننگو، ای اوفتے اخس وار شیف خلنگ نا کوشست کرینٹ۔ اوفتے خراب پارینٹ۔ داسا ای انت کیو کہ اوفک کنے آ باور کیر ؟ ای انت کیو کہ ای ہم اوفتیتون اوار مریو و اوفتے کمک کیو؟” او داسا ہوغوئی ئس۔۔۔۔

”باوری کٹوئی تمک و نی کٹوس۔۔۔ نے سما ءِ حاجرہ کہ نن ہڑدے اسہ پوسکنو بندغ اسیٹی مٹ مریسہ کینہ۔ و ہرا وخت نن پدی چک خلینہ ننے تینا گدرینگوک وخت نا کل ردی تا اندازہ مریک۔ ہرا وخت ننے تینا گدرینگوک وخت نا ردی تا احساس مریک تو ننے گمان مریک کہ نن تینا ردی تے ہچبر جوان کننگ کپنہ و مایوس مرینہ ولے دن اف (بھلا باوہ نا جوڑتا دروشم آ نرم ءُ بشخندہ اس تالان مس) ننتو ساندہ کسر مریک۔ مایوسی تے آن پیشتمنگ نا، تینا ردی تے جوان کننگ نا۔ ای ام تو دا وختا تینا ردی ءِ جوان کننگ نا کوشست کننگ اُٹ” اونا نرم انگا بشخندہ ٹی ٹپی مننگ نا ندارہ اس ئسک۔

”ہرا ردی باوہ؟” حاجرہ پوہ مننگ نا ڈول ئٹ پارے۔ وو گواچنی پوہ متو کہ بھلا باوہ تینا ہرا ردی نا ہیت ءِ کننگے۔
”اسیکہ نی کنا سوج نا ورندی ءِ ایت حاجرہ۔۔۔ ناگمان دنو انتس مس نا زند ئٹ کہ نی داخس گڑا پوہ مسوس و نا سوچ داخس بدل مس؟” بھلا باوہ غور ئٹ اودے اوننگ ئس۔ حاجرہ خرین ءُ بشخندہ اس کرے۔

”ناگمان تو ہچس ام مفک باوہ۔ ناگمان تو بیرہ مرک بریک۔ شعور تو ناگمان بفک، وحی نا ڈول نازل مفک ۔ای ریاست نا ظلم ءِ دا پاریسہ پے پام کننگ ءِ ہلاٹ کہ دا ننا جُوانی کن مننگ ءِ۔ راستی کنڈ آ مننگ کن وختس غیر جانبدار مروئی و سوچوئی تمک” او خننگپروک ءُ ٹِک ئسے اُریسہ پارے
”ہرا وخت ای نا سن ئنا ئسوٹ، آزاتی نا ہیت ءِ کروکا ہمو وختا ام ساڑی ئسر۔ آو دا جنگ داسا ترند مسنے ولے دادے بھازا سالک گدرینگانو، بناء مننگ آ ( بھلا باوہ پدا خنتے زیتون نا رخت ئنا کنڈا کرے و ہیت ءِ تینا برجا تخا) ہمو وختا کنا اسہ دوست ءُ سنگت اس کنتو جنگ آزاتی نا ہیت ءِ کرے۔ ای دا پاریسہ کہ کنے شیر ئنا با ٹی دوشاغنگ نا شونق اف و نن چار بندغ اسہ ریاست اسیتون جنگ ئٹی کٹنگ کپنہ، اڑا ٹوک کریٹ۔ او وختا کنتو گچین کننگ کن اِرا کسر ئسر کہ ای حق و راستی ءِ گچین کیو یا تینا ذات و تینا خاہوت ءِ گچین کیو۔ ای حق و راستی ءِ قربان کریٹ و تینا ذات ءِ گچین کریٹ (توار ئٹ تا دڑد پاش مس) او کنے قائل کننگ نا بھاز کوشست کرے ولے ای تینا خاہوت نا سوچاٹ و اودے ام تینا خاہوت نا سوچنگ و دا جنجال آتیٹی تمپرنگ نا پنت تسوٹ۔ او کنے دا ام پارے کہ ای اسہ نا اسہ دے اونا ہیت آتے پوہ مروٹ ولے او خواپک کہ اے وخت اسکان بھاز اُرے تمے”
ساعت آک چھپی ٹی گدرینگا۔ بھلا باوہ گدرینگوک وخت نا یات ٹی ہناسس و حاجرہ اودے اوننگ ئس۔ منہ ساعت اندن چھپی ٹی گدرینگار۔ ایسر بھلا باوہ چھپی ءِ پرغا۔

”او تینا خاہوت ءِ اسہ مسخت اسیکن جنگ کننگ رماغا۔ نہ تنیا تینا خاہوت ءِ بلکن بھازا بندغ آتا خنتان غلامی نا پٹی ءِ مر کرے بٹے۔ ای ام ہموفتیان اسٹ مننگ کریٹہ”

”نی ام اوفتیان اسٹ اریس باوہ” او معصومیت ئٹ پارے۔ بھلا باوہ بشخندہ کرے و ہیت ءِ برجا تخا
” تینا ذات آن پیشتمنگ و تینا قوم ئنا بارو ئٹ سوچنگ ہر اسٹ نا وس ئنا ہیت اس اف۔ ای ہرا وخت تینا ڈغار نا رکھ ءِ کننگ کریٹہ او وخت کنے چرینگ کن دافتا خواست الو ( تینا لٹ نا کنڈا دو مریفسہ پارے) او وختا ای تینا ذات ئنا سوچاٹ تینا خاہوت نا سوچاٹ و تینا چُنا تا سوچاٹ۔ اینو دا ہیت ئنا احساس مننگ آ اگہ ای تینا ماتے قائل کننگ نا کوشست کیو اوفتے پوہ کننگ نا کوشست کیو تو کنا ہیت آک بے اثر مرور۔ انتیکہ ای تینٹ جہد کتوٹ، ای تینٹ آسرات آ کسر ءِ تینکن گچین کریٹ۔ نن کس ءِ تینا عمل آن قائل کننگ کینہ تینا ہیت آتیان نہ۔ کنا ماک ام کنا عمل آن قائل مسونو کنا ہیت آتیان قائل مفرور۔ ہرا تربیت ءِ ای اوفتا کریٹ ہمو تربیت ءِ او نا کریرا و اندا خاطر آن نی رد افیس نا تربیت رد اس۔ اینو امر نی حق و راستی ءِ پوہ مسونس اندن اوفتے ام پوہ مروئی اس ولے او پوہ متور اوفتے احساس متئو ”بھلا باوہ حاجرہ ءِ نرمی و مہر اٹ پوہ کننگ اس

”نی بے سہب افیس انتیکہ نی داسا ام راستی نا کسر ءِ تین کن گچین کننگ کیسہ۔ اینو نیتو گچین کننگ کن اِرا کسر ءُ۔ آسرات و سخت انگا کسر۔ ہمو کسر ءِ تینکن گچین کر ہرا سخت ءِ و ہرا کہ حق ئنا کسر ءِ۔ سخت انگا کسر تا خلیس آن زیبدار آ مزل ءِ قربان کپیس”

او بھاز خوڑتی ئٹ بھلا باوہ نا ہیت آتے بننگ ئس، راہشونی ہلنگ ئس، تینا است ئنا باریم ءِ سبک کننگ ئس۔
” ای سخت انگا کسر نا گچین کننگ آن ہچبر پد سلپروٹ اگہ او کسر کنا و کنا قوم ئنا غلامی آن مُر کننگ نا کسر مس۔” حاجرہ معصوم ولے پرعزم توار ئٹ جوڑتیا بشخندہ تالان کریسہ پارے
” کنے یخین ءِ نے آ، و نا گچین کروکا کسر آ۔ ہچبر پدی گام تخپروس کنے سما ءِ۔” او ام بشخندہ کرے
” منتوار باوہ۔۔۔۔” حاجرہ داسا تینا است ءِ سبک محسوس کننگ ئس۔
” منتوار حاجرہ ۔۔۔ کنا خاہوت آن ہمو اولیکو بندغ مننگ کن ہرا قوم ءِ کن سخت انگا کسر ءِ گچین کننگ ءِ” بھلا باوہ نا بشخندہ ودا
” داسا بش مہ کنے کوٹی اسکان در۔” بھلا باوہ بش مننگ ئس، حاجرہ زو اس اونا دو ءِ ہلک و اودے کمک کرے بش مننک کہ

ارا دے آن پد حاجرہ واپس ہنا۔ اونا چھٹیک پورو مسر۔ دا وار او پوسکنو ارادہ اسیتون ہنا۔ غٹ مایوسی، تینا ذات آن کل شکایت، حوصلہ آتے نزور کروکا ہر اسہ ہیت ءِ ذہن آن کشیسہ، او داسا مرغن و سخت آ کسر ئسے گچین کریسس۔ تینا ذات ءِ اسہ پارہ غا تخیسہ داسا انت کہ کروئی اس او ہر قیمت اٹ کننگ نا سوغند ءِ تینتو کریسس۔

دا اسہ جذباتی ءُ فیصلہ اس الو، نہ کہ بے وسی نا۔ دا ہمو فیصلہ اس ہرادے او احساس نا رِد ئٹ کریسس، ہرا شعور بننگ آن پد اودے مسوس، غلامی نا احساس۔

پُوسکنا حوالک

مسافر ماسک بیننگ آن نمن، امریکی جاز نیم کسر آن پدی

امریکی ایئرلائن نا جاز ٹی سوار مسافر نا کنڈ آن کورونا نا رکھ ئی ماسک ءِ بیننگ آن نمن...

کاہان: بیگواہ مروک ورنا داسکان یلہ مننگ کتو

بلوچستان نا ضلع کوہلو نا علاقہ کاہان آن ارا تو مست زورٹ بیگواہ مروکا ورنا داسکان یلہ مننگ کتنے۔ ٹی بی پی ءِ رسینگوک حوال...

بلوچستان ئٹ ہم کورونا وائرس نا تالانی ٹی ودکی 

حوال تا رد ئٹ بلوچستان ٹی ہم جہانی دین کورونا وائرس نا تالان مننگ نا کچ ئٹی ودکی مننگ ءِ، گیشتر حوال تا رد...

نیمہ دے | نجیب محفوظ – عطیہ بلوچ

نیمہ دے نوشتہ کار: نجیب محفوظ مٹ و بدل: عطیہ بلوچ دی بلوچستان پوسٹ ای تینا باوہ نا راستیکو دُو ءِ سوگوْ توریسٹ اوڑتون اوار ہناٹہ۔ کنا تیوہ...

جہانی ادارہ جانجوڑی کرونا نا پوسکنا ويرينٹ نا بارو ئٹ خبردار کرینے

جہانی ادارہ جانجوڑی نا سرکماش ٹيڈ روس ايدانم نا پاننگ ءِ کہ دا خيال راست اف کہ اوميکرون ويرينٹ بے نسخان ءِ، دا غٹ...