بلوچستان نا علاقہ کوئٹہ و تربت ٹی بمب تراک نا جتا ویل آتیٹ اسہ بندغ اس مرگ نا گواچی و فورسز کارندہ تون اوار ہشت ٹپی مسونو۔
حوال تا رد ئٹ بلوچستان نا ضلع کیچ نا مرکزی شار تربت ٹی فورسز چوکی آ بمب تراک آن اسہ فورسز کارندہ اس ٹپی مسونے۔ تراک تربت شار ٹی پارک نا خڑک ٹہفوک فوجی چوکی آ مس۔
اندن پین حوال ئسے نا رد ئٹ کوئٹہ نا علاقہ قندھاری بازار ٹی بمب تراک آن اسہ بندغ اس مرگ نا گواچی و ہفت ٹپی مسر۔ پولیس آن ریسنگوگ حوال تا رد ئٹ تراک نا سوب آن خڑک ئنا دکانک نسخان مسونو و گاڑی تا شیشہ آک پنانو۔
ریسکیو ورکرز و علاقہ نا مخلوق ٹپی آتے دوا درمان کننگ کن سول اسپتال کوئٹہ آ سرکریر، اندن سیکورٹی فورسز علاقہ ءِ داپار ایپار ہلیسہ سخت چیکنگ بناء کرینے۔
اندن حوال تا رد ئٹ دا سما تمتنے کہ تراک نا ہدف دیر ئس۔ پولیس نا پاننگ ءِ کہ نن تراک نا نوعیت نا پٹ و پل کننگ اُن۔