بلوچ اسٹوڈنٹس آرگنائزیشن آزاد نا بنجائی ترجمان پنجگور، نوشکی و بالگتر ٹی لس مخلوق ءِ ٹک کننگ آ خلیس نا درشانی ءِ کریسہ پارے کہ بلوچستان ئٹ بندغی حق آتا زی آ قانود آن چھپ عمل کننگ ءُ۔ اندا دے تیٹ خلنگ و خسنگ نا پالیسی واپس زیات مسونے و بلوچستان ئٹ برجاء بندغی حق آتا پامالی تا برخلاف جہانی ادارہ غاتا چپی ادارہ غاتا کڑدار آ سوج ئنا ٹک ئسے۔
ترجمان پارے کی تدوکا ہٹ دے آن سبی، پنجگور، بالگتر و نوشکے آن لس شاری تے بیگواہ کریسہ اوفتے سم کاری کننگانے۔ لس شاری تے ٹک کننگ ظلم و جبر نا انتہا ءِ۔ کوزہ گیر نا ساندہ کوشست اندا مسونے کہ لس شاری تے ٹک کریسہ خلیس تالان کے۔ بے گناہ بندغ آتے ٹک کننگ ئٹ دا ملک تینا بد آ نیت ئٹ ہچ ہم سرسہب مننگ کپک۔ اندا دے تیٹ کوئٹہ، نوشکے، پنجگور و کیچ نا جتا علاقہ تیٹ درزن تا کچ ئٹ بندغ آک زوراکی ئٹ بیگواہی نا گواچی مسونو اندن خلیس نا ہیت ئسے کہ بندغی حق آتا ادارہ غاک دا ظالم تیا تیوہ وڑ ئٹ چپ ءُ۔ بلوچستان ئٹ میڈیا بلیک آؤٹ و صحافی تیا ریاست نا زور تخنگ آن تیوہ جرم آک ڈکھنگسہ ءُ و جہانی سیاسی طاغت آک چُپ اُرنگ نا کڑدار ءِ ادا کننگ ءُ۔
ترجمان پارے کہ پاکستان بھلو وخت ئسے آن بلوچستان ئٹ بھلو جنگی ڈو تیٹ اوار ءِ۔ بلوچستان ئٹ اسہ ہم دنو دے اس گدرینگپک کہ پاکستانی فوج بلوچستان ئٹ کسفنگ و لٹنگ کپ ولے دا تیوہ ظالم تیا جہانی ادارہ تا پارہ غان پاکستان ءِ تیوی وڑ ئٹ ہلانو ہرانا سوب آن ریاستی ادارہ غاک بلوچستان ئٹ نسل کشی نا بازار ءِ بش کرینو۔ ریاستی ظلم آتیٹ پاکستان نا تیوہ ادارہ غاک ڈوہداری آ چپی نا سوب آن اوار خننگرہ۔ جہانی بندغ آتا ادارہ غاک و سیاسی طاغت آک دا بارہ ئٹ تینا کڑدار ء ادا کیر۔