روس و یوکرین نا نیام ئٹ چِک و تاڑ دا وخت اسکان برجا ءِ۔ دا بارو ئٹ دے کہی ملک آتا پاننگ ءِ کہ روس یوکرین نا سیم آ تینا فوج ءِ اسہ ڈول ودفنگ ءِ و ماسکو نا دعویٰ ءِ کہ او سیم آن تینا فوج نا منہ یونٹ آتے واپس کرینے۔
امریکہ نا صدر جوبائڈن نا حکومت نا اسہ سینئر افسر اس دعویٰ کرینے کہ یوکرین نا سیم آ دا دے تیٹ روس پین ہفت ہزار فوجی تعینات کرینے و منہ فوجی چار شنبے نا دے سیم آ سر مسونو۔
حوال تروک ادارہ “رائٹرز نا رد ئٹ جہان نا بھلا طاغت آک روس و یوکرین نا تنازع ٹی پھاسینگوک ءُ۔
برطانوی انٹیلی جنس چیف اسہ بیان اسیٹی پارے کہ سیم آتیا پین بکتر بند گاڑی، ہیلی کاپٹر و فیلڈ اسپتال خننگانو و ایسٹونیا نا پاننگ اس کہ روس نا فوج نا جنگی ٹولیک اہم جاگہ غاتا کوزہ کننگ کن مونی بننگ ءُ۔
دے کہی ملک آک یوکرین ٹی تینا شاری تے ملک ءِ النگ نا پارینو و اسہ وڑ دا گمان نا درشان مننگ ءِ کہ روس ناگمان آ یوکرین آ جلہو کننگ کیک۔ و روس یوکرین آ جلہو نا منصوبہ نا ہیت ءِ رد کرینے ۔
امریکہ نا وزیر داخلہ اینٹنی بلنکن امریکی شینک کروک ادارہ “ایم ایس این بی سی” ءِ انٹرویو تریسہ پارے کہ “اسہ کنڈ روس نا قول ءِ ایلو کنڈ آ اونا فعل ءِ۔ نن یوکرین نا سیم آتا فوج آتا کمی خنتنون۔
ایسٹونیا نا انٹیلی جنس ڈائریکٹر جنرل میک ماران نا پاننگ ءِ کہ ننے معلومات رسینگانے کہ دہ پین روسی جنگی جتھہ یوکرین نا سرحد نا نیمہ غا ہِننگ ءُ داد آن مُست اسہ لکھ ہفتاد ہزار فوجی تعینات ءُ۔
جنرل میک ماران نا پاننگ ءِ کہ روس اگہ یوکرین ٹی سرسہب مس گُڑا اودے بلکان نا ڈیہہ نا ملک آتیٹ پین وختی زور تخنگ کن حوصلہ افزائی رسینگو۔ اونا پاننگ ءِ کہ داسا روسی صدر ولادیمیر پوٹن نا بنجائی پالیسی جنگ ئنا تڑی جوڑ مسونے۔
روس نا وزارت دفاع سہے شنبے نا دے پارے کہ اونا فوج یوکرین نا خُڑک آ جنوبی و مغربی ملٹری ضلع تیان جنگی مشق آتیان پد واپس بننگ ءُ۔ روسی وزارت دفاع اسہ ویڈیو پوسٹ اس کریسس کہ ہراٹی دا نشان تننگاسس کہ فوج و جنگی مڈی جزیرہ ڈول کرائمیا غان پیشتمنگ ءُ۔
یات مرے کہ کرائمیا یوکرین نا ونڈ اس اسک ہرادا روس 2014 ٹی کوزہ کریسس۔
صدر زلینسکی تینا مخلوق نا است بڈی کن ملک ئنا دورہ کننگ ءِ۔ او دا دورہ غاتے اندنو وخت ئسے آ کرے ہرا وخت دے کہی میڈیا ٹی دا حوال شینک مننگ اس کہ روس 16 فروری آ یوکرین آ جلہو کننگ کیک۔ یوکرین نا صدر قوم ئتون ہواری نا درشانی ءِ کننگ نا خواست 16 فروری آ کرے۔
یوکرین نا صدر اسہ بیان اسیٹ پاریسس کہ “ ننا اُرا تون ننے آن زیات کس مابت کننگ کپک و نن ہم اوار دا نا رکھ ءِ کننگ کینہ”
برطانیہ نیٹو نا کنڈ آن تعینات آتا سلسلہ ٹی روس نا سیم تون اوار ساڑی ملک ایسٹونیا ہم تینا فوج نا کچ ءِ ودفنگ ءِ۔