بلوچ بیگواہ بندغ تا خاہوت آتا کراچی پریس کلب نا مونا برانزی کیمپ 19 می دے ہم برجاء مس۔
کراچی ٹی برانز آ تولوک خاہوت آ تیٹ کراچی نا علاقہ گلستان جوہر آن بیگواہ مروک عبدالحمید زہری ،کراچی نا علاقہ ماڑی پور آن بیگواہ مروک محمد عمران، لیاری آن بیگواہ شوکت بلوچ و رئیس گوٹھ کراچی آن زوراکی ئٹ بیگواہی نا گواچی مروک نور بخش ولد حبیب نا خاہوت ہم اوار ئس۔
خاہوت آک تینا دوست آتا آجو نہ کننگ نا بر خلاف سخت نعرہ خلکر و سندھ تون اوار بنجائی حکومت آن غُٹ بیگواہ بندغ آتا آجو کننگ نا خواست کریر۔
کراچی آن زوراکی ئٹ بیگواہی تا گواچی مروک عبدالحمید زہری نا مسڑ سعیدہ حمید پیپلز پارٹی نا راہشون بلاول بھٹو آن سندھ ٹی بلوچ آتا زوراکی ئٹ بیگواہی تا برخلاف تینا کڑدار ءِ ایسری تننگ نا خواست کریسہ پارے کہ سندھ پولیس نا کمک ئٹ فورسز آک بے ڈوہ بندغ آتے بیگواہ کننگ ئٹی اختہ ءُ۔
برانزی کیمپ ئٹ بیگواہ عبدالحمید نا خاہوت آن فاطمہ حمید مسڑ سعیدہ حمید و گیشتر بیگواہ بندغ آتا خاہوت آک اوار ئسُر۔
سعیدہ حمید نا پاننگ ئس کہ کراچی آن بلوچ آتا زوراکی ئٹ بیگواہی تا دا عمل ئٹی سندھ حکومت ءِ وفاقی ادارہ آتا راہشونی دوئی ءِ۔
سعیدہ حمید کراچی آن سیکورٹی ادارہ آتا دو آن زوراکی ئٹ بیگواہی تا گواچی تینا باوہ عبدالحمید زہری تون اوار گیشتر بیگواہ بندغ آتا آجو کننگ نا خواست کرے سعیدہ حمید نا پاننگ ئس کہ اگہ کَس ئنا برخلاف اسہ دوبہ اس ارے گڑا اوفتے عدالت آتیئٹ ہتیر۔
کراچی برانز ئٹ تولوک خاہوت آتا خواست ءِ کہ سندھ حکومت اوفتا بندغ آتے واپس ہتے اگہ اوفتیا دوبہ اس ارے گڑا اوفتے عدالت آتیٹ ہتیر ۔