بلوچستان جتا علاقہ آتیٹ جتا روڈ شکست آتیٹ 8 بندغ بیران اندن 11 بندغ ٹپی مسر۔
ماشکیل ئٹ اِرا اُلاخ نا ڈک لگنگ آن چُنا تون اوار مُسہ بندغ بیران اندن زالبول و چُنا تتون اوار یانزدہ بندغ ٹپی مسر۔
کہوک و ٹپی مروک آتے پرنس فہد ہسپتال دالبندین آ سر کننگا ہراڑے ٹپی آتے بنائی جانجوڑی کمک تننگا۔
پاننگک کہ بیران و ٹپی مروک آک بے قانودی وڑ ئٹ ایران آ ہننگ ئسر۔ پرنس فہد ہسپتال دالبندین نا بست و بند نا رد ئٹ ٹپی آتےجانجوڑی کمک آن گڈ کوئٹہ آ رادہ کننگو۔
ایلو نیمہ غان قلات نا بھلا روڈ آ آئل ٹینکر اس موٹر سائیکل سوار ئسے لتاڑا ہرا نا سوب آن موٹر سائیکل سوار جاگہ غا ساہ تس۔
بیران مروک موٹر سائیکل سوار نا چاہنداری محمد خیر نا پن آ مسنے۔
اندن کیچ ئنا بنجائی شار تربت ئٹی تربت یونیورسٹی نا خڑک موٹرسائیکل سوار سلوک کرولا لاری ٹی ڈک لگا۔ ہرا نا سوب آنموٹرسائیکل سوار تومکا بندغ آک جاگہ غا ساہ تسر۔
بیران مروک آتا چاہنداری عبدالرشید ولد ملنگ و حسن ولد شبیر نا پن آ مسنے ہرا آبسر بُنڈے بازار تربت نا جاگہی پاننگرہ۔ تومکا تےٹیچنگ ہسپتال تربت آ دننگا۔
اندن یک مچھ نا خڑک ترندی ئٹ بروک ذمیاد گاڑی بس ئسے تون ڈک لگا، ذمیاد گاڑی ٹی سوار اِرا بندغ جاگہ غا کسکر۔