ایران ٹی حجاب وے کننگ آ دزگیر کروک مسڑ مہسا امینی نا خون آن گُڈ برجاء چک و تاڑ آتیٹ مرگ نا گواچی مروک آتا کچ 50 مس ۔
پولیس نا کریک ڈاؤن و بے دادی ٹی مرگ نا گواچی مروک آتا کچ 50 مس، مرگ نا گواچی مروک آتیٹ 5، سیکورٹی کارندہ ہم اوار ءِ۔
ہفت دے آن برجاء برانز آتا نیام ئٹ جتاء شار آتیٹ انٹرنیٹ کاریم بند ءِ و بے دادی آن زیات زیمی مروک علاقہ آتیٹ سیکورٹی کارندہ آتاکچ زیات کننگانے۔ ایران نا صدر ابراہیم رئیسی مہسا امینی نا خون نا سوب آتے چاننگ کِن پٹ و پول نا حکم تننگا ۔
ایرانی پولیس 22 سالہ مہسا امینی ءِ حجاب وے کننگ آ دزگیر کریسس و مُسہ دے آن گُڈ طبیعت نا خراب مننگ آ اسپتال آ دننگا ہراڑےاو 16 ستمبر آ مرگ نا گواچی مس، ایرانی پولیس مہسا امینی آ بے دادی کننگ نا دوبہ خلیسہ دعویٰ کریر کہ مہسا امینی ءِ اُست نادورہ مننگ نا سوب اسپتال آ دننگاسس ہراڑے او پدا جوان متو ۔
ایران پولیس نا دزگیری ٹی جتاء علاقہ آتیٹ برانز برجاء ءِ ہرانا وخت سیکیورٹی فورسز کارندہ آتا کریک ڈاؤن ٹی زیات بندغ مرگ ناگواچی مسونو ۔
ایلو پارہ غان بندغی حق آتا ادارہ ایرانی حکومت آ برانز نا برخلاف بے دادی تے توننگ کِن زور تِس۔ سی ایچ آر آئی اسہ بیان ئٹ پارےکہ حکومت نا پارہ غان برانز آ سُم کاری و آنسو گیس نا زریعت ئٹ پاش کننگ ءُ ۔
ایران نا سرکاری حوال ایتوک ادارہ نا ردئٹ جتاء شار آتیٹ برانز کروک آتا پارہ غان سیکیورٹی کارندہ آک خل خسیسہ ءُ و پولیس نااُلاخ آتے ہشنگ ءُ ۔
برانز کروک آتا دوبہ ءِ کہ پولیس 22 سالہ مہسا امینی ءِ بے دادی نا گواچی کریسُر ہرادا او کومہ ٹی ہِننگ آن گُڈ دوا دارو نا وخت مرگنا گواچی مس ۔
یاتی مرے کہ مہسا امینی نا خون اخلاقی پولیس نا دزگیری ٹی کوما ٹی ہِننگ آن گُڈ مس۔ دا پولیس ایران ٹی تُرند قانود نافذ کیک ہراناردئٹ نیاڑی ءِ تینا پُژہ آتے ڈھکنگ و لس ہند آ اولُن او پُچ بیننگ الّمی ءِ۔ اونا خون آن گُڈ کردستان ٹی بناء مروک برانز دوشمبے و سئےشمبے آ شمال مغربی ایران گیشتر صوبہ آتیٹ ہم تالان مسُنے ۔