بلوچستان ئٹ برجاء سیلاب آتیان گڈ ڈینگی کیس آتیٹ ودکی بننگ ءِ، اندن کہی علاقہ تیٹ ڈینگی وائرس بیم بش کروک ءُ حالیت ئس دوئی کرینے۔
دا وخت تیوہ بلوچستان ئٹ ڈینگی وائرس نا کیس تا کچ چار ہزار آن تدینگانے اندن ضلع کیچ ڈینگی آن بھاز زیمی مسونے۔
تدوکا 24 گھنٹہ ٹی 37 کیس لسبیلہ آن، 14 کیچ و 2 گوادر آن مونا بسونو۔ برجاء سال کیچ آن رپورٹ مروک کیس تا کچ مُسہ ہزار 42 اسکان سر مس۔ لسبیلہ آن 504 و گوادر آن 444 کیس رپورٹ مسر۔ کوئٹہ ٹی ڈینگی نا ناجوڑ آک 22 ءُ۔ بلوچستان ئٹ ڈینگی نا تیوہ کیس آک چار ہزار 12 ءُ۔
پِر و سیلاب آتیان بلوچستان نا غٹ 35 ضلع زیمی مسونو۔ پر و سیلاب آتیان سئے سد آن زیات بندغ آک بیران مسنو اندن او زیمی مروک علاقہ تیٹ ناجوڑیک دین ئنا دروشم ءِ الیسہ اسہ ہفتہ ٹی ڈینگی، است و پڈ، ملیریا، خنتا و سِل نا انفیکشن، دم ئنا ناجوڑی تون اوار کہی ناجوڑی تا کیس آک رپورٹ مسنو۔
حوال تا رد ئٹ محکمہ جانجوڑی نا پامداری تفننگ نا سوب آن ڈینگی نا ہڷ ترندی ئٹ تالان مسنے، محکمہ جانجوڑی دا ناجوڑی تے توننگ کن گام ارفتنے۔
بلوچستان ئٹ برجاء قدرتی آفت آتیان جانجوڑی نا مرکز آک بھس کاری نا گواچی ءُ ہرانا سوب آن وخت آ دارو درمان نا رسینگ ہم ڈکھیا مسنے۔