نیشنل ڈیموکریٹک پارٹی نا بیگواہ راہشون ڈاکٹر جمیل بلوچ آجو مریسہ تینا اُرا غا سر مسونے۔
ڈاکٹر محمد جمیل ولد جمعہ خان جلیانی کیتھران ءِ ہشت تُو مالو بلوچستان نا علاقہ بارکھان ئٹ اونا دفتر آن زوراکی ئٹ بیگواہ کننگاسس۔
ڈاکٹر جمیل 23 فروری 2022 نا دے ہڑدے نا وڑ ئٹ تینا میڈیکل اسٹور ئٹ تولوک مسوسس ہموتم اُلاخ آتیٹ بروک سلاء بند بندغ آک ڈاکٹر جمیل ءِ دزگیر کریسہ بیگواہ کریسر۔
ڈاکٹر جمیل بیگواہ مننگ آن مالو بارکھان ئٹ لوکل ڈومیسائل نا ویل ءِ ارفیسس و خلقت نا کنڈ آن ترند برانز ہم کننگا ہرا کہی دے تسکان جتاء وڑ ایسری تریسہ سرسہب مس و دا برانز آن گڈ ضلعی بست و بند کہی نان لوکل بندغ تا لوکل ڈومیسائل ءِ دروغی پاریسہ پد بٹے۔
ڈاکٹر جمیل ء بیگواہ کننگ نا ایلو دے اونا اِرا سنگت ہم بیگواہ کننگاسر ہرا بارکھان ئٹ بوگس لوکل ڈومیسائل نا ویل آ سیاسی وڑ ئٹ کڑد ایسری تسوسر۔ منہ وخت آن گڈ ہڑتوم آ ورنا تے پاش کریسہ یلہ کننگاسس۔
ایلو پارہ غا ڈاکٹر جمیل نا بیگواہ مننگ آن ہلیس آجو مننگ اسکان اونا خاہوت جتاء وڑ ئٹ تینا برانز ءِ ریکارڈ کریسہ بسونے۔