بلوچ یکجہتی کمیٹی شال نا ترجمان بیان ئس شینک کریسہ پنجاب نشتر اسپتال آن سد آتا کچ ئٹ جون تا خننگ خلیس نا درشانی کریسہ پارے کہ پنجاب نا اسپتال نشتر آن سد آتا کچ ئٹ دن بے وارث جون تا رسینگ تدینی ئسے آن کم اف۔
او پارے کہ داکان مالو ہم دا کچ ئٹ جونک خننگانو ہرافتے بیدس ڈی این اے آن کڈ کننگانے ہراڑان بیگواہ بندغ تا خاہوت آتے بھاز ازیت رسینگانے۔ سد آتا کچ ئٹ جون تا رسینگ و اوفتے بیدس ڈی این اے آن کڈ کننگ اسہ بندغی ڈوہ ئسے ہرا نا بر خلاف توار ارفنگ نا گرج ءِ۔
او بیان ئٹ پین پارے کہ بلوچستان ئٹ ہڑدے بندغ آتے بیگواہ کننگک و بیگواہ مروک بھاز آ بندغ تا حوال آک میڈیا ٹی رپورٹ مفسہ بھاز کم کیس آک میڈیا ٹی رپورٹ مریرہ اندن بھاز آ بندغ تے تڑی ئٹ چُپ کرفنگک ہرا نا سوب آن او تینا دوستخواہ تا بیگواہی نا حوال ءِ پبلک کپسہ ولے اشتماعی سزا نا رد ئٹ اوفتے یلہ کننگ نا جاگہ آ کسفیسہ اشتماعی قبر آتیٹ کڈ کننگک یا اوفتا جون تے بیابان تیٹ خسنگک، توتک و پنجگور آن خننگوک آ اشتماعی قبر آک دا نا درشان و مثیل ءُ۔ پنجاب ئٹ ہم دا اولی تدینی اف سد آتا کچ ئٹ دن بے وارث جونک خننگانو ولے ساندہ بیدس پٹ و پول آن دا حوال تے میڈیا آن اودیم کننگانے۔
ترجمان تینا بیان نا گڈ سر ئٹ دا بندغی ءِ لتاڑوک تدینی نا صاف پٹ و پول نا خواست کریسہ پارے کہ دن بندغی لتاڑوک ڈوہ تیٹ اوار انگا ادارہ و بندغ تے ترند ءُ سزا تننگ نا گرج ءِ۔ دا جہان ئٹ کس بے وارث اف بلکن ہر بندغ ءِ اسہ خاہوت ئس الّم مریک۔ سد آتا کچ ئٹ جون تے بیدس ڈی این اے آن کڈ کننگ بے بندغی ءُ ڈوہ ئسے، اگہ پنجاب آن خننگوک آ جون تا ڈی این اے کرفنگ متو تو دا نا بر خلاف سیاسی جہد نا کسر ءِ دوئی کرون۔