کراچی نا اولڈ سٹی ایریا، بھیم پورہ آن نشہ بہا کننگ نا دوبہ ٹی دزگیر مروک ورنا کراچی نا لانڈھی جیل ئٹ ناگمان بیران مس۔
بیران مروک ورنا نا چاہنداری صابر بلوچ نا پن ئٹ مسونے۔ خاہوت نا رد ئٹ صابر ءِ نیپیئر پولیس دزگیر کریسس۔
نیپیئر پولیس نا رد ئٹ صابر ولد اشرف ءِ 3 اگست نا سہب سالار کمپاؤنڈ ئٹ پولیس چوکی نا خڑک شکبر خنیسہ پٹان تو اوڑان 60 گرام ہیروئن نا 3 تھیلہ خننگار، ہرا نا سوب آن اودے دزگیر کریسہ آیف آئی آر نمبر 216/22 کننگاسس۔
اوکان گڈ دوبہ دار ءِ جوڈیشل ریمانڈ آ لانڈھی جیل رادہ کننگاسس و اونا بر خلاف عدالت ئٹ کیس بننگسہ ئس۔
خاہوت نا رد ئٹ اوفتے جون نا جناح اسپتال ئٹ ساڑی مننگ نا حوال تننگا و پولیس دوبہ خلک کہ صابر نا مرگ گمانی وڑ ئٹ چڑہ نا نشہ تیان مسونے۔
لانڈھی ڈسٹرکٹ جیل ملیر نا سپرنٹنڈنٹ محمد ارشد نا رد ئٹ بندی صابر نشہ نا ہیلی ئس اس۔
یک شمبے اکتوبر آ اونا حالیت خراب مسوسس ہرا نا سوب آن اودے جناح اسپتال ئٹ داخل کننگاسس۔
سپرنٹنڈنٹ جیل نا رد ئٹ اسپتال ئٹ دارو درمان نا وخت آ صابر بیران مس۔
او پارے کہ قانودی وڑ ئٹ دفعہ 176 نا رد ئٹ مجسٹریٹ نا پامداری ٹی جون نا پوسٹ مارٹم کرفنگک، ہرا نا یخینی رپورٹ نا بننگ آن گڈ مرگ نا سوب مونا برو۔