پاکستان نا صوبہ پنجاب ئٹ بلوچ خوانندہ غاک دوبہ خلنگ ءُ کہ اوڑے خوانوک بلوچ خوانندہ تے اوفتا بلوچی پُچ آتا سوب آن خلیفنگک۔
بلوچ کونسل پنجاب یونیورسٹی نا ترجمان تینا شینک کروک بیان ئٹ پارے کہ پنجاب و وفاق نا تہٹی بلوچ خوانندہ غاک چرجوئی ئٹ ہراسمنٹ و پروفائلنگ تون مون تروئی تمنگ ءُ۔ ہرا نا سوب آن خوانندہ تیٹ اسہ ترند ءُ ذہنی اذیت و بے جاراتی نا ماحول ئس خننگک۔
او پارے کہ 22 اکتوبر نا نن بلوچ کونسل پنجاب یونیورسٹی نا کماش احسان بلوچ و اوڑتون اوار اقبال شاہ ءِ بیرہ دا سوب آن پولیس دزگیر کرے انتئے کہ او بلوچی ءُ پچ بینوک اسر و پولیس اوفتے پاریسس کہ دا لویس بہوش آتا ءِ۔
“ننکان احسان بلوچ و اقبال شاہ ءِ چرجوئی ئٹ خلیفنگ و تڑی تننگ آن گڈ ذہنی تکلیف نا حالیت ٹی یلہ کننگا۔”
ترجمان نا رد ئٹ پنجاب و بنجاہ ٹی ہزار آ بلوچ خوانندہ غاک خواننگ ءُ و اوفتے ہڑدے کست ئٹ وختس اوفتا پُچ آتا سوب آن و وختس اوفتا پجار نا سوب آن ٹک کننگک۔ بلوچ خوانندہ تا پروفائلنگ و ہراسمنٹ داسا ہڑدے نا کاریم ئس جوڑ مسونے ہرا نا سوب آن خوانندہ غاک خلیس نا گواچی ءُ، و خُلیس نا سوب آن نہ بیرہ اوفتا خواننگ بلکن اوفتا ذاتی زند ہم بھاز زیمی مسونے۔
ترجمان نا پاننگ ئس کہ نن غٹ بندغی حق آتا ادارہ و چاگڑدی باسک آتیان خواست کینہ کہ پنجاب ئٹ بلوچ خوانندہ تا ہراسمنٹ و پروفائلنگ نا بر خلاف توار بڑز کیر تاکن بلوچ خوانندہ غاک دا خُلیس نا ماحول آن پیشتمسہ تینا خواننگ ءِ برجاء تخنگ کیر۔