پاکستانی لشکر کراچی، کوئٹہ و خاران آن پنچ ورنا ءِ دزگیر کننگ آن گڈ نادرست آ جاگہ غا تیا سر کرینے۔
بیگواہ مروک ورنا تا چاہنداری چاکر ہند بلیدہ کیچ، فیصل ولد رمضان محمد شہی ہند کوئٹہ، جابر یلانزئی ولد پذیر احمد ہند خاران،نجیب اللہ یلانزئی ولد محمد حسین ہند خاران شفقت یلانزئی ولد عبدالرحیم نا پن تیٹ مسنے۔
حوال تا رد ئٹ پاکستانی لشکر چاکر ءِ کراچی آن زوراکی ئٹ بیگواہ کرینے، پن کروک ورنا تینا لُمہ نا دارو درمان نا رِد ئٹ کراچی ٹیئس۔
ایلو پارہ غا کوئٹہ آن حوال ارے کہ میٹرک نا خوانندہ فیصل ءِ سیزل روڈ کلی ترخہ رئیسانی خلق کوئٹہ آن تدوکا نن پاکستانی لشکردزگیر کریسہ بیگواہ کرینے، ہراڑان گڈ اونا بارو ئٹ ہچ سماء اف کہ او ہراڑے و انت حالیت ئٹی ءِ۔
اندن ایلو پارہ غا بلوچستان نا ضلع خاران ٹی تدوکا نن پاکستانی لشکر مُسہ ورنا ءِ دزگیر کریسہ نادرست ءُ جاگہ سے آ درینے۔
بیگواہ مروک ورنا تا چاہنداری جابر یلانزئی ولد پذیر احمد، نجیب اللہ یلانزئی ولد محمد حسین و شفقت یلانزئی ولد عبدالرحیم نا پن تیٹمسنے۔
حوال تا رد ئٹ فورسز کارندہ غاک تدوکا نن خاران ئٹی اسہ ہوٹل اسیٹ تولوک مُسہ ورنا نا پد رند ءِ کریسہ پن کروک ورنا تا پیشنپیشتمنگ آن گڈ اوفتا اُرا تا خڑک اوفتے دزگیر کریسہ نادرست جاگہ آ درینو۔
بیگواہ مروکا ورنا تا خاہوت آک پولیس تھانہ ٹی رپورٹ کریسہ کمشنر رخشان و ایلو کوالخواہ تیان اوفتا یلہ مننگ نا خواست ءِ کرینو۔
یاتی مرے کہ زوراکی نا بیگواہی تا تدینیک ہڑدے نا بنیات آ رپورٹ مریسہ ءُ، تدوکا دے ماما قدیر تینا اسہ بیان اسیٹ پاریسس کہ تدوکاتُو ئنا 26 تاریخ آ کراچی آن اِرا ورنا ءِ ڈھکوک ادارہ آتا کارندہ غاک بیگواہ کرینو، ہرافتا خاہوت آک دا ہیت ءِ پک کرینو، اوفتیان اسٹ ناپن گلشاد ولد دلوش و ارٹمی سراج ولد اصغر ءِ، ہڑتوم آک خوانندہ ءُ، اگہ اوفک ڈوہ ئس کرینو گڑا اوفتے عدالت ئٹ ہتنگ مرے۔