اسہ سال ئس مُست زوراکی ئٹ بیگواہ مروک جاوید شمس یلہ متو، بیگواہ مروک بندغ نا ہیڑ وائس فار بلوچ مسنگ پرسنز نا کیمپ آ بریسہ تینا ایلم نا یلہ مننگ نا خواست کرے۔
پاکستانی لشکر نا دو آن 31 اگست 2021 نا نن بلوچستان نا بنجائی شار کوئٹہ آن زوراکی ئٹ بیگواہ مروک جاوید شمس نا ہیڑ ئنا پاننگ ئس کہ کنا ایلم ءِ 31 اگست 2021 نا نن کیچی بیگ ئٹ اُرا غان فورسز دزگیر کریسہ نادرست جاگہ آ درے ہرا داسکان بیگواہ ءِ۔
او پارے کہ ایلم نا یلہ مننگ کن کنا لُمہ باوہ کمیشن نا مونا ہنیسہ کرینو واہم ایلم داسکان یلہ مننگ اف۔
او پارے کہ اگہ کنا ایلم قانود نا بر خلاف کاریم ئس کرینے گڑا اودے قانود نا رد ئٹ سزا تننگے تاکن کنا لُمہ باوہ ءِ انتظار نا ڈکھ و اذیت آن ایسری رسینگہ، دا وڑ اودے گم و گار کننگ کنتون و خاہوت تون بھلو ناانصافی ئسے۔
او تینا ایلم نا یلہ مننگ کن بندغی حق آتا ادارہ تیان خواست کرینے کہ او ایلم نا یلہ مننگ ئٹ کڑد ایسری ایتر تانکہ ننے دا اذیت ان ایسری رسینگہ۔