ایمنسٹی انٹرنیشنل ایران مغربی بلوچستان نا ہفت سالہ چُنا ہستی ناروئی نا خون نا مذمت کریسہ پارے کہ ایران نا بلوچ اقلیت آن تعلق تخوک ہفت سالہ ہستی ناروئی ءِ زاہدان ٹی ایرانی فورسز کارندہ آک مرگ نا گواچی کرینو ۔
مغربی بلوچستان ٹی برانز آتا لڑ بلوچستان نا علاقہ چابہار ٹی ایرانی فورسز نا اسہ اعلیٰ آفیسر کمانڈر کرنل ابراہیم کوچکزئی آ اسہ چُنک سن چُنا ءِ سر و سوج کننگ نا پِن آ دزگیر کریسہ اوڑتون گمانی ردئٹ جنسی زیاتی نا گواچی کننگ نا دوبہ آن گُڈ بناء کننگاسس ۔
ایمنسٹی انٹرنیشنل مغربی بلوچستان نا علاقہ زاہدان ٹی 30 ستمبر آ مروک تدینی نا بابت تینا اسہ شابیت حوال اسیٹ دعویٰ کرینے کہ دا وخت آ بے دادی تدینی تا نیام ئٹ 82 بندغ مرگ نا گواچی مسُنو ۔
ایمنسٹی انٹرنیشنل نا ردئٹ ایرانی بلوچستان ٹی 30 ستمبر جمعہ نماز نا وخت اہل سنت نا مسجد ٹی ایرانی فورسز نا سُم کاری آن 66 بندغ مرگ نا گواچی و سد آتا کچ ٹپی مسُر ۔ اوکان گُڈ وار وار برانز آک و اوفتا سیکورٹی فورسز کارندہ آتا کریک ڈاؤن نا سوب زیات 16 بندغ مرگ نا گواچی مسُنو ۔
یاتی مرے کہ مغربی بلوچستان نا علاقہ سراوان ٹی ایرانی انٹیلیجنس کارندہ آتا سُم کاری آن 8 سالہ مونا نقیب بلوچ نا مرگ نا گواچی کننگ نا تدینی ہم مونا بسس ۔
حوال تِروک ادارہ ایرانی انٹرنیشنل نا شابیت حوال تا ردئٹ 23اکتوبر ن دے مغربی بلوچستان ٹی ہشت سالہ مونا نقیب بلوچ ءِ ہمو وخت ایرانی انٹیلیجنس نا کارندہ آک سُم کاری کریسہ کسفیسُر ہرا وخت او و اونا ایڑ اسہ اُلاخ ٹی اسکول آ ہِننگ ئسُر ۔