جوش صاحب پاریسس کہ “ہرا بولی اِرغ تتو او کہوئے۔” دا توار ئس بھارت نا پنی آ صحافی سعید نقوی نا ہرا ویڈیو لنک نا کمک ئٹپاکستان ٹی صحافت نا زی آ مروک اسہ دیوان اسیٹ ساڑی ئس۔
“اردو صحافت نا دو سد سال” نا سرحال آ دا دیوان کراچی ٹی برجاء پانزدمیکو جہانی اردو کانفرنس نا ارٹمیکو دے آ مروک ایلونشست آتیٹ اوار ئس۔
دیوان نا تران کروک آتیٹ ہڑدے ئی ‘جنگ‘ نا مسکوہی مدیر محمود شام، سینئر صحافی مظہر عباس، نوشتکار و تجزیہ کار سہیل وڑائچاندن بھارت آن نوشتکار و جہانی بندغ تا انٹرویو تیان پنی مروک سعید نقوی اوار ئسر۔ بنجائی اردو یونیورسٹی نا شعبہ ابلاغ عامہ نامسکوہی کماش ڈاکٹر توصیف احمد خان دا دیوان نا کماشی ءِ کننگ ئس۔
ہال ئٹ ورنا تا بھلو کچ اس ساڑی ئس۔ صحافت نا باروٹ ہیت کننگ نا سوب آن دا پڑ نا کہی استاد و خوانندہ غاک ہم اوار ئسر۔
پینٹ کوٹ و شلوار قمیص
سعید نقوی بھارت ٹی اردو نا حالیت نا باروٹ پنی آ شاعر جوش ملیح آبادی نا دا بند ءِ پارے کہ “ہرا بولی اِرغ تتو او کہوئے۔“
او پارے کہ اردو صحافت بھارت ٹی کم مننگ ءِ اندن ایلو بولی تا اخبار تا تالانی ٹی ودکی مسونے۔
مظہر عباس نا پاننگ ئس کہ پاکستان ئٹ بنائی دے تیٹ اردو و انگریزی اخبار تا جاگہ گچین کننگاسس۔ پاکستان ئٹ صحافت نا مؤرخضمیر نیازی تینا کتاب ‘پریس ان چینز‘ ئٹ نوشتہ کرے کہ پاکستان آن امریکہ نا اولیکو سرکاری دورہ کن انگریزی اخبار نا ہراصحافی تے دروئی ئس اوفتے کن پینٹ کوٹ اردو نا صحافی تیکن شلوار قمیص موغفنگاسس۔ اونا پاننگ ئس کہ انداکان اردو صحافتنا جاگہ گچین کننگاسس۔
اونا پاننگ ئس کہ ریاست نا ہر وخت پالیسی مسونے کہ اردو صحافت ءِ وس ئٹ تخنگ مرے و اگہ کس مزاہمت کرے ہم تو انت دا اخبارآتون مسونے او تاریخ نا بشخ ئسے۔
ایڈیٹر ہرادے؟
پاکستان ئٹ ہراتم صحافت نا زی آ مروک اسہ دیوان ئسے ٹی ہننگ نا موقع رسینگا تو اسہ نہ اسہ دروشم اسیٹ دا سوج الّم شرہ ٹیخننگانے کہ صحافت ئٹ پروفیشنل ایڈیٹر نا مننگ انتئے اودیم مننگ ءِ؟
دیوان نا کماشی کروک ڈاکٹر توصیف نا ایلو سوج اندا ئس ہرانا ورندی ٹی جنگ نا مسکوہی مدیر محمود شام پارے کہ ہراتم آن مالکآک ایڈیٹر انچیف جوڑ مسر ہموتم اخبار آتیٹ ایڈیٹر نا ادارہ ہم تینا معنہ آن نیست مریسہ ہنا۔
سعید نقوی نا پاننگ ئس کہ ہیت داسا ایڈیٹر آتیان ہنیسہ رپورٹر اسکان بسونے و اونا کڑدار ہم اودیم مریسہ ءِ۔
‘لٹ بدل مریک گڑا پالیسی بدل مریک‘
مظہر عباس نا پاننگ ئس کہ ہراتم سیاسی ٹولی یا اسہ ادارہ ئسے نا پریس ریلیز ‘اسٹاف رپورٹر‘ نا پن ئٹ شینک مننگ بناء کرے گڑارپورٹنگ نا معیار تمنگ ءِ بناء کرے۔ او پارے کہ میڈیا نا باروٹ رویہ بدل مفک بس لٹ بدل مریک گڑا پالیسی بدل مریک۔
محمود شاہ نا دا نا زی آ پاننگ ئس کہ داسا رپورٹر تینا خوانوک آن زیات تینا بیٹ اتون ایماندار مسونے۔ اسہ حکومتی ادارہ سے ناباروٹ رپورٹنگ کریسہ اونا مسخت حوال ءِ خوانوک اسکان سر کننگ نا مفک بلکن اونا ہمدردیک ہمو محکمہ یا ادارہ تون مریرہ۔
لسبیلہ نا حوال اسلام آباد آن
سعید نقوی پارے کہ بھارت ٹی بھاز کم اندنو ادارہ ارے ہرا اسہ جہانی ویل ئسے نا کوریج کن تینا بندغ تے ہمو ملک و علاقہ ٹیگداریر۔ ایران و اوغانستان کونا ملک آتیٹ بھلا بھلا میڈیا گروپ آک تینا بندغ تے رپورٹنگ کن رادہ کپسہ۔ سری لنکا نا برجاء نیستی نامثیل ءِ تریسہ او پارے کہ ہرا ملک اسکان پینتالیس منٹ ئٹی فلائٹ سر مریک ہمو نا حوال تے ننا میڈیا حوال سر کروک ادارہ تیان ایتک۔
اونا پاننگ ئس کہ جہان ئٹ ہمو ملک آک راہشونی کیرہ ہرا جہان ءِ تینا نظر ئٹ اوریرہ۔ میڈیا خواجہ آتون مڈی نا کمبوتی اف۔ اگہ اواسہ ہم جہانی ویل ئسے آ تینا رپورٹر تے اوڑے رادہ کیر گڑا تینا خن تیٹ حالیت آتے سرپد مننگ ئٹ کمک رسینگو۔
حوال سر کروک ادارہ تیا باور کننگ نا باروٹ محمود شام اسہ جوانو کسہ ئس بنفے۔ او پارے کہ ہفتاد نا دہائی ٹی سر وزیر ذوالفقارعلی بھٹو نا بلوچستان نا ضلع لسبیلہ ٹی جام غلام قادر خان آف لسبیلہ تون اسہ شرہ ئس مس ہراڑان گڈ بھلو غاو مس۔ دا حوال ءِرپورٹ کننگ کن بی بی سی نا نمائندہ اسلام آباد آن لسبیلہ آ بس و او ہرا حوال ءِ تس گڑا او ایلو دے جنگ ئنا موکش ئس۔
ہمرو چاگڑد ئس ہمونو کالم
پاکستان ئٹ اردو صحافت آ مروک اسہ ہیت ئس کالم نگاری آن بیدس مونا ہنتو۔ توصیف احمد خان کالم نگار سہیل وڑائچ آن سوج کرےکہ پاکستان نا اردو کالم آک انتئے جہانی معیار تون مون تننگ کپسہ و اوفتیٹ بھاز آک ذاتی اختئی تا گواچی مریرہ۔
دا نا ورندی ٹی سہیل وڑائچ پارے کہ گواچن ئٹ کالم دا خاطران اف کہ اوٹی ذاتی اختئی تے درشان کننگے ولے او سرپد مریرہ کہ کالمنگاری پاکستان نا سیاسی و چاگڑدی الس نا خیال تے تالان کننگ ئٹ اہم ءُ کڑد ئس ایسری تسونے۔ معیار یخین ئٹ جوان مننگ کیک ولےمعیار نا تعلقداری چاگڑد آن ہم ارے۔ پاکستان ئٹ ہرا فکر نا معیار ءِ ہمو کالم نگاری نا ہم ارے۔
محمود شام پارے کہ کالم نگار تا اہمیت جنرل ضیاالحق نا وخت ئٹ ودفنگا۔ مالو ایڈیٹر کالم نگار تون حوالکاری نا ذریعہ مسکہ ولےجنرل ضیاء کالم نگار آتون سیدھا اوڑدئی و صلہ کریسہ نیام آن ایڈیٹر ءِ کشا اندا سوب آن کالم نگار آتیا ایڈیٹوریل طاغت ہم نزور مس۔
مگہ صحافت نا اسہ مسخت ئس مروئی ءِ؟
ڈاکٹر توصیف نا دا سوج آ کہ مگہ صحافت نا اسہ مسخت ئس مروئی ءِ؟ سہیل ورائچ نا پاننگ ئس کہ صحافت نا بیرہ اسہ مسختئسے کہ بندغ آتے اسکان حوال سر کے داڑان بیدس میڈیا نا ہمرو کاریم اس مرے او بیکار مرو۔
اِرا اداریہ
مسخت نا سوج آ مظہر عباس نا پاننگ ئس کہ مالو صحافت نادرست مسکہ داسا صحافی نادرست مریک اگہ نی مسخت آن پدیمسس گڑا نی ہم نادرست مروس۔ اگہ کس ئسے نا اسہ مسخت ئسے گڑا اودے ‘ڈیکلیئر‘ کریسہ صحافت کے ہرا وڑ دا درشان ءِ کہ‘روزنامہ جسارت‘ جماعت اسلامی نا ترجمان ءِ یا اسہ وخت ئسے ٹی ‘روزنامہ مساوات‘ پیپلز پارٹی نا ترجمان ئس۔
او پارے کہ ہراتم میڈیا حکومت ءِ اوریسہ تینا مسخت ءِ جوڑک گڑا نسخان ارفک۔ او تینا خواننگ نا وخت ئنا کسہ ئس بنفے کہیونیورسٹی ٹی لیکچر کن روزنامہ جنگ نا مدیر محمود مدنی بس گڑا او سوج کریسس اوڑان کہ چار جولائی 1977 آ ہراتم اودے حوالرسینگاسس کہ ملک ئٹ مارشل لاء بننگ ءِ گڑا او انت اداریہ نوشتہ کریسس۔
مظہر عباس پارے کہ دا نا ورندی ٹی محمود مدنی پارے کہ ہمو دے آ اِرا اداریہ نوشتہ کننگاسر۔ اسٹ ئٹ مارشل لاء ءِ بخیرٹ کننگاسسو ایلو ٹی حکومت نا صفت ئس۔
صحافت لبرل مسونے
ڈاکٹر توصیف احمد خان ساڑی مروک آتیان سوج کرے کہ اردو صحافت آن اسہ دوبہ دا ہم ارے کہ او چاگڑد ئٹ رجعت پسندی ءِ تالانکرینے؟
داڑا سہیل وڑائچ نا پاننگ ئس کہ دا حالیت مالو ئس۔ مالو ادارتی پنہ تیا راستیکو و چپ دو نا نوشتہ کروک آتیٹ راستیکو دو ئنا کچکُبین مسکہ ولے وخت اتون اوار اوار صحافت زیات لبرل مسونے۔
گڈ سر ئٹ دو سد سال
دیوان نا گڈ سر ئٹ سوج اونا سرحال نا باروٹ ئس کہ دا دو سد سال ئٹ اردو صحافت انت گوہا و انت دوئی کرے؟
دا سوج نا ورندی ٹی سہیل وڑائچ نا پاننگ ئس کہ پاکستان نا تاریخ ئٹ سیاست و صحافت تون تفوک بندغ آک قربانی تسنو سیاستدان تے پاہو تریسہ خون کننگانے و اندا وڑ صحافیک وخت ئس کوڑہ کنگنو و وخت ئس اوفتا توار ءِ چُپ کرفنگک۔
اردو نا اولیکو اخبار ‘جامِ جہاں نما‘ نا شینکاری 1822 ٹی مسوسس و اندا رد ئٹ 2022 آ اردو صحافت نا دو سد سال ایسر مس۔
کراچی ٹی برجاء پانزدہمیکو اردو کانفرنس چار دسمبر اسکان برجاء ءِ۔ داسکان دا کانفرنس ئٹ بولی و ادب نا زی آ ہیت کننگ نا نشستآتیان بیدس قوالی، مشاعرہ و پِنی آ ادیب آتون خاص نشست آتون اوار کہی دیوان آک مسنو و کہیک مننگ ءُ۔