پنی آ تعلیمی جہد کار و استاد شہید سر زاہد آسکانی نا ہشتمی برسی نا وخت آ دی اوئیسس اسکول گوادر نا کماشی ٹی مجلس ئسہڈ تننگا۔
مجلس ئٹ تران کریسہ بندغ آک پنی آ تعلیمی جہد کار شہید سر زاہد آسکانی نا زند ئنا حالیت و تعلیمی باروٹ اونا کڑد آ ہیت کریسہپاریر کہ شہید سر زاہد آسکانی 2 جنوری 1979 آ مکران نا ضلع پنجگور نا تحصیل پروم ئٹ خواجہ حیدر بلوچ نا اُرا ٹی ودیمسوسس، تینا بنائی خواننگ ءِ میٹرک اسکان پنجگور نا ہائی اسکول ئٹ ایسر کننگ آن گڈ ڈگری کالج پنجگور آن ایف ایس سی کرے وپدا بلوچستان نا بنجائی شار کوئٹہ ٹی بلوچستان یونیورسٹی آن ایم اے کرے۔
او خواننگ آن فارغ مننگ آن گڈ مکران نا ضلع گوادر ءِ ارفے و داڑے دی اوئیسس اسکول گوادر نا بنماس ءِ تخیسہ علاقہ نا ورنا تیکنخواننگ نا کسر ءِ ملا، ہراتم گوادر شار ئٹ ایکڑ آتا پوریا تینا بڑزی آ ئس بندغ آک مُر ئنا علاقہ آتیان گوادر آ دا خاطر آن مون کریرہ کہاو داڑے ڈغار نا پوریا کیر ولے شہید سر زاہد آسکانی خواننگ نا نیستی ءِ مُر کننگ کن علمی درسگاہ نا بنیات ءِ تخیسہ دا کلہو تس کہدیمروئی کن خواننگ ءِ سلاء جوڑ کریسہ مونی بروئی تمو نہ تو ایلو دیمروئی تیٹ نن تینا کڑد ءِ ایسری تننگ نا لائخ مننگ کپرون۔
اوفک پاریر کہ گوادر ئٹ اینو شہید سر زاہد آسکانی نا خواری و گواچن مہر نا سوب آن دی اوئیسس اسکول گوادر آن فارغ مروک مار ومسڑ خوانندہ غاک چاگڑد ئٹ جتا پڑ تیا تینا ذمہ واری تے ایسری تننگ ءُ ہرافتیٹ پروفیسر، ڈاکٹر و ایلو تپہ تیٹ خذمت سر تننگ ءُ، اندناینو گوادر ٹی دی اوئیسس اسکول گوادر اسہ بھلو رخت ئس جوڑ مریسہ مونا بسنے و داڑے نا تعلیمی دیمروئی ٹی شہید سر زاہدآسکانی نا پِن جوان انگا لوز آتیٹ یات تخنگو، اینو دی اوئیسس اسکول گوادر نا پنچ کیمپس ساڑی ءُ ہراڑے گوادر نا ہزار آ مسڑ و مارخوانندہ غاک خواننگ ءِ دوئی کننگ ئٹ اختہ ءُ۔
ساڑی مروک بندغ آتون تران کروک آک پاریر کہ ننے اومیت ءِ کہ دی اوئیسس اسکول نا مسڑ و مار خوانندہ غاک و گوادر نا ورناکخواننگ ئٹ اختہ مریسہ جوانو جاگہ اس دوئی کرور، شہید سر زاہد آسکانی تینا ساہ ءِ تعلیمی جہد ئکن قربان کرے، خواننگ ئٹ پرامنءُ چاگڑد ئس جوڑ مننگ کیک و پرامن چاگڑد آک دیمروئی نا مزل تے سر مننگ کیرہ، شہید سر زاہد آسکانی ءِ اونا تعلیمی درسگاہ نا درآ شہید کریسہ علم دژمن آک گوادر ءِ تارمئی ٹی دِھکہ تننگ خواہار ولے اوفتے پشیمانی تون مون تروئی تما و اینو ہزار آتا کچ ئٹ شہیدسر زاہد آسکانی تینا پد ئٹ شاگرد الانے و اونا مشن برجاء ءِ ہرا دا ہیت ئنا دلیل ءِ کہ او زندہ ءِ، چاگڑد ئٹ دا جاگہ اودے خواننگ ناسوب آن رسینگانے اندا سوب آن ورناک خواننگ ءِ تینا پجار جوڑ کریسہ مونی کار اندا چار دسمبر نا کلہو ءِ و اندا پوسکن سوغند نا دےءِ کہ نن خواننگ تون تفوک مرین۔
مجلس ئٹ ڈی ڈی او گوادر وہاب مجید، گوادر ڈگری کالج نا لیکچرار عبدالقدیر بلوچ، امداداللہ بلوچ، گوادر پرائمری اسکول نا سروکناصر رحیم سہرابی، پنی آ آزمانکار و نوشتکار اسلم تگرانی، پرائیویٹ اسکول ایسوسی ایشن گوادر نا کماش عبدالطیف شاہ، پنی آچاگڑدی راہشون نصیر احمد نگوری، بلوچی بولی نا ایم فل اسکالر فدا موسی، دی اوئیسس اسکول گوادر نا استاد آک چاکر بابو، میڈمماہ گنج، میڈم نزرانہ، ڈاکٹر حیمینہ بلوچ، و دی اوئیسس اسکول گوادر نا مسڑ، مار خوانندہ غاک ہم شہید سر زاہد آسکانی ءِ دروت ندرکننگ کن تینا جوزہ تا جتاء وڑ ئٹ درشانی کریر اندن دا وخت آ ورنا شئیر پاروک سمیر رحیم و خلیل حسرت تینا جوان انگا توار تیٹشہید سر زاہد آسکانی نا شرف ئٹ شئیر پاریر۔
گڈ سر ئٹ دی اوئیسس اسکول گوادر نا ڈائریکٹر و شہید سر زاہد آسکانی نا ایلم حنیف آسکانی غٹ مہمان تا منتواری کریسہ پارے کہدی اوئیسس اسکول گوادر نا بنیات ءِ شہید سر زاہد آسکانی تخا اینو نن دا ارادہ نا درشانی و پوسکن سوغند کینہ کہ دادے گیشترجوان جوڑ کننگ کن نن گڈیکو دم اسکان جہد کرون و اسہ خوانندہ و شعوری ءُ چاگڑد اس جوڑ کرون۔ مجلس ئٹ دی اوئیسس اسکولگوادر نا خوانندہ تیان بیدس جتاء تپہ تا بندغ آتا بھلو کچ ئس ساڑی ئس۔