بارن و یخ تہوک کراچی آ مون کریر، یخ تہو تیان شار ئٹ یخ ئنا ترندی ٹی ودکی مرو۔
محکمہ مُد ئنا پاننگ ءِ کہ ایلو 24 ساعت ئٹی مُد بارن و یخ مننگ نا گمان ارے، شار ئٹ کم آن کم درجۂ حرارت 10 ڈگری سینٹی گریڈاسکان ہننگ کیک۔ یخ انگا تہو تا سوب آن شار ئنا درجۂ حرارت کم مننگ بناء مسنے، استو ننکان کراچی ٹی کم آن کم درجۂ حرارت 11 ڈگری سینٹی گریڈ ریکارڈ کننگا۔
بروکا 24 ساعت ئٹ کم آن کم درجۂ حرارت 10 ڈگری سینٹی گریڈ اسکان مننگ نا گمان ارے۔
موسمیاتی تجزیہ کار آتا رد ئٹ کراچی ٹی برجاء ہفتہ نن ئنا درجۂ حرارت سنگل ڈیجٹ ئٹ ہننگ کیک، نن ئٹ درجۂ حرارت 7 آن 9 و دےئٹ 23 آن 26 ڈگری سینٹی گریڈ اسکان مننگ نا گمان ارے۔
جاندمی تہوک اینو قطبی بلوچستان ئٹ پیہور، 7 یا 8 جنوری آ اسہ پین جاندمی تہو تا سسٹم اس بلوچستان نا کسر ئٹ ڈیہہ ئٹ بننگنا گمان ارے، 15 جنوری آن گڈ جاندمئ تہو تا سسٹم اسہ وڑ ڈیہہ ئٹ بننگ نا گمان ارے۔
محکمہ مُد ئنا پامداری نا رد ئٹ جاندمی تہوک 6 جنوری آ قطبی بلوچستان ئٹ برور، ہرا ہفتہ نا ایسری وخت آ بڑزیکو علاقہ آتیا زہمتخور، اوفتا رد ئٹ جاندمی و بڑزیکو علاقہ آتیٹ پِر و مش تیا برف تمنگ نا پیشن گوئی کننگانے۔
دا جاندمی تہو تا سوب آن 7 و 8 جنوری آ شال، ژوب، بارکھان، زیارت، نوکنڈی، دالبندین، ہرنائی ، قلعہ سیف اللّٰہ، قلعہ عبداللّٰہ، چمنو پشین ئٹ پِرو قطبی بلوچستان نا مش تیا برف تمنگ نا پین گوئی کننگانے۔
7 آن 9 جنوری پوٹھو ہار، اسلام آباد، مری، گلیات، کشمیر، گلگت بلتستان، چترال، سوات، مالا کنڈ، کوہستان و ایبٹ آباد ئٹ پِر ئناگمان ارے۔ پِر آن درجۂ حرارت ئٹ 5 آن 7 ڈگری سینٹی گریڈ اسکان کمبوتی مننگ کیک۔
محکمہ مُد ئنا رد ئٹ بارانی علاقہ آتیٹ پِر سلوکا کشت و کشار تیکن فائدہ مند مرو، پِر ئنا دے تیٹ مُج کم مرو۔ محکمہ مُد ئنا مشی آعلاقہ آتیٹ برف تمنگ آن اُلاخ آتا ہن و بر ئٹ ہڑاند تمنگ کیک۔ گلگت بلتستان و کشمیر ئٹ لینڈ سلائیڈنگ آن ہن و بر بند مننگ کیک۔
محکمہ مُد پامداری کرینے کہ پِر و برف تمنگ نا وخت آ ذمہ وار محکمہ آک محتاط مریر۔