ایران ئٹ آذربائیجان نا سفارتخانہ غا سم کاری نا تدینی اسیٹ سیکورٹی آفیسر مرگ ئنا گواچی مس۔ پیشن ملکی میڈیا نا رد ئٹ ایراننا بنجائی شار تہران ئٹ آذربائیجان نا سفارتخانہ غا جلہو مسنے، سلاء بند بندغ آتا سم کاری نا سوب آن چیف سیکورٹی آفیسر مرگئنا گواچی اندن اِرا سیکورٹی گارڈز ٹپی مسنو۔
ایرانی پولیس نا پاننگ ءِ کہ آذربائیجان نا سفارتخانہ غا جلہو کروک دوبہ دار آتے دزگیر کننگانے، واہم دوبہ دار آتیان گیشتر سر وسوج برجا ءِ۔ آذربائیجان تہران ئٹ تینا سفارتخانہ غا مروک جلہو نا دوبہ ءِ ایران آ خلیسہ جمعہ غا پڑو کرینے کہ او اوکان تینا عملہ ءِکشینگ ءِ۔
فرانسیسی حوال سر کروک ادارہ اے ایف پی نا رد ئٹ تہران پولیس نا سروک نا پاننگ ءِ کہ جلہو کروک آ بندغ ‘ذاتی‘ سوب آن دنکرینے۔
آذربائیجان نا وزارت خارجہ نا ترجمان ایگزان ہاسیزادہ ہندی میڈیا ءِ پارے کہ جلہو نا غٹ ذمہ واریک ایران آ خلنگرہ۔ او پارے کہ ایرانیمیڈیا ٹی آذربائیجان مخالف برجا مہم ‘جلہو نا اُست بڈی ءِ کرینے۔‘
ترجمان اوکان گڈ ترک ٹی وی ٹی آر ٹی ءِ پارے کہ سفارتخانہ نا عملہ ءِ ‘ایران آن کشنگ اُن۔‘ آذربائیجان نا صدر الہام علیوف چاگڑدیحوالکاری ویب سائٹ ٹوئٹر آ تینا کلہو اسیٹ پارے کہ ‘ای دا دہشت گرد جلہو نا ترند مذمت کیوہ۔‘
داڑان مالو جمعہ غا آذربائیجان نا وزارت خارجہ اسہ بیان اسیٹ پاریسس کہ ‘سلاء بند اسہ بندغ اس سفارتی مشن سیکورٹی سروکءِ مرگ ئنا گواچی کرینے۔‘ بیان ئٹ پاننگانے کہ جلہوکار نا دو آن ٹپی مروک اِرا سیکورٹی کارندہ نا حالیت جوانے و پٹ و پول بناءکننگانے۔
تہران پولیس نا سروک جنرل حسین رحیمی پارے کہ جلہو کار ءِ دزگیر کننگانے و او اسہ ایرانی بندغ ئسے ہرانا برام آذربائیجان نا اسہزالبول ئسے تون مسنے۔
ایران نا وزارت خارجہ نا ترجمان ناصر کنانی پارینے کہ ‘تہران دا سلاء بند جلہو نا مذمت کیک۔ بد بختی آن ہرانا سوب آن اسہ بندغئسے نا مرگ مس۔‘
او پین پارے کہ ‘بنائی پٹ و پول تا رد ئٹ دا ذاتی سوب ئسے۔‘ ایران ئٹ لکھ آ ترک ہیت کروک آ آذربائیجانیک رہینگرہ۔ بھلو وخت ئسےآن تہران نا دوبہ ءِ کہ باکو اوفتا ملک ئٹ آجوئی دوست جوزہ تے بش کننگ ءِ۔ ہڑتوما ملک آتا نیامٹ تعلقداریک دود ئنا وڑ ئٹ خراب مسنوو مسکوہی سوویت و جمہوریہ ایران نا تاریخی دژمن ترکی نا خڑک ءُ سیوت ئسے۔
تہران ءِ دا ہم خُلیس ءِ کہ اسرائیل آذربائیجان نا ڈغار ءِ ایران نا بر خلاف جلہو تیکن کاریم ئٹ ہتنگ کیک۔ اسرائیل باکو ءِ سلاء تروک آبھلا سپلائر ءِ۔
اے پی نا رد ئٹ آذربائیجان نا صدر الہام علیوف اسہ بیان اسیٹ پارے، ‘نن خواست کینہ کہ دا دہشت گرد کاروائی تا پٹ و پول کننگے ودہشت گرد ءِ سزا تننگ مرے۔ سفارتی مسخت مشنز تا بر خلاف دہشت گرد جلہو مننگ نا لائخ اف۔‘