بلوچستان نا ضلع کیچ ئٹ سلاء بند بندغ آتا بھلو کچ اس پاکستانی لشکر نا کیمپ ءِ جلہو ئٹ ٹک کریر و نرار۔
ٹی بی پی ءِ رسینگوک حوال تا رد ئٹ سلاء بند بندغ آتا بھلو کچ اس پاکستانی لشکر نا جتاء چوکی تے جلہو ئٹ ٹک کریر، جلہو کار آکراکٹ و ایلو سلاء تے کاریم ئٹ ہیسر۔
جلہو درو کولواہ نا علاقہ ڈانڈار ئٹ کننگا ہراڑے بنجائی کیمپ ئنا چوکی تے ٹک کننگا۔ علاقائی حوالکار آک پاریر کہ جلہو نا وخت آ ترندسم کاری و تراک آتا توار بِننگ ئٹ بسنے۔
جلہو ئٹ پاکستانی لشکر نا کارندہ تے جانی نسخان ارفنگ نا حوال آک رسینگانو واہم کوالخواہ تا کنڈ آن دائسکان دا بارو ئٹ ہچو ہیتاس مونا بتنے۔
پن کروک جلہو نا ذمہ واری ءِ بلوچ لبریشن آرمی نا ترجمان جیئند بلوچ ارفیسہ پارے کہ بی ایل اے نا سرمچار آک درو کولواہ ٹی کوزہگیر پاکستانی لشکر نا اسہ کیمپ ئسے آ جلہو کریسہ مُسہ دژمن کارندہ ءِ مرگ ئنا گواچی و کیہی تے ٹپی کریر۔
جیئند بلوچ پین پارے کہ بی ایل اے نا سرمچار آک آواران و کیچ ئنا نیامیکو علاقہ کولواہ ڈانڈار ئٹ مادگ نا ہند آ کوزہ گیر پاکستانیلشکر نا کیمپ آ مُسہ پارہ غان جلہو کریر، بیست منٹ اسکان برجا مروک دا جلہو ئٹ سرمچار آک دژمن فوج آ کیہی راکٹ و گرنیڈ لانچرنا گولہ خلکر ہرافتا سوب آن مُسہ دژمن کارندہ جاگہ غا مرگ ئنا گواچی و کیہیک ٹپی مسر اندن کیہی لغور آ دژمن کارندہ غاک تیناسنگر آتیان نرّار۔
ترجمان جیئند بلوچ پارے کہ بلوچ لبریشن آرمی دا جلہو نا ذمہ واری ءِ ارفک۔ کوزہ گیر لشکر نا تیوہ پیش تمنگ اسکان ننا جلہوک ترندیئٹ برجا مرور۔