شیوان ادبی کاروان ڈاک نوشکی نا پارہ غان زبان تا جہانی دے نا رد اٹ شیوان ادبی کاروان نا بنجائی وتاخ ٹی اسہ کچاری ئس بنجائی چیئرمین شیخ عتیق حسرت مینگل نا راہشونی ٹی شام نا پنچ بجہ غا اڈ ہلک۔
مجلس نا گچین آ مہمان راسکوہ ادبی دیوان نا مسکوئی چیئرمین اسسٹنٹ پروفیسر ڈگری کالج نوشکی غلام دستگیر صابر ئسکہ۔ اعزازی مہمان تیٹی براہوئی زبان نا پنی آ شاعر، پام ادبی مجلس نا سرخیل ڈاکٹر عالم عجیب، منیر احمد بادینی کتابجاہ نا کالخواہ وحید عامر بلوچ، بلوچستان نیشنل پارٹی نا راہشون میر خالد خان مینگل ئسک ئسر۔
مجلس نا بنا اللہ رب العزت نا بابرکت آ کلام پاک آن مس، ہرانا سعادت ءِ شعراء شال ادبی تنظیم نا باسک مولانا ضیاء جان صاحب دوئی کرے۔
مجلس اِرا بشخ اٹ تالان ئس، اولیکو بشخ ٹی شیوان ادبی کاروان بلوچستان نا بنجائی دفتر نا افتتاح مس، ہرادے براہوئی زبان نا پنی آ شاعر ڈاکٹر عالم عجیب کرے۔
ارٹمیکو بشخ اٹ، عمران فریق نا پوسکن شینک مروکا کتاب “ اُست ئنا ترک کشکا” نا مون پاشی کننگا و شیوان ادبی کاروان بلوچستان نا وائس چیئرمین حفیظ مینگل نا ایم – فل نا ڈگری نا اعزاز اس۔ عمران فریق نا کتاب آ حفیظ مینگل تبصرہ کرے۔
مجلس آن تران کرسہ وحید عامر شیوان ادبی کاروان نا پوسکنا دفتر نا، عمران فریق نا کتاب نا و حفیظ مینگل نا ڈگری نا مبارکبادی ترسہ، لمئی زبان تا دے نا رد اٹ لمئی زبان تا دے آ اڈ تننگ نا تاریخ آ سرجمی اٹ روشنائی شاغا و داڑتون اوار براہوئی و بلوچی زبان تے مون مستی دننگ آ ادبی تنظیم و الس نا کڑد آ ہیت کرے۔
گڈ سر اٹ پروفیسر غلام دستگیر شیوان نا کل باسک آتے دفتر، عمران فریق نا کتاب و حفیظ مینگل نا ڈگری نا مبارکبادی تس۔ لمئی زبان تا حوالہ اٹ ہیت کرے و عمران فریق نا شاعری آ ہیت کرسہ پارے “ عمران فریق نا شاعری نا سفر نا پاوہ تو اونا اولیکو کتاب ”کِرّو” آن “اُست ئنا ترک کشکا” اسکان باز بلو سفر ئسے، دا اسہ بلو تبدیلی و انقلاب ئسے۔ عمران فریق نا شاعری ٹی ای تشبیہہ، استعارہ، کنایہ، مجاز مرسل، علامت آتا و شعری صنعت آتا ہرا استعمال ءِ خناٹ او باز کم شاعر آتا شاعری ٹی ہرے۔ داڑتون اوار اونا شاعری نا ہرا ایلو صنف آکو دنکہ قطعہ، تروینی، آزاد نظم آتے اُرسہ ای تینا ریسرچ آن دا ہیت ءِ کیوہ کہ بلوچستان ٹی اگہ نظم نا کل شاعر کس ہرے تو او عمران ئے”۔