تدوکا دے تیٹ پاکستانی لشکر نا دو آن زوراکی ئٹ بیگواہی نا گواچی براہوئی بولی نا پنی آ شاعر خواجہ مزمل نا خاہوت بیگواہ بندغ تا یلہ مننگ کن جہد کروک آ گل وائس فار بلوچ مسنگ پرسنز نا راہشون آتون اینو کوئٹہ پریس کلب ئٹ پریس کانفرنس کرے۔
پریس کانفرنس کریسہ خواجہ مزمل نا باوہ حاجی محمد حنیف پارے کہ 26 فروری نا دے قمبرانی روڈ آ ٹہیفوک دکان ئٹ تولوک ئسوٹ کہ سی ٹی ڈی نا کارندہ غاک گاڑی ٹی بسر کنے آن کنا پِن ءِ سوج کریر، پِن ءِ پاننگ آن گڈ کنے گاڑی ٹی تولنگ کن پاریر و ہراتم ای توسٹ گڑا اوفک کنا موبائل ءِ پُلار و پاریر کہ ننے تینا اُرا غا در، ہراتم نن اُرا ءِ سر مسون گڑا ای پاریٹ کہ دادے، ہراڑان گڈ اوفک کنے حکم تسر کہ دڑنگپیس و تینٹ اُرا ٹی پیہار۔
او پارے کہ اوفک اُرا ءِ پٹار ہراتم اوفتے بیدس قانودی ہچو گڑاس رسینگتو گڑا کنا مار ءِ دزگیر کریسہ دریر، ہراڑان گڈ نن علاقہ نا تھانہ غا ہنان تانکہ خواست ایتن کہ سی ٹی ڈی نا کارندہ غاک کنا مار ءِ کنا خنتا مونان ارفیسہ بیگواہ کرینو، ایف آئی آر درج کبو تو پن کروک تھانہ دا پاریسہ ایف آئی آر درج کننگ آن نمن کرے کہ نن فورسز آتا بر خلاف ایف آئی آر درج کننگ کپنہ۔
حنیف قمبرانی کوالخواہ و عدالت آن خواست کرے کہ اوفک اونا مار ئنا یلہ مننگ ئٹ تینا کڑد ءِ سر ایتر۔