پنجاب ئٹ بلوچ خوانندہ تیا مروک ہر وخت جلہوک
ٹی بی پی سرگپ
بیست و ہفت فروری آ قائد اعظم یونیورسٹی اسلام آباد ئٹ پشتون کونسل تون تفوک سد آ خوانندہ غاک یونیورسٹی ٹی خوانوک بلوچ خوانندہ تیا جلہو کریر، ہرا ٹی دئے آن زیات بلوچ خوانندہ ٹپی مسر، ہرافتیٹ کیہی خوانندہ تا کاٹمک بھاز ٹپ مسوسر، ہرا کیہی دے اسکان اسپتال ئٹ دارو درمان مسونو۔
اسلام آباد ئٹ بلوچ خوانندہ تیا دا اولیکو جلہو اف بلکن پنجاب نا جتاء یونیورسٹی تیٹ خوانوک بلوچ خوانندہ تیا بھلو وخت ئسے آن ہر وخت جلہوک مننگ ءُ۔ قائد اعظم یونیورسٹی اسلام آباد نا بست و بند و پولیس بلوچ خوانندہ تیا مروک جلہو ءِ تورتوس، و پنجاب یونیورسٹی لاہور نا سکیورٹی افسر کرنل عبید نا کنڈ آن بلوچ خوانندہ تیا جلہو کن ایلو خوانندہ گل آتے بچ تننگ آن اندا سوب پیشتمنگ کیک کہ بلوچ خوانندہ تیا جلہو آتیٹ گمانی وڑ ئٹ ریاستی ادارہ غاک اوار ءُ و پنجاب نا یونیورسٹی تیٹ بلوچ خوانندہ تیکن ڈغار تنک کننگک۔
ایلو پارہ غا پشتون راہشونک بلوچ خوانندہ تیا مروک جلہو نا مذمت کریسہ سرپنداری نا درشانی کریر و ٹپی آ خوانندہ تیا پاش کریسہ کلہو تسر کہ بلوچ و پشتون راج ءِ دا حالیت آتیٹ سگ ئنا درشانی کروئی تمو و بلوچ خوانندہ تیا جلہو ءِ خوانندہ تا جنگ ئنا جاگہ غا راجی دروشم تننگ مف۔
یونیورسٹی تیٹ خوانندہ گل آتا نیام ئٹ جنگ آک مریرہ ولے بلوچ و پشتون خوانندہ تے سرپنداری نا درشانی کروئی تمو و خوانندہ تا جنگ ءِ بلوچ و پشتون جنگ ئنا دروشم تننگ آن مُر مروئی تمو۔ بلوچستان و پختونخواہ ٹی بلوچ و پشتون راج آک ریاستی بے دادی نا گواچی ءُ اوفتے ہمکوپئی نا درشانی کریسہ ریاستی بے دادی نا بر خلاف اوار جہد کننگ کن گام گیج کننگ نا گرج ءِ۔
ایلو پارہ غا بلوچ راج دوست کڑدہ تا کنڈ آن دا دوبہ خلنگک کہ پنجاب نا یونیورسٹی تیٹ بلوچ خوانندہ تیا جلہوک، اوفتے خُلیفنگ و زوراکی ئٹ بیگواہی تا پد ئٹ گمانی وڑ ئٹ ہمو ڈھکوک تاغت آک اوار ءُ، ہرا بلوچ خوانندہ تا سیاسی کڑد آن اُست کُٹہ ءُ، اندا خاطران او خوانندہ تے جتاء ویل آتیٹ اڑیفنگ نا کوشست کننگ ءُ۔
پنجاب ئٹ بلوچ خوانندہ تیا جلہوک، بلوچ و پنجاب نا نیام ئٹ مُری ءِ پین شابیت کننگ نا سوب جوڑ مننگ کیرہ اندا سوب آن حکومت ءِ دا بلوچ خوانندہ تا رکھ ءِ یخینی جوڑ کروئی تمو۔