حوال تا رد ئٹ کوئٹہ تون اوار تیوہ بلوچستان نا بھاز آ ضلع آتیٹ طوفانی پر آن جتا ویل آتیٹ زالبول مرگ ئنا گواچی و اسہ چناس ٹپیمس اندن تلاف و نالیک پُر مسر۔
گیشتر حوال تا رد ئٹ کوئٹہ تون اوار بلوچستان نا بھاز آ ضلع آتیٹ طوفانی پر آک بھس کاری کریر ہراڑان گڈ پی ڈی ایم اے پامداریتران شینک کرے۔
پنج شمبے نا دے کوئٹہ ٹی ہورہ تون اوار بناء مروک پر تا لڑ نن نیما اسکان برجاہ مس، ترند پر ئنا سوب آن شار ئنا بھلا کسر آک دیرجل جوڑ مسر شیفی پٹی علاقہ آتیٹ نالی تا دیر ارا تیٹ ہنا، اندن بھلا کسر تیا کہی فٹ دیر مچ مننگ آن شاریک سختی تا گواچیمسر۔
ہرنائی ٹی پر ئنا وخت آ اُرا نا چھت تمینگ نا سوب آن زالبول مرگ ئنا گواچی و اسہ چناس ٹپی مس اندن بولان ٹی پنجرہ پل نا ہند آنوکاپ بننگ آن گڈ کوئٹہ نا بھلا کسر کوئٹہ سبی کسر ہن و بر کن بند کننگا۔
قلات، رکھنی، بارکھان، ہرنائی لسبیلہ ، آواران، چمن، نوشکی، حب ، قلعہ عبدللہ، نصیر آباد، سنجادی، و بولان، زیارت ، کان مترزئی ،ٹی ترونگڑ آن بست و بند زیمی مس اندن زیارت ٹی زیات برف تمنگ نا سوب آن چیری و آڑو نا باغ آتے نسخان مس۔
بلوچستان نا سیمی تحصیل ماشکیل ٹی طوفانی تہو تا سوب آن بجلی نا بھلا لائن نا ارا ٹاور تمانو ہرانا سوب آن علاقہ آتیٹ بجلی بندمس۔
اینو جمعہ نا دے ہرنائی، زیارت ، کوئٹہ، سبی، نصیر آباد، ڈیرہ بگٹی ، مستونگ، پشین، قلعہ عبد الله، بولان، قلعہ سیف الله لورالائی،ماشکیل، ژوب، شیرانی، بارکھان، کو بلو ئٹ ہورہ تون اوار پر ئنا گمان ہم ارے ، ہرانا سوب آن نوکاپ نا حالیت ودی مننگ کیک۔
گیشتر حوال تا رد ئٹ محکمہ مد دا وخت تیوہ تعلقدار ادارہ آتے الرٹ نا پنت تس محکمہ پی ڈی ایم اے نا پارہ غان کنٹرول روم نا ذریعتئٹ حالیت آ پامداری کننگے۔
ڈی جی پی ڈی ایم اے پارے کہ پر و ترونگڑ آن زیمی مروک علاقہ آتیٹ ہیوی مشینری و کاریم کروک آک ساڑی ءُ اندن سروزیر بلوچستانمیر عبدالقدوس بزنجو کوئٹہ و ایلو علاقہ آتیٹ برجاہ پر تے اریسہ تیوہ تعلقدار ادارہ آتے خیال ئٹی مننگ نا پنت تس۔
او پین پنت کرے کہ پی ڈی ایم اے ، کیو ایم سی و ڈپٹی کمشنر تینا ہلہلہی ٹولی تے تیار تخیر و لس مخلوق ہم مد ئنا حالیت نا ردئٹالمی خیالداری گامک ارفیر۔