ودار | ہیمنگوے – سعدیہ بلوچ

الّمی خوانبو

ودار

نوشت: ہیمنگوے ( امریکہ)

مٹ : سعدیہ بلوچ

دی بلوچستان پوسٹ

او کوٹی نا دریچہ آتے بند کننگ کن بسک، او وخت نن بسترہ آ ئسون و ای خناٹ کہ او ناجوڑ خننگاکہ، او لڑزنگ ئس، اونا دروشم پیہُنمسس، و او مدان مدان چرینگ ئس اندن کہ ہر گام آ اودے دڑد مسکہ۔

شاز، انت ویل اس ارے انت ؟

کنا کاٹم ئٹ خڷ کننگے۔

نیکن بسترہ آ مننگ جوان مرو

نہ، ای جوان اُٹ۔

نی ہِن بسترہ آ خاچ، ای پُچ بینیو نے اُریوہ۔

ولے ہرا وخت ای شیف ہناٹ او مالو آن پُچ بینوک خاخر دان نا ماس آ تولوک ئس، او نوہ سال نا بھاز ناجوڑ و ڈُکھی ءُ مار اس خننگاکہ۔

ہراتم ای اونا پیشانی آ دُو تخاٹ گڑا کنے سماء تما کہ اودے ہِڷ مسونے۔

نی تینا بسترہ آ ہِن، نی ناجوڑ اُسای اودے پاریٹ ۔

ای جوان اُٹاو ورندی تس ۔

ہراتم ڈاکٹر بس گڑا مار نا ہِڷ ءِ ہُرا۔

اخس ءِ؟ای ہرفیٹ۔

اسہ سد دہ۔

شیف آ بریسہ ڈاکٹر مُسہ جتاء دارو جتاء رنگ ئنا کیپسول تے مار ءِ تننگ کن تس۔ اسٹ اس ہڷ ءِ کم کننگ کن، ارٹمیکو جلاب ہترنگ کن،و مسٹمیکو تیزابیت ءِ ایسر کننگ کن۔ کُھلہ نا جراثیمک بیرہ تیزابیت ٹی زندہ مننگ کیرہ، او شابیت حوال تریسہ پارے۔ اندن لگاکہ کہاودے کھلہ نا باروٹ بھاز چاہنداری ئس۔ او پارے کہ اسہ ہڷ اسہ سد چار ڈگری آن بڑز متو گڑا گڑتی نا ہچو ہیت اس اف۔ دا نزلہ ناچُنکو دین اس ئسک۔ اگہ نم نمونیہ آن رکھ کیرے گڑا ہچو خُلیس نا ہیت اس اف۔

مار ئنا کوٹی ٹی پدا ہنیسہ ای اونا ہڷ ئنا کچ ءِ نوشتہ کریٹ و جتاء کیپسول تے تننگ نا وخت ءِ ہم نوشت کریٹ۔

ای نے گِڑاس خوانیسہ بنفیو ؟

بھاز جوان، اگہ نی خواسہ گڑا۔مار ورندی تریسہ پارے۔

اونا دروشم بھاز پیہُن مریسہ ئس و خنتا شیفک مون مننگ ئسر۔ او بسترہ آ لیٹوک ئس و اندن گمان مسکہ دنکہ او دامون ایمون آناسُل بے سماء ءِ۔

ای ہاورڈ پائلز نا کتاببحری قزاقآن ترند توار ئٹ خواننگ ءِ بناء کریٹ، ولے ای ہُننگ ئسوٹ کہ ہرافتے ای خواننگ ئسوٹ او اسُلبِننگ الو۔

نی امر محسوس کننگ اُس، شاز ؟ ای اوڑان سوج کریٹ۔

مالو آنباراو ورندی تس۔

ای بسترہ نا کرّک آ تولوک چُپی ئٹ کتاب خواننگ و ارٹمیکو کیپسول نا وخت ئنا ودار ءِ کننگ ئسوٹ۔ اوڑکن خاچنگ اسُل قدرتی ئس، ولےہراتم ای اونا پارہ غا ہُراٹ او بسترہ نا کرّک آ ہُننگ ئس، بھاز گوڑیفنگوک خننگاکہ۔

نی خاچنگ نا انتئے کوشست کپیسہ ؟

ای نے دارو تِننگ کن بش کروٹ۔

ای اندن تولنگ دوست کیوہ۔

منہ ساعت آن گُڈ کنے پارےباوہ، اگہ نیکن سخت ءِ گڑا نا داڑے کنتون اوار تولنگ المی اف۔

نہ دا کنکن اسُل سخت اف ۔

نہ، کنا مطلب ءِ، اگہ نیکن سخت ءِ گڑا نی تولپہ۔

ای سوچاٹ، بلکن او نیمہ تنگان ءِ ہمو خاطران اودے یانزدہ بجہ آ کیپسول کنفیٹ منہ ساعت کن پیشن پیشتماٹ۔ او اسہ روشن وگروشک تروک ءُ دے اس ئسک۔ ڈغار آ تموک پیڑاپ آک ہرا یخ آن تفیسہ اندن لگارہ دنکہ تیوہ لوچ درخت، پاٹ، و کُل بئے تے و لوچ آ ڈغارءِ برف ئٹ ڈھکنگے۔ ای دیخہ چرینگ کن ورنا آئرش سیکٹر ( کچک آتا اسہ زنک اس ) ءِ ارفیسہ اسہ یخ آن تفوکو چسمہ نا دیر ئسے ناپارہ غا ہناٹ ولے دا دیر شیشہ آنبار انگا برف نا زی آ سلنگ یا چرینگ بھاز سخت ئس۔ خیسن آ کچک لغوشت ہلک و ای اِرا وار تماٹ۔اسہ وار تو کنا توفک تمیسہ برف آ مُر اسکان لغوشت کرے۔

نن اسہ ککوْ آتا مُچی ئسے ہرا مش تا اسہ ڈھیر ئسے ٹی اندا پاٹ تیٹ ڈھکوک ئس ہرا شیف آن بڑز اسکان لڑارہ، بال تسون۔ منہدرخت آتیٹ خننگار، ایلوفک تالان مسر۔

ای اوفتیان ارٹ ءِ ہمو وخت خلکٹ بٹیٹ ہراتم او تالان مریسہ مش ئنا پیشن ئٹ اودیم مننگ ئسر۔ و اوفتے بال تننگ کن کہی وار برف ئٹڈھکوک ڈِک آتیٹ لگوئی تما، ہرانا سوب آن اوفتے خلنگ بھاز سخت ئس۔ ای ارٹ خلکٹ و پنچ گدریفیٹ۔ ولے خوشی خوشی پدا مسون کہاُرا نا داخس خڑک ککوْ آک ساڑی ءُ ہرافتے ہراتم مس ٹِک کننگ کینہ۔

اُرا ءِ رسینگیسہ سماء تما کہ مار ہر اسٹ ءِ تینا کوٹی ٹی ہننگ آن تورینے۔نم تہٹی بننگ کپیرے، نمے ہم او مف ہرا کنے مسونے۔ ماراوفتے پاریسس۔ ای زی آ اونا خڑک آ بسوٹ و اودے ہمو حالیت ئٹ خناٹ ہرا ٹی اودے مالو الاسٹ۔ پیہن آ دروشم ولے کلک آک ہِڷ آنخیسڑینگوک و اندا وڑ بسترہ نا کرّک آ خنک خلوک۔

ای اونا ہڷ ئنا کچ ءِ ہُراٹ۔

اخس ءِ ؟

سد نا کچای پاریٹ۔ ہڷ ئنا کچ اسہ سد ارٹ آن دیخہ بڑز ئس۔

دا اسہ سد و ارٹ ئس۔

دیر پارے؟

ڈاکٹر پارے۔

نا ہڷ ئنا کچ اسُل جوان ءِ، فریشان مننگ نا ہچو ہیت اس اف۔

سوچ خلپہ، جارات ئٹ مر۔

ای جارات ئٹی اٹاو پارے و سیدھا ہُننگ ءِ بناء کرے۔ او یخین ئٹ اسہ ہیت اس تینا تہٹی سوگوْی ئٹ تفیسس۔

دا دیر تیان ہڷ۔

نا انت خیال ءِ دانا سواد اس مرو۔

ہئو، دا سواد ایتو۔

ای توسٹ بحری قزاق والا کتاب ءِ ملاٹ۔ و خوانیسہ کریٹ۔ ولے ای ہُننگ ئسوٹ کہ او بِننگ اف، ای خواننگ ءِ  بس کریٹ۔

ای نا خیال ئٹ ہراتم کہوٹ؟او سوج کرے۔

انت ؟

کنا کہنگ ئٹ اخس وخت رہینگانے۔

نی کہنگ افیس ، انت ویل ئسے ؟

جی ہئو، ای کہنگ اٹ، ای تینٹ اودے اسہ سد ارٹ پاریسہ بنگونٹ۔

اسٹ اس ہم اسہ سد ارٹ درجہ نا ہِڷ آن کسپک، دا چادی گری ءُ سوچ ئسے۔

کنے سماء ءِ، اوڑان بندغ آک کہیرہ۔ فرانس ٹی کنے مارکوک پاریسر کہ چِل و چار ڈگری آ اسٹ اس ہم زندہ رہینگپک۔ کنا تو اسہ سدارٹ ءِ۔

او تیوہ دے سہب ئنا نو بجہ آن کہنگ نا ودار کریسہ ئس۔

نی بے وس آ شاز۔ ای پاریٹ، اوہ، ارے بھئی شاز، دا اسّل میل و کلومیٹر نا وڑ ءِ۔ نی کہیپیسہ۔ دا جتاء ءُ تھرما میٹر ئسے۔ دا تھرمامیٹر آ 37 ڈگری کچ ئٹ ءِ، ولے دا وڑ نا تھرما میٹر آ 98 جوانے۔

مگہ نے یخین ءِ۔

تیوہای پاریٹ۔دا میل و کلومیٹر نا وڑ ءِ، نی چاسہ کہ نن اخس کلو میٹر کینہ ہراتم نن کار ئٹ ہفتاد میل کینہ۔

اوہواو پارے

ولے اونا نظر بسترہ نا کرّک آن مدان مدان ہڑسینگیسہ ئس،۔ اونا تینا زی آ زور ہم کم مریسہ ئس۔

پُوسکنا حوالک

بلوچ راجی مچی نا بشخ مرِسہ جہان ءِ نشان ایتبو کہ نن زندہ و شرفدار ءُ راج ئسے اُن۔ ماہ رنگ بلوچ

بلوچ راج 28 جولائی نا دے گوادر ئٹ سرمریر و جہان ئے کلہو ایتر کہ نن زندہ و خوددار...