بحرین و قطر درو چار شمبے نا دے اقوام متحدہ نا چارٹر نا اصول و 1961 نا سفارتی تعلقداری تا بابت ویانا معاہدہ نا دفعہ تا رد ئٹتینا نیام ئٹ سفارتی تعلقداری تے بحال کننگ نا فیصلہ کریر۔
ہڑتوما فریق آک دا ہیت ءِ پک کریر کہ دا گام “خلیج تعاون کونسل” نا راہبند نا مسخت آتا رد ئٹ، و ریاست آتا نیام ئٹ برابری نا اصولآتا شرف ئنا رد ئٹ ہڑتوما کنڈ ئنا تعلقداری تے تالان کننگ و خلیجی ڈیہہ تا سیوتی ءِ ودفنگ نا امنائی اُست خواہی آن پیش تمانے۔ دااہم گام ئنا رد ئٹ راجی خودمختاری و آزاتی، علاقائی رکھ و جُوان ہمسایہ داری نا اصول آتے ہم مونا تخنگانے۔
دا ہیت ریاض ئٹ “خلیج تعاون کونسل” نا جنرل سیکرٹریٹ نا ہیڈ کوارٹر ئٹ “بحرین قطر فالو اپ کمیٹی” نا ارٹمیکو مجلس نا وختمونا بس۔ کمیٹی اوار قانونی کمیٹی و اوار سلامتی کمیٹی ہڑتوما تا اولیکو مجلس نا نتیجہ تا جاچ ءِ ہلک۔
تینا ڈیہہ تا وفد آتا سروکی بحرین نا وزارت خارجہ نا سیاسی امور نا انڈر سیکرٹری الشیخ عبداللہ بن احمد خلیفہ و قطری وزارتخارجہ نا سیکرٹری جنرل ڈاکٹر احمد الحمادی کننگ ئسر۔