تربت و قلات ئٹ فورسز آتیا جلہو، اِرا کارندہ مرگ ئنا گواچی

استو ضلع کیچ و قلات ئٹ اِرا جتا جلہو تیٹ پاکستانی لشکر ءِ ٹک کننگا۔

استو نادرست سلہہ بند بندغ آک تربت شار ئٹ تعلیمی چوک آ ٹہیفوک ایف سی چوکی آ چغلی بمب خسیسہ نرار ہرا چوکی نا خڑک آتمیسہ ترخا۔ جلہو آن گڈ فورسز آک علاقہ ءِ گھیرہ کریسہ جلہو کار تے پٹنگ بناء کریر۔

پن کروک جلہو نا ذمہ واری ءِ بلوچستان لبریشن فرنٹ ارفینے۔

بلوچستان لبریشن فرنٹ نا ترجمان میجر گہرام بلوچ میڈیا ٹی شینک کروک بیان اسیٹ پارے کہ بی ایل ایف نا سرمچار آک 17 اپریل آننکان یانزدہ بجہ دئے منٹ آ کیچ ئنا بنجاہی شار تربت ئٹ تعلیمی چوک آ دژمن پاکستانی لشکر آ ہموتم چغلی بمب ئٹ جلہو کریر ہراتماو موٹر سائیکل و گاڑی تا پٹنگ کن چیک پوسٹ ئنا مونا سلوک ئسر۔ او پارے کہ چغلی بمب جلہو ئٹ اِرا فوجی کارندہ ٹپی مسر۔

ترجمان پارے کہ بلوچستان لبریشن فرنٹ دا جلہو نا ذمہ واری ءِ ارفک۔ کوزہ مروک بلوچستان نا آجوئی اسکان کوزہ گیر فورسز آتیاجلہوک برجاء مرور۔

ایلو پارہ غا قلات آن حوال آک رسینگانو کہ ننکان سلہہ بند بندغ آک بھلا کچ ئٹی ایف سی کیمپ ءِ راکٹ و ایلو بھلا سلہہ تیٹ ٹککریر۔ قلات فورسز کیمپ آ جلہو جوہان آن خڑک شئے مردان ئٹ کننگا، جلہو ئٹ فورسز آتا جانی نسخان نا ہم حوال ارے۔

دا جلہو نا ذمہ واری ءِ بلوچ آجوئی دوست سلہہ بند گل بلوچ لبریشن آرمی ارفینے۔

بلوچ لبریشن آرمی نا ترجمان جیئند بلوچ میڈیا ٹی شینک کروک بیان اسیٹ پارے کہ ننا سرمچار آک استو قلات نا علاقہ جوہان، شئےمردان ئٹ کوزہ گیر پاکستانی لشکر نا اسہ کیمپ ئسے جلہو ئٹ ٹک کریر، سرمچار آک راکٹ و ایلو بھلا سلہہ تے کاریم ئٹ ایسر ہراناسوب اِرا دژمن کارندہ مرگ ئنا گواچی اندن کوزہ گیر لشکر ءِ مالی نسخان تون ہم مون تروئی تما۔

ترجمان پارے کہ بلوچ لبریشن آرمی دا جلہو نا ذمہ واری ءِ ارفک۔ کوزہ گیر لشکر نا تیوی پیش تمنگ اسکان ننا کاروائیک برجاء مرور۔