عمران خان نا دزگیری و فوج ئنا ردعمل
ٹی بی پی سرگپ
پاکستان نا مسکوہی سر وزیر عمران خان نا دزگیری آن پد پاکستان ئٹ حالیت آک خراب ءُ، تحریک انصاف پارٹی نا بنجاہی قیادت ءِ دزگیر کننگانے۔ تحریک انصاف نا باسک آک مُسہ دے آن اسلام آباد، پنجاب و پختونخواہ نا جتاء شار تیٹ برانز کننگ ءُ و سرکاری مڈی تے خاخر تننگ ءُ، لاہور ئٹ پاکستانی لشکر نا کور کمانڈر لاہور نا اُرا و پشاور ئٹ ریڈیو پاکستان نا ماڑی ءِ ہشانو و پاکستان نا کیہی شار تیٹ برانز برجاء ءِ اندن برانزی تحریک ءِ توننگ کن مُسہ دے اسکان تیوہ پاکستان ئٹ انٹرنیٹ سروس بند مس۔
پاکستان ئٹ سیاسی جاچ ہلوک آک دا حالیت آتے پاکستانی لشکر نا پالیسی تا بدل پن کریسہ پاننگ ءُ کہ عمران خان ءِ حکومت ئٹ ہتوک آ فوج ئنا حاضر سروس جنرل آک ئسر و داسہ اوفتا تین پہ تین نا جنگ آن پاکستان ئٹ حالیت آتا خرابی ودی مسونے۔ پنجاب ئٹ برانزیک پولیس نا گاڑی، سرکاری و نجی مڈی و فوج ئنا چھاؤنی تیا جلہو کننگ ءُ ولے پاکستانی لشکر برانز آتے ایسر کننگ کن تاغت ءِ کاریم ئٹ ہتنگ اف و پاکستانی لشکر نا ترجمان تینا بیان اسیٹ پارینے کہ او برانزی تتون سگ و تحمل ئٹ مون تننگ ءُ۔
بلوچ، پشتون و سندھی راہشون آک پنجاب ئٹ تدینی تا ردعمل آ خُلیس نا درشانی کننگ ءُ کہ اندا تدینیک اگہ بلوچ، سندھی یا پشتون راج آتا پارہ غان مسرہ گڑا پاکستانی لشکر ردعمل ئٹ دا راج آتا علاقہ تیٹ کشت و خون کریکہ ولے پنجاب نا تدینی تیا پاکستانی لشکر یا ریاست پاکستان نا کنڈ آن تاغت ءِ کاریم ئٹ ہتپننگ پائک کہ پاکستان ئٹ بلوچ، سندھی و پشتون تون اوار ایلو راج آتا ہند غلام نا ءِ و اوفک تینے پنجابی راج ئتون برابر سرپد مننگ ءِ یلہ کیر۔
پاکستان نا سپریم کورٹ عمران خان ءِ منہ منٹ ئٹ ضمانت تس ولے پشتون راہشون علی وزیر اِرا سال اسکان کراچی سنٹرل جیل ئٹ دروغ کیس تیٹ بند مس و اوڑکن پاکستان نا عدالت چھپ مسوسس۔ ایڈووکیٹ ایمان مزاری نا پاننگ ءِ کہ اسلام آباد ہائی کورٹ نا کنڈ آن جوڑ کروک بلوچ اسٹوڈنٹس کمیشن ءِ ایتوک شست و نو (69) زوراکی ئٹ بیگواہ خوانندہ تیان پنجاہ و نو (59) خوانندہ دائسکان یلہ کننگتنو۔
پاکستان ئٹ فوج و عدلیہ نا پنجاب نا راہشون تیکن خلکن رویہ و انصاف نا تننگ و ایلو راج آتون ہر وخت نا انصافی و غلام تا وڑ سلوک اوفتے دا سوچنگ آ بیوس کرینے کہ دا ڈیہہ بیرہ پنجاب نا ہندی تا ءِ۔ ریاست پاکستان نا گام تیان پاکستان تون ایلو راج آتا مُری ودنگ ءِ ہرا بروک وخت ئٹ ریاست کن سختی تا سوب جوڑ مننگ کیک۔