بلوچستان نا ضلع کیچ نا بنجائی شار تُربَت آن پاکستانی فورسز کارندہ آک اُرا آ چھاپہ خلیسہ نیاڑی و چناتے زیات بے دادی تا گواچی کریسہ اسہ بندغ ئسے نادرست ہند آ دریر ۔
شابیتی حوال تا ردئٹ تُربَت نا علاقہ آسکانی بازار آن پاکستانی فورسز کارندہ آک دوشمبے و سئے شمبے نا نیامیکو نن کم و ود دو بجہ آ اسہ ارا سے آ چھاپہ خلیسہ نیاڑی و چناتے بےدادی تا گواچی کریر و اسہ ورنا ئسے زوراکی ئٹ بیگواہی تا گواچی کریسہ نا درست ہند آ درینو ۔
بیگواہ کروک ورنا نا چاہنداری شبیر بلوچ ولد بشیر نا پن آن مسونے ۔
بیگواہ شبیر نا خاہوت اونا زوراکی ئٹ بیگواہی نا پک ءِ کرینو دا بابت بیگواہ شبیر نا ہیڑ راجی حوالکاری تلہ غا اسہ ویڈیو ئس شینک کرینے ہراٹی اونا پاننگ ءِ کہ تدوکا نن فورسز کارندہ آک ننا ارا آ چھاپہ خلکر، ایلم ءِ بے دادی تا گواچی کریر ہراڑان او بے ہوش مس و پدا فورسز کارندہ آک اودے گر کریسہ دریر ۔
اونا پاننگ ئس کہ ہرا وخت ای اوفتان ہریفیٹ کہ انتئے کنا ایلم ءِ بے دادی کریسہ دننگ اُرے گڑا اوفک کنے خلکر و سم کاری ہم کریر ۔
او سول سوسائٹی بندغی حق آتا ادارہ تون اوار لس شاری تینان اپیل کرینے کہ او ننا توار جوڑ مریر ۔