بلوچستان ٹی مئی نا توہ ئٹی کیہی بھلو احوال مونا ئسر، ہرافتیٹ پاکستانی لشکر آ جلہو، فوجی آپریشن، دزگیرمروک بلوچ زالبول نا آجوئی، زالبول فدائی شاری بلوچ نا نماز جنازہ تون اوار ٹیچر ئسے نا خودکشی و ایران آن بلوچ عالم آتا ڈیہہ آن کشنگ اوار ءِ۔
تدوکا توہ ئنا گچین آ احوال تیا اسہ نظر اس:
دزگیر مروک ماہل بلوچ پنچ لکھ روپئی ضمانت آ یلہ کننگا۔ ماہل بلوچ تدوکا مُسہ توہ آن بندی ئس، شال ٹی تینا اُراغان زوراکی نا بیگواہی آن گڈ اونا دزگیری پاش کننگا و اوڑا بلوچ سلاء بند آجوئی خواہوک تنظیم نا کمکار مننگ نا دوبہ خلنگا۔
دے کہی بلوچستان ٹی ایرانی سیکورٹی و فوجی ٹولی تا دو آن ورنا تا بھلو کچ اسیٹ دزگیری نا برخلاف برانز آ پین دئے بندغ ءِ دزگیر کننگا۔ ایران ٹی تدوکا کیہی توہ آن بلوچ اکثریتی علاقہ تیٹ برانز برجاء ءِ۔
دا توہ ئٹی گوادر ٹی کہوکو وہیل مچھی اس خننگا، بلوچستان نا دریابی شار ٹی تقریباً 42 فٹ مرغنو نیل رنگ ئنا کہوکو وہیل مچھی اس خننگا۔ دا رنگ ئنا وہیل بھلن جون ئنا نایاب دیری آ ساہدار تیٹ حساب مریک۔
ضلع آوران، کولواہ ٹی بلوچ سرمچار و فورسز تیٹ خونی جھڑپ نا بھرم ٹی بلوچ سلاء بند آزادی خواہوک تنظیم بلوچستان لبریشن فرنٹ نا شش باسک خلنگار و تنظیم پاکستانی لشکر نا دوانزدہ ایس ایس جی کمانڈو مرگ ئنا گواچی کننگ نا ذمہ واری ءِ ارفے، دا جھڑپ آن مُست پاکستانی لشکر ڈرون ئٹ جلہو کرے۔
پاکستان نا بنجائی کابینہ آرٹیکل 245 نا رد ئٹ بلوچستان ٹی لشکر تعینات کننگ نا موکل تس۔ پاکستانی میڈیا نا رد ئٹ بلوچستان حکومت فوج تعینات کننگ کن ریکوزیشن رادہ کریسس۔
بولان و ایب کیب ئٹ فوجی آپریشن کننگا، دا وختا جتا جاگہ غا تیا بلوچ سرمچار و پاکستانی فورسز تیٹ جھڑپ آک مسر، بلوچ لبریشن آرمی زرغون، مارگٹ ٹی مُسہ جلہو ئٹ پاکستانی لشکر نا ایس ایس جی کمانڈو تتون اوار 12 کارندہ مرگ ئنا گواچی کننگ نا ذمہ واری ءِ ارفے۔
گوادر آن حق دو تحریک نا سروک مولانا ہدایت الرحمان بلوچ یلہ مس۔ اودے برجاء سال جنوری ٹی گوادر نا ہندی عدالت آن دزگیر کننگا۔ ہدایت الرحمان نا یلہ مننگ آ گوادر و ایلو علاقہ آتیٹ بخیرٹ ئی دپ درشانی کننگا ہرافتیٹ بھلو کچ اسیٹ زالبول آک ہم اوار مسر۔
اسہ سال مُست گمانی وڑ ترکیہ آن دزگیر مروک بلوچ نیشنلسٹ آرمی نا سروک گلزار امام ءِ میڈیا غا پاش کننگا۔ دا وختا بلوچ نیشنلسٹ آرمی نا سروک گلزار امام بلوچ نا پاننگ ئس کہ ای ہرا کسر ءِ گچین کریسُٹ او رد ئس، ننا ویل ویل آتا پُرامن ایسری منکن ءِ۔
داکان مُست بلوچ نیشنلسٹ آرمی تینا بیان آتیٹ خلیس نا درشانی کریسس کہ ریاست پاکستان گلزار امام آ بےدادی کریسہ بلوچ قومی تحریک نا برخلاف کاریم ئٹ ہتنگ نا کوشست کرو و تحریک نا برخلاف پروپیگنڈہ بناء کرو۔
ایرانی حکومت دے کہی بلوچستان آن کیہی سنی بلوچ عالم دین آتے ڈیہہ آن کشانے، دا عالم تیٹ عبدالعزیز عمر زئی، مولوی رضا رخشانی، مولوی عبدالرؤف رخشانی، مولوی عبدالمجید مراد زئی و مولوی امان اللہ سعدی اوار ءُ۔
اواران ٹی پاکستان لشکر نا کمکار نا بلیک میلنگ آن بیزار مریسہ ٹیچر نجمہ خودکشی کرے۔
نجمہ نا باوہ دلسرد و لمّہ تربت ٹی پریس کانفرنس کریسہ پاریر کہ نجمہ بلوچ ءِ لیوئز کارندہ سرکاری ادارہ تا پن ءِ ہلیسہ چرجوئی ئٹ بیم تننگ ئس، نجمہ دا بابت ئٹ تینا لمّہ باوہ ءِ پاریسس۔
تربت سول سوسائٹی نا کنوینر گلزار دوست و آل پارٹیز کیچ نا کنوینر غلام یاسین بلوچ پارے کہ اسہ لیویز کارندہ سے ٹے داخسو جغر اف کہ او لس شاری تے بیم تریسہ دا سیم اسکان ہتے کہ او خودکشی کے اونا مُخ ءِ پین تاغت اس تفینے۔
چینی شاری تیا فدائی جلہو کروک بلوچ زالبول شاری بلوچ نا باقیات خاہوت نا حوالہ کننگا، سینزدہ توہ آن گڈ نماز جنازہ ہندی علاقہ ٹی خواننگا۔
کراچی ٹی تدوکا سال 26 اپریل نا پیشیم فدائی جلہو ٹی مُسہ 3 چینی شاری تون اوار 4 بندغ کسک۔ کراچی جلہو نا ذمہ واری ءِ سلاء بند آزادی خواہوک تنظیم بلوچ لبریشن آرمی ارفے۔ ترجمان جیئند بلوچ پاریسس کہ جلہو اوفتا تنظیم نا مجید برگیڈ ونگ ئنا شاری بلوچ کرینے۔
