نیشنل ڈیموکریٹک پارٹی شال زون ن کنڈ آن شہید صباء دشتیاری نا دوانزدہ میکو سال پوروی آ اسہ لیکچر مجلس اس اڈ تننگا، ہرا نا صدارت شال زون نا آرگنائزر نزر مری کننگ ئس، خاص انگا مہمان تیٹ بنجائی آرگنائزنگ کمیٹی باسک سلمان بلوچ، اشفاق بلوچ و غنی بلوچ اوار ئسر۔
پروفیسر ڈاکٹر منظور بلوچ پارٹی باسک آتون شہید صباء دشتیاری نا زند ئنا بابت ئٹ تران کرے۔
منظور بلوچ پارے کہ ننے فخر ءِ کہ ورناک تینا قوم ئنا اسہ استاد ئسے خراج عقیدت تننگ ءُ۔ ولے داڑے اسہ سوج اس ودی مریک کہ ننا ہخس کہ ہیرو ءُ اوفتے خراج عقیدت تننگ نا کُل آن گچین آ وڑ انت ءِ؟انت نن بیرہ اوفتے یات کین، اوفتا دے آ مجلس اڈ ایتن، ہرا مسخت کن او تینا زند ءِ گدریفیر، تینا ساہ ءِ تسر او زیات اہم ءُ؟ یا بیرہ اوفتا بارو ئٹ ننا ہرا معلومداری کو اوفتے اسٹ ایلو اسکان سر کین، یا اودے باقاعدہ اسہ فکر ئسے نا وڑ بندغ تا مونا ہتین۔
اگہ صباء دشتیاری نا ہیت ءِ کننگ مرے تو او اسہ بے خلوکو دلیر ءُ بندغ اس ئس، او انداخس دلیر ئس کہ باز آ بندغ آک اودے پاریر کہ نے خون کننگو تو صباء پاریکہ کہ کنا کہنگ آن بلوچ قوم کھٹوف۔ داڑے باز آ بندغ آک دُن ہم پارہ کہ اگہ صباء زندہ مسکہ تو زیات کاریم کریکہ۔ ولے بھلا بندغ آتا تینا مزاج و تینا اصول آک مریرہ۔ او دلیر مریرہ و دلیری ئٹ فیصلہ کیرہ نہ جزباتی ءُ فیصلہ کیرہ، ہرا وڑ نواب نوروز خان و نواب اکبر خان بگٹی ہرا تینا زند ئنا اخیرکو دے تیٹ ئسر او جزباتی الوس، انتئے کہ دا سن ئٹی کس جزباتی مفک شعوری فیصلہ ہلیک۔
اتھارٹی نا کاریم مخلوق ئٹ خلیس ودی کننگ ءِ۔ و صباء نا کلہو ءِ کہ خلیس ءِ بےسہب کبو، دلیری ہرا کہ دانائی تون اوار مرے۔ خلیس تخلیقی بود ءِ پُھلیک۔ بندغ اگہ تینا اصول آتیا زند کننگ کپ تو آسراتیک بے معنی ءُ۔
منظور بلوچ ودیک پارے کہ حیرانی مریک کہ اندا چاگڑد اگہ بابا مری، شہید نواب بگٹی، سردار عطاء اللہ مینگل، صباء دشتیاری، شہید غلام محمد ءِ ودی کننگ کیک، پین باز اندنو شخصیت ہرافتا پن ءِ ہلیو تو بھازی آن دمدرینگو، تو گڑا سوج دادے کہ اندا چاگڑد لٹریچر ٹی انتئے پدی ءِ، اوڑے دا چاگڑد انتئے بھلو شخصیت ودی کننگ اف، گُڑا سا نا مطلب دادے کہ داڑے نُما ہرا مزاحمت نا بنجاء ءِ اونا دود زیات سوگو ءِ، لٹریچر آ زیات۔ مزاحمت اینو ہم ساڑی ءِ، ایہُن ہُننگ مرگ تو کُل آن مُست لٹریچر بریک۔ کُل آن مُست دانش ور بریک، ولے داڑے ننا جہد کار آک مُست بریرہ، المیہ دادے کہ سوکالڈ دانش ور آک کُل آن پد ءُ۔
انہوں پارے کہ کُل آن بھلا سوج دا ودی مریک کہ صباء ءِ صباء انت گڑاس جوڑ کرے، اگہ صباء دا قربانی ءِ تتوکہ تو انت او صباء مسکہ؟ انت اونا ادبی شخصیت تیوہ بلوچستان یا تیوہ جہان اسکان اونا پن ءِ غٹ ءِ زیمی کریکہ؟ اگہ صباء نا زند آن مزاحمتی و سیاسی پیریڈ ءِ کشین تو صباء ٹی انت بچیک۔
ننے دا ہروئی ءِ کہ صباء نا شخصیت ٹی ہمو ارا گڑاک ئسر ہرا اودے دکیر ءُ شخصیت اس جوڑ کریر، ہرا آسراتی تا کنڈ آ اُسل خن تے بڑز کتو ہُتو، صباء ہمو بندغ ئس کہ اندا یونیورسٹی ٹی بست و بند تا تہٹی ہچو بندغ ئسے تون تعلقداری تختو، اگہ کس تون تعلقداری ئس تو او لٹریچر نا بنداو آ ئس۔ اونا گیشتر سنگت آک خوانندہ، چوکیدار، مالی ئسر، یا اونا ہم خیال بندغ آک۔ صباء زند آن ننے باز گڑا ہیل کننگ کن رسینگک، نن بائدے اوڑان ہیل کین، اودے چان، اونا زند ءِ ریکارڈ آ ہتین تاکہ پدریچ ہم صباء ءِ چائے۔ صباء نا زند ئنا ہرا زیبا غا پہلو کنے نظر بریک او دادے کہ او خلیس ءِ بےسہب کرے و اسہ سرپند ءُ بندغ ئسے نا وڑ تینا ساہ ءِ تس۔