فدائی جلہوک و ریاستی بیانیہ
ٹی بی پی سرگپ
بلوچ راجی جنز آجوئی تینا تاریخی چرجوئی تون برجاء ءِ و برجاء انسرجنسی نا مہکش خیر بخش مری تحریک ءِ آغا عبدالکریم نا بغاوت نا چرجوئی پن کریکہ۔ ہفتاد سال ئٹ بلوچ راجی آجوئی نا کیہی شیفی بڑزی تیان تدیسہ تینا چرجوئی ءِ برجاء تخنگ ئٹ سرسہب مسنے و برجاء انسرجنسی تدوکا شورش آتیان زیات سوگوْ دروشم ئٹ برجاء ءِ۔
ریاست پاکستان ہفتاد سال آن بلوچ راجی جنز ءِ منہ بندغ یا خاص ءُ ٹولی ئسے نا ویل پاریسہ انسرجنسی نا وجود آن نمن ءِ۔ بیست و یکمیکو کرن تون اوار جنز آجوئی نا بناء ءِ جسٹس نواز مری نا خون و خیر بخش مری نا دزگیری تون گنڈنگ نا کوشست کننگا۔ جہد آجوئی ءِ ایسر کننگ ٹی بے سہب مننگ آن گڈ فوجی ڈکٹیٹر جنرل پرویز مشرف بلوچ راجی جنگ ءِ مُسہ سردار تون گنڈیسہ پاریسس کہ “نن اوفتے اندنو جاگہ سے آن خلون کہ اوفتے سماء ہم تمپرو” ہرا نا ورندی ٹی نواب خیر بخش مری پارے کہ ریاست ءِ ہم سماء مرے کہ نن ہفتاد نا بلوچ افن و ریاست ءِ ہمو بولی ٹی ورندی تننگو۔
جنرل مشرف نا حاکمیت آن گڈ پاکستان نا مسکوہی صدر آصف زرداری بلوچ آتیتون گپ و تران نا درشانی کرے، اوفتیا شست سال آن مروک ظلم و بے دادی تیا بشخنداری کرے و پیپلز پارٹی ‘آغاز حقوق بلوچستان’ پڑو کرے ولے آزاتی نا جنز ءِ ایسر کننگ ئٹ بے سُہب مننگ آن گڈ شرم الشیخ سمٹ ئٹ بلوچ جُنز ءِ انڈیا تون گنڈنگ نا کوشست کننگا۔ ہراڑان گڈ ہزار آ بندغ تے زوراکی ئٹ بیگواہ کننگا و سد آتا جشوک جونک سڑک آتا کرک مَش و گیاوان تیٹ خسنگار۔
بلوچ جنز ئٹ جند ندری جلہو تا بناء اِرا ہزار یانزدہ ئٹ درویش بلوچ نا کوئٹہ ئٹ شفیق مینگل آ جلہو آن مس ولے اِرا ہزار ہژدہ ئٹ ریحان بلوچ نا دالبندین ئٹ چینی انجینئر تیا جند ندری جلہو آن گڈ بی ایل اے مجید بریگیڈ پاکستان و چین ئنا مفاد آتیا بھلو جلہو کرے۔ شاری بلوچ، جنز آجوئی نا اولیکو زالبول جند ندر ئس ولے سمعیہ بلوچ نا جند ندری جلہو آن گڈ اولیکو وار مجید بریگیڈ زالبول فدائی تا عکس آتے شینک کرینے ہراڑان گمان کننگ مریک کہ مجید بریگیڈ ئٹ زالبول تا بھلو کچ اس اوار ءِ۔
شاری بلوچ نا جند ندری جلہو آن گڈ ریاست اودے ذہنی ناجوڑ اس گوندنگ نا کوشست کریسس و سمعیہ بلوچ نا عمل ءِ توتک ئٹ اونا خاہوت نا بندغ تے زوراکی ئٹ بیگواہ و شہید کننگ نا رد عمل پن کننگک ولے بلوچ انسرجنسی نا تاریخ آن واخب دانشور آک چرجوئی ئٹ درشانی کریسہ بسنو کہ بلوچ انسرجنسی، آجوئی کن شعوری بنداو آ بناء کننگانے و بلوچ گل آتا تحریکی فیصلہ غاک ادارہ جاتی بنداو آ کننگرہ۔
بلوچ آجوئی دوست ٹولیک و گل آک بلوچ راجی آجوئی نا جنز ءِ اِرا دہائی آن سوگوْ دروشم ئٹ برجاء تخانو و ریاست کن ممکن اف کہ او بلوچ انسرجنسی نا وجود آن نمن مریسہ تاغت نا زور آ انسرجنسی ءِ ایسر کننگ کے۔ اگہ ریاست نا بے دادی نا زور آ بلوچ راجی جنگ ءِ ایسر کننگ نا کوشست آک برجاء مسر گڑا دا پاننگ رد مفرو کہ بلوچ سلہہ بندغ گل آتا جلہو تا ترندی ٹی ہم ودکی مرو۔