سفر زند و شاعری
نوشت: نزار قبانی | مَٹ: عتیق آسکوہ بلوچ
نہمیکو بشخ
مچیک
1939 ئنا تیرمہ ئٹ ننا بحری جہاز بیروت آن اٹلی نا سفر آ ئس۔ ہرا وخت سمندر بَٹ آک بحری جہاز نا شیف دامون ایمون پیہن کف تیا دِرکنگ ئسر و جہاز آ ساڑی مار مسڑ خوانندہ آک ٹوک ٹکا ئٹ گٹ ئسر؛ منٹ دیمون ءِ ہلوک ئسر، منٹ اس تلہ غا یاتگاری عکس ہلنگ ئسر، ای جہاز نا ایلو بشخ ئٹ تنیا سلوک تینا نظم ئنا ہمو شئر تے تینتون پاننگ ئسوٹ ہرادے ای تینا زند ئٹ اولیکو وار نوشتہ کریسٹ۔ دا ناگمان آ آمد کنے گوڑیفیسس۔ اولیکو بند کنا باہ آن اندنو دِرک اس خلک دنکہ خیسنا مچی سمندر نا کڑمبی تیان سِٹ خلیک۔ اِرا منٹ آن گڈ ارٹمیکو مچی سِٹ خلیسہ پیشن بس، دئے منٹ آن گڈ مسٹمیکو، چارمی، پنچمی، و دوارہ دہمیکو مچی پیشن بس۔ باہ ئٹ ساڑی دا خیسن، خڑن خلوک و گروشکی مچی تا درپہ تیان ای گل آن بال کننگ ئسوٹ۔ ای پوہ مننگ اَلوٹ کہ انت کیو۔ دا لیٹو کنوک، سٹوک مچی تے امر ہلیو؟ ہراڑے تخیو؟ اوفتے انت کنفیو کہ او زندہ سلیر؟ ای زو زو جہاز نا شیف مِزل ئٹ تینا کوٹی ٹی بسوٹ۔ تینا نوٹ بُک ءِ کشاٹ و اخس کہ ای مچی مُچ کریسٹ، اوٹی تخاٹ۔ تینا ہمسفر سنگت آتے ای تینا دا مڈی نا بابت ہچ پاتوٹ۔ کنے خلیس اس کہ اوفک کنے آ کنا مچی تے دپس۔ شانزدہ سال ئنا سن ئٹ اولیکو وار، تینا ذات نا اسہ مرغنو سفر اس کننگ آن گڈ، کنے ٹی اسہ شاعر اس ودی مس۔
نن روم، وینس، ترِیست، برِندیزی و ایلو اطالوی شار آتیٹ گچین دے گدریفین۔ داسہ نن تینا سفر نا ارٹمیکو ہفتہ ءِ پورو کتوسن کہ ارٹمیکو جہانی جنگ بناء مس۔ ہٹلر نا لشکر یورپ ءِ ڈیہہ پہ ڈیہہ کیدسہ کرے۔ اطالوی حکومت بے وسی تون ننے بیروت ہنوک اولیکو دُخانی مسافر کشتی ئٹ روانہ کرے۔ جنگ ئنا سال تا نیامٹ ای تینا ایلو و بڑز تعلیم ءِ پورو کریٹ۔ 1945 ئٹ ای دمشق ئٹ شامی یونیورسٹی ٹی قانود نا سند ءِ دوئی کریٹ۔ قانود نا تعلیم دوئی کننگ کنا گچین کروک اَلو۔ ای قانود دا خاطر خواناسٹ انتیکہ دا کنا بروک وخٹ ئنا کلیت ئس۔ سیاسی اقتصادیات، دستوری، جہانی و رومی قانودی مواد ءِ اندن یات کننگ دنکہ ہمو بندغ ہرا کیپسول کیدک و ہرادے کیدنگ آن بیدس پین کسر مف۔ کنا خوانوک گڑا تیٹ دنو ہچس اَلو ہرا کنا شونک ءِ زیات کروس، لیکچر آتا وختا، ای تینا بنائی شئر تے قانود نا کتاب آتا کرک آتیا پنسل ئٹ نوشتہ کریٹہ۔ مثیال کن کنا پنی آ نظم “نھداک” )نا خد آک( ءِ ای قانود نا کتاب نا کرک آ نوشتہ کریسٹ۔ سال نا ایسری آ ہراتم ای امتحان تسوٹ گڑا قانود )شریعت( ئٹ کنا تیوہ غاتیا بدحالیت نمبر ئسر۔
ای وکالت نا پریکٹس کتوٹ، نہ مقدمہ اس مون تسوٹ۔ اسٹ آ مقدمہ ہرادے ای مون تسوٹ، و ساندہ مون تریسہ کرینٹ، وہ زیبائی نا مقدمہ ءِ، و ہمو بے گناہ ہرانا پارہ غان ای دا مقدمہ ءِ مون تسوٹ او شاعری ءِ۔ دن شاعری کنا رہی آ جنگ ئنا زمانہ ئٹ بس۔ دا ہیت جنگ ئنا گچینی تیان ءِ۔ اگہ جنگ ئٹ ہم گچینی اس مرے کہ دا جہان نا پچخ و اونا افکار و خیال آتیٹ سُر پُر ودی کیک۔
چِل ئنا دہ یک ئٹ دمشق ءِ ہچو مون پہ مون جلہو ئسے نا خلیس اَلو۔ دا ہیت پورو یخین ئٹ پاننگ مریک کہ ایلو عرب شار آتیانبار دادے ہم اسہ پین ڈول ئسے نا جلہو ئسے تون مون تروئی تماسس، و او ئس اونا عقل و فکر آ جلہو۔ مسیت نا مینارک ہرا پنچ سد سال آن جارات ئٹ ئسر، دا جاراتی سلتوسر۔ خرن آ بوچ آتا ایشکامی، دمشق نا ہفت دریا ہم دا ایشکامی تون اَلور۔ دمشق ہمو ہزار آ گڑا تیا صبر کننگ ئس ہرا اودے میرات اٹ رسینگاسر؛ او تینا معصومی، گودی گری، پاکی، تینا مزار، اولیا، خلقی بتل، قہوہ خانہ، چاہ ئنا پیالہ، منبر، خطیب، شاعری و شاعر آتیا صبر کروک ئس۔ بعض برجاء تمدّنی ویل تا بے پامی آن بیدس، ہراتم آن اللہ اودے تخلیق کریسس، اونا سفر عرب و عربیت نا پارہ غا مسونے۔ دمشق نا ادبی و چاگڑدی دروشم ساندہ پبی ربیدگی مسونے۔ دمشق تینا ذات ئٹ گنج مسونے، نہ بدعات تینا کروک، نہ پوسکنی تے ہضم کروک۔
ادب دمشقی مفہوم ئٹ یا او اوائلی ادب ئس یا گڑا آخہ۔ نثر اونا خڑک آ یا تو جاحظ، ابن مقفع و عبدالحمید الکاتب نا نثر ئس یا گڑا ہچ نہ۔ شاعری اونا گمان ئٹ لبید، اعشیٰ و نابغہ نا شاعری ئس نئے تو ہچ نہ۔ اغانی، العِقد الفرید و البیان و التبیین نا برخلاف کسر اس ارفنگ دمشق نا خڑک صراطِ مستقیم آن چھپ ہننگ ئس۔ صراطِ مستقیم آن اونا مراد ہمو تیوہ غاک ہرافتے ننا باوہ پیرہ ہلار ہنار، یعنی شاعری نا دیوان، بلاغت، نحو و صرف نا کتاب آک، بصری تا اجتہاد و کوفی تا تخریجات۔
ننا شار ئنا گمان نا رِدئٹ میرات سنگِ مرمر نا ہمو مقبرہ ءِ ہرا تینا سوارنگ و بیرفنگ و تینا تہہ ئٹ ہچ ڈول ئنا بدلی ئسے نا موْکل تفک۔ دا اسہ آہنی پٹڑی ئسے ہرا جاہلی نا اسٹیشن آن بناء مریسہ بیستمیکو صدی نا اسٹیشن اسکان اسہ پارہ غا تالان ءِ۔ دانا مِزل آک ہمود ءُ و ہڈ کننگ نا ہند آک ہم ہمو، مسافر آتا پِنک و گڑاک ہم ہمو۔ پنچ سد سال مسونے، سواریک بے آرام پاٹی بوگی تیٹ بند ءُ، نہ لگنگ کیرہ و نہ دڑنگ کیرہ، داڑ اسکان کہ ریل گاڑی نا بشخ اس مسونو، بے زاری تالان کروک سفر نا اسہ بشخ اس۔
دی بلوچستان پوسٹ : دا نوشت اٹ ساڑی ہیت و خیال آک نوشتوک نا جند ئنا ءُ، دی بلوچستان پوسٹ میڈیا نیٹ ورک نا دا ہیت آتے مَننگ الّمی اَف و نئے کن دا ادارہ نا پالیسی تا درشانی ءِ کیک۔