سفر زند و شاعری
نوشت: نزار قبانی | مَٹ: عتیق آسکوہ بلوچ
سینزدہمیکو بشخ
کنا کِلیت آک
کنا شاعری نا کِلیت آک جادوئی کِلیت افس؛ دا کلیت آک نہ کنا کُفت آتیتون تفوک ءُ نہ بالشست نا شیف آن تخوک۔ کنا تہہ ئنا جہانک ملوک ریگستان ءُ، سیر سوات کن اُلسی باغ، ہراڑے نن و دے ہر وخت ہرکس بننگ کیک۔ کنا شاعری نا کلیت آک تینٹ کنا شئر آک ءُ۔ بیرہ کنا نظم آتیان ہمو دروشم ٹہینگک ہرا کنتون ہم دروشم ءِ۔ کنا شینک کروک کتاب آک کنا گواچنی پروانہِ سفر ءُ۔
کنا شاعری نا مُسہ کلیت ءُ؛ چُنکی، انقلاب و جنون۔ چُنکی ئٹ آن کنا مطلب ہمو تیوہ غاک ہراٹی معصومیت، شابیتی و تینٹ کاریم مرے۔ چُنا و شاعر اِرا اندنو جادوگر ءُ ہرا کائنات ءِ بے وزن وانگڑی گیند ئٹ بدل کننگ آ قدرت تخیرہ۔ انقلاب آن کنا مطلب ربیدگی، نفسیاتی و دیہاڑی دود آتیٹ لڑزہ، تَل و پرغنگ ودی کننگ ءِ، ہمو دود آک ہرا ہڑدے ئی گڑا جوڑ مسونو یا ہرافک قانود نا دروشم دوئی کرینو۔ جنون آن مراد عقل ئنا متکنا گھڑیال ءِ ہزبہ ہزبہ کننگ و دا پرمانِ قراقوشیہ آ ترند شرہ کنگ ہرا ننا ودی مننگ آن مُست ننے آ تخنگرہ۔
شاعر اکن تیوہ غاتیان زیات بھیم بش کروک ہیت ایمنی و جارات نا گوند آن لچنگ و ایب کیب نا گڑا تیان اُست جم مریسہ تولنگ ءِ۔ ہرا شاعر جہان تون مونتس نا لڑزہ بش کننگ تون واخب اف او اُرائی ساہدار اسیٹ بدل مریک، اندنو ساہدار اس ہرانا مزاحمتی و مونتس نا ازبہ غاک کشنگانو۔ کنے چنکی آن دیہاڑ و کسہ غاتیون مونتس ئٹ خوشی مریک۔
ای ہچبر دا پارہ غا پامدار متئوٹ کہ ذکر ئنا کُڑدہ ئٹ اسہ درویش اس جوڑ مریو یا گڑا ہمو چُنا ہرا کلیسا نا کڑدہ ئٹ سلوک باگل پاننگے۔ ہزار آ دروشم و توار تا نیامٹ کنے ساندہ تینا دروشم و تینا توار نا پٹ و پول مسونے۔ ایلوفتا ہور و اوفتا نشان تے وام ہلنگ ءِ ای ہچبر تینا کاریم کتوٹ۔ ای ساندہ اندا خواہسوٹ کہ تینا ہور تیٹ نوشت کیو و کاغذ آ تینا گچین آ ہور تا نشان تے ہلیو۔ ای اسہ ہم شاعر ئسے نا کالا کاغذ کاپی اس مننگ آن ساندہ نمن مسونٹ۔ جہان اٹ اسہ متنبی، اسہ ورڈز ورتھ، اسہ والیری و اسہ پابلو نرودا ئسے۔ بازار ئٹ دا تخلیق کار آتا پِن آن بروک ارٹمیکو نسخہ، گواچن اٹ دروغ نسخہ ئسے۔
1940ء ئٹ اندا ہیت کنا شاعری نا فکری اساس ئس۔ کنا باوری ئس کہ ننا ہشتاد در سد نظم آک مُرغنی، شابیتی و بیرفنگ ئٹ اسہ ایلو تون ہم رنگ ءُ۔ ہشتاد در سد شاعر فوٹو کاپی نقل ءُ، اندنو نقل ہرا اصل نا مون ئٹ بے کار کاغذ ءُ۔ اندا پامداری تون ای مدرسہ ثانویہ نا سنگت آتیتون اوار ہو وخت ئنا بھلا شامی شاعر آتا نظم آتے بنگوٹہ۔ اوفک تینا نظم آتے شامی جامعہ نا منبر آ مونا ایسرہ، یا گڑا راجی دے و یاتگاری وخت آ قبرستان، الباب الصغیر، و الدحداح نا دیوال تیا نوشت دا نظم آک ننے خواننگ کن رسینگارہ۔ ای ماراٹہ کہ عربی شاعری اسہ ہند ئسے بریسہ سلیسنے۔
ننا بیستمیکو صدی نا شاعری اولیکو صدی یا ارٹمیکو یا دہمیکو صدی نا شاعری آن جتا اف۔ بلاغت نا سانچہ غاک اسہ دو آن ایلو دو، و اسہ خواجہ آن ایلو خواجہ ءِ سرمریسہ کرینو۔ ہراڑاسکان دا سانچہ غاتا ساڑی حالیت نا معاملہ ءِ، او اسہ ڈول ءِ۔ عربی نظم بیستمیکو صدی اسکان اندن مس، اسہ وخت آ حجازی لباس بینوک و قاہرہ، بیروت، بغداد و دمشق نا ہوٹل آتیٹ وسکی نا جام آن چس ہلیسہ۔ اونا لباس و کڑدار ئٹ بھیم بش کروک شرہ ساڑی مس، داڑاسکان کہ امیر الشعرا شوقی، متنبی نا بوٹ بینوک، شانزے لیزے پیرس ئٹ پیری کریکہ، غرناطہ ئٹ بے وطنی نا وختا ہسپانوی شراب کنگکہ، و متکنا مصر ئنا یات ئٹ بُحتُری نا خڑینک وہیفیکہ۔ نن شار آ ہنپ کرین ولے صحرائی میخ آک ننا تہہ کڑمبی ئٹ خلوک مسر۔ نن پیہن پُھلی، بنفشہ فرنگی و گارڈینیا نا پُھل آتیتون واخب مسون ولے مشک بید و عرار نا زباد ننا پِف تیٹ ساڑی مس۔ نن گچین آ محل و سائس ماڑی تیٹ ہندی مسون ولے نن تینتون تینا خاچوک ہند ئٹ ہُچ و خزم ارفین بسون۔
عربی نظم تینا ذات ئٹ تُرند شیزوفرینیا نا گواچی مروک مس۔ ہراتم ای نشاۃِ ثانیہ نا شاعر آتے خواناٹہ گڑا ای ماراٹہ کہ ای اسہ دروشم بدل کروک مجلس اسیٹی اُٹ، و ہر شاعر جاغہ ئسے آن ہلوک دروشم اس تینے آ شاغانے ہرا اودے دوست ءِ۔ اسٹ ابوفراس نا زمغ ءِ وام ہلوک ءِ، ایلو عنترہ نا ہُلی، و مسٹمیکو ابنِ رومی نا عبا۔ دروشم بدل کروک مجلس نا نیامٹ، ای گوڑینگوک مسوٹہ، حالانکہ ای اسہ پبی ءُ ورنا اس ئسوٹ، کہ دا مخلوق تینا گواچنی دروشم نا درشانی و تینا اصل بولی ئٹ کلام انتکن کپسہ؟ انتکن دا بندغاک ایلوفتا بولی و ایلوفتا زمانہ ءِ وام ہلوک ءُ؟ دا جشنِ کارنیوال ئٹ، ہراٹی اسٹ نا خف ایلو نا بامس آن و اسٹ نا کاٹم ایلو نا کوپہ ءِ درست کننگ مننگ کتوکہ، ای ورنائی نا جوزہ ئٹ فیصلہ کریٹ کہ ای دا جشنِ طرب نا قانود آتے بدل کیوہ و دانا بست و بند ءِ بے بالوٹ۔ بھاز سادئی تون، ای دا ہال ئٹ تینا فطری دروشم و ہڑدے ئی پُچ آتے بینوک پیہاٹ۔ کنا دوٹی کنا اولیکو شاعری نا کتاب قالت لی سمراء )سراء کنتون پارے( ئس۔ ہرا پارہ غا توار بش مس۔ جشنِ طرب نا خنک کنا کشنگ نا خواست کریر۔ دافتیان اسٹ پارے، پیشن نا پیہوک ئسے، ایلو پارے، بیدس ٹکٹ پیہانے، مسٹمیکو پارے، ولدِ حرام ئسے، دا ننا خاہوٹی لڑ ئٹ کس ئتون ہم ہم رنگ اَلور۔ گواچنی ای دا لڑ آن تعلقدار کس اسیتون ہم ہم دروشمی تختوٹہ، و نہ ای اوفتو ہم دروشم مننگ خواہسوٹہ۔
کنے دا ہیت اسُل دوست بفک کہ اسہ ہم شاعر اسیتون کنا حیثیت سیامی جاڑی تا مرے۔ ادب ئٹ سیامی جاڑی تا بخت ئٹ مالو آن مرک نوشتہ کننگانے۔ دا بندغ آک کنے بد رد کریر انتیکہ ای الشفری تون ہم دروشم اَلوٹ۔، و دا سوب ہم کہ کنا کلام و پُچ آک عصری ئسر۔ ہراتم اوفتا پارہ غا دو مریفیٹ گڑا اوفک کنتون دو ہلتور انتیکہ کنا پژہ غاک گروشکی و کنا خنک خرّن ئسر۔
چِل ئنا دہ یک ئٹ دمشق نا دروشم بدل آ مجلس ئٹ فساد بش کننگ اسہ آسان ءُ کاریم اس اَلو انتیکہ اوفتا دا پروگرام کم و وَد ہزار سال آن تیار بریسہ بننگ ئس۔ ہزار سال آن دا پروگرام نا مہمانک اندا بندغاک ئسر۔ اوفتا شراب ہمو ئس و اوفتا چھاپ ئنا ڈول ہمو، اسپر ہمو و زمغ ہم ہمو۔ دا پروگرام نا مہماندار و مہمانک اوار مریسہ اسہ کمپنی اس ٹہیفیرہ ہرا دا شئری مجلس نا بست و بند ءِ کریکہ۔ دا مخلوق اونا مجلسِ ادارت ئٹ اسہ ہم پوسکنو باسک ئسے اوار کتورہ۔ دا شئر سرمایہ داری نا بھیم نا شیف ننے آ لازم مسوسس کہ نن نافرمانی و مزاحمت نا بناء ءِ کین۔
عربی شاعری قرونِ وسطیٰ نا قلعہ تا ڈول اسہ سنگی قلعہ اس ئس۔ دا قلعہ ءِ پرغنگ اسہ جنونی گڑاس ئس، بلکن دا عمل بے شرفی و کفر آن خڑک ئس۔ بھیم نا کیہی ڈول آک ئسر؛ لغوی، دیہاڑی، بلاغی، نحوی، اخلاقی و دینی۔ لوز ‘ہمزہ’ ءِ اونا کرسی آن شیف کننگ و اودے سطر آ نوشتہ کننگ نا خیال معاملہ ءِ پاہو نا چِٹ اسکان سر کریکہ۔ ہر دننگا کوشست ہرانا مسخت خلیل بند احمد فراہیدی نا شطرنج آ تالان اسہ ہم مہرہ ئسے سریفوئی مرے، او گوازی نا قانود آن پیشن مننگ نا سوب مریک، و مابت یا جنس نا سلطنت آن خڑک مننگ لجی مروک جلہو گمان کننگاکہ ہراٹی فوجی عدالت آک فیصلہ نا پرمان تے تسورہ۔
دی بلوچستان پوسٹ : دا نوشت اٹ ساڑی ہیت و خیال آک نوشتوک نا جند ئنا ءُ، دی بلوچستان پوسٹ میڈیا نیٹ ورک نا دا ہیت آتے مَننگ الّمی اَف و نئے کن دا ادارہ نا پالیسی تا درشانی ءِ کیک۔