بلوچستان نا بنجاہی شار کوئٹہ ئٹ زوراکی نا بیگواہی تیٹ ترندی نا برخلاف وائس فار بلوچ مسنگ پرسنز نا پاننگ آ اینو اسہ دپدرشانی اس کننگا، اندن کراچی ٹی بلوچ یکجہتی کمیٹی نا پارہ غان پریس کلب نا مونا اِرا دے ئی علامتی بین برانزی کیمپ اس ٹہفنگانے۔
بلوچ یکجہتی کمیٹی کراچی نا پارہ غان علامتی بین برانزی کیمپ اینو بنا مس اندن پگہ دپدرشانی ئسے نا ہم پڑو کننگانے۔
برانز ئٹ بلوچ یکجہتی کمیٹی نا باسک آتیتون اوار تدوکا دے تیٹ دزگیر مننگ آن گڈ زوراکی ئٹ بیگواہ غا بلوچ ورنا داد شاہ بلوچ نا خاہوت ہم اوار مس اندن برانزیک برجاء منہ دے تیٹ بلوچستان آن زوراکی ئٹ بیگواہی نا گواچی بندغ تا بینر تے ارفیسر و اوفتے یلہ کننگ نا خواست کریر۔
کیمپ ئٹ تولوک آتا پاننگ ئس کہ برجاء تُوہ نا ارٹمیکو ہفتہ ئٹ سی ئنا خڑک زوراکی نا بیگواہی تا تدینیک مونا بسنو و ہڑدے دافتیٹ ودکی مریسہ ءِ ہڑدے اسہ بلوچ ورنا اس پوسٹر اس جوڑ مننگ ءِ اندن ریاست دا غٹ ظلم آتیٹ کڑد سر تریسہ سیاسی و فوجی ڈول ئٹ دا ظلم آتے سر تننگ ءِ ہرا بلوچستان ئٹ پاکستان نا جوڑ مننگ آن ہلیس اینو اسکان برجاء ءُ۔
کیمپ ئٹ اوار مروک کراچی ہاکس بے آن فورسز و ڈھکوک ادارہ تا دو آن زوراکی ئٹ بیگواہی نا گواچی داد شاہ بلوچ نا ہیڑ فوزیہ بلوچ پارے کہ 11 اگست نا نن سکیورٹی کارندہ غاک اوفتا اُرا غان باوہ نا ساڑی گری ٹی اونا ایلم ءِ زور ئٹ برمتہ کریسہ تینتون دریر۔
ایلو پارہ غا بلوچستان نا بنجاہی شار کوئٹہ ئٹ زوراکی نا بیگواہی تیٹ ترندی نا برخلاف اینو بیگہ نا کوئٹہ پریس کلب نا مونا اسہ برانز اس اڈ تننگا۔ برانز ئٹ بیگواہ بندغ تا خاہوت آتیتون اوار جتا فکر نا بندغ آک اوار مسر۔
زوراکی ئٹ بیگواہ آصف و رشید بلوچ نا ہیڑ سائرہ بلوچ پارے کہ کنا ایلم تا بیگواہی ءِ پنچ سال مننگ ءِ نن تپنہ کہ ہرانگ کان۔ ننا دوستخواہ تے یلہ کننگ نا جاگہ غا ننے جتا ڈول تیٹ تڑی تننگک و کاغد آتیا “موت” نوشتہ کریسہ ننے آ خسنگک کہ نن چھپ مرین ننتون داسہ ہچو کسر اس اف، کنا اسہ سادہ ءُ خواست ئسے کہ کنا ایلم تے یلہ کننگ مرے۔
کوئٹہ غان دوارہ زوراکی ئٹ بیگواہ مروک فیاض علی نا زائیفہ نرگس فیاض ہم برانز ئٹ اوار ئس۔ او تینا اَرغ نا یلہ کننگ نا خواست کریسہ پارے کہ ننے پاننگے کہ علی نا باوہ ہرانگ ءِ؟ نن چنکا علی ءِ انت ورندی ایتن ہراتم او ہوغسہ تینا باوہ نا ہرفک، نن انصاف کن کان گڑا ہرانگ کان، چرجوئی ئٹ تنک کریسہ ننا زند ءِ عذاب جوڑ کننگانے۔