بلوچستان نا بنجاہی شار کوئٹہ آن پاکستانی لشکر زالبول و اونا اِرا چنا تون اوار چار بندغ ءِ دزگیر کریسہ نادرست ہند آ درینے۔
بلوچ نیشنل موومنٹ نا بندغی حق آتا ادارہ پانک نا ردئٹ اِرا دے مالو 28 اگست آ پاکستانی سکیورٹی فورسز آک کوئٹہ نا یونائیٹڈ ہوٹل آ چھاپہ خلیسہ ہموڑے ساڑی سبی بدرا نا ہندی بلوچ زالبول نور خاتون ءِ اونا مار عبدالغفار و مسڑ بانڑی تون اوار دزگیر کریسہ نادرست ہند آ دریر۔
گل بندغی حق آتا ادارہ و حکومت آن خواست کرینے کہ بلوچ زالبول و اونا چنا تے دمدستی یلہ کننگ مرے۔
اندن بلوچستان نا بنجاہی شار کوئٹہ ٹی سریاب نا علاقہ منیر احمد روڈ آ پاکستانی فورسز آک اسہ ارا ئسے آ چھاپہ خلسہ ارا ٹی ساڑی بندغ تے بیدادی نا گواچی کریر و ارا ٹی بھس کاری کریر۔
حوال تا ردئٹ فورسز آک چھاپہ نا وخت آ ارا ٹی ساڑی محمد حسن ولد محمد اکرم بنگلزئی پنی ءُ ورنا ئسے دزگیر کننگ آن گڈ تینتون اوار دریر۔
محمد حسن نا سیال آک پک کریسہ پاریر کہ فورسز کارندہ غاک ننکان ارا غان محمد حسن بنگلزئی ءِ زوراکی ئٹ تینتون اوار دریر ہراڑان گڈ اونا باروئٹ ہچ وڑ ئنا معلومداری رسینگتنے۔
داڑان مست محمد حسن نا سیال آک زوراکی ئٹ بیگواہی نا گواچی مسنو، محمد حسن نا خاہوت محمد حسن نا زو رکھوک یلہ کننگ نا خواست کرینے۔
خیال ئٹ مرے بلوچستان نا بنجاہی شار کوئٹہ ٹی اینو وائس فار مسنگ پرسنز نا پارہ غان بیدادی آن زیمی بندغ آتا جہانی دے نا ردئٹ اسہ مجلس اس ہڈ تس۔
ایلو پارہ غان پاکستان نا بنجاہی شار اسلام آباد ئٹ پریس کلب نا مون آ زوراکی ئٹ بیگواہ آصف و رشید نا خاہوت نا پارہ غان ارٹمیکو دے ہم برانزی کیمپ برجاء مس۔ اندن زوراکی نا بیگواہی تیان زیمی مروک آتا جہانی دے نا ردئٹ دپدرشانی کننگا۔
یاتی مرے بلوچستان ئٹ برجاء مرغن آ زوراکی نا بیگواہی تا لڑ ئٹ ہر وخت بلوچ زالبول آک ہم زوراکی ئٹ بیگواہی نا گواچی کننگرہ داڑان مالو برجاء سال کوئٹہ آن ماہل بلوچ ءِ ہم اونا چنا تیتون اوار بیگواہ کننگاسس واہم پدان اودے مونا ہتیسہ منہ تُوہ آن گڈ ضمانت آ یلہ کننگاسس۔
ماہل بلوچ آن مالو کراچی، آواران و کیچ آن ہم بلوچ زالبول تا دزگیری آن گڈ زوراکی نا بیگواہی تا احوال آک رسینگانو اندن سرکاری کوالخواہ و سکیورٹی فورسز آتا پارہ غان دا زالبول آتیا سلہہ بند گل آتیتون تعلقداری نا دوبہ پاش کننگانے۔
بلوچستان ئٹ زوراکی نا بیگواہی تا توننگ کن کاریم کروک گل آتا پاننگ ءِ کہ پاکستانی فورسز آک اسہ دہائی آن زیات وخت آن بلوچ ورنا تے بیگواہ کریسہ بھیم نا نظام ءِ ٹہفنگ خوائرہ ہراڑان گڈ داسہ زالبول تے ہم ٹک کننگک اندن دا غٹ زوراکی نا بیگواہی تیٹ پاکستانی لشکر و ڈھکوک ادارہ غاک اوار ءُ۔