بلوچستان نا علاقہ قلات، زامران، بولان و بلیدہ ٹی بلوچ سلہہ بند گل آک جتا جلہو تیٹ پاکستانی لشکر، سیاڈی کیمرہ و ریاستی منصوبہ تیکن کاریم کروک ڈمپر ئسے ٹک کننگا۔
ٹی بی پی نیوز ڈیسک ءِ رسینگوک حوال تا ردئٹ قلات نا علاقہ ہربوئی اسکلکو نا ہند آ سلہہ بند بندغ آک پاکستانی لشکر نا اسہ کیمپ ئسے ٹک کریر۔ فورسز آتیا استو جلہو کننگا، اندن جلہو نا سوب آن کارندہ تے نسخان ارفنگ نا احوال آک ہم رسینگانو واہم کوالخواک دا بابت ہچو ہیت اس مونا ہتنو۔ پن کروک علاقہ ئٹ تیل و گیس پٹوک کمپنی تے سکیورٹی فراوان کننگ کن جتا ہند آتیا فورسز چوکیک ٹہفوک ءُ۔
اندا وخت ئٹ زامران پلکی ئٹ سلہہ بند بندغ آک فورسز آتا چوکی ءِ جلہو ئٹ ٹک کریر و نرار۔ ہندی احوالکار تا ردئٹ جلہو آن گڈ پاکستانی لشکر نا پارہ غان جتا پارہ غاتیا مارٹر گولہ خلنگا واہم ہچ وڑ نا نسخان تا حوال رسینگتو۔
ایلو پارہ غان بلوچستان نا ہند بولان نا علاقہ پیر اسماعیل، انڈس ئٹ پاکستانی لشکر ءِ سلہہ بند جلہو ئٹ ٹک کننگانے، ہرا نا سوب کارندہ تے جانی نسخان ارفنگ نا حوال آک ہم رسینگانو۔
پن کروک جلہو تا ذمہ واری ءِ بلوچ لبریشن آرمی نا ترجمان جیئند بلوچ ارفیسہ پارے کہ ننا سرمچار آک قلات، زامران و بولان ئٹ مُسہ جتا جلہو تیٹ کوزہ گیر پاکستانی لشکر نا مُسہ کارندہ مرگ ئنا گواچی و ہشت ٹپی کریر و اسہ جاسوسی کیمرہ ئسے بھس کریر۔
او پارے کہ بی ایل اے نا سرمچار آک استو قلات نا علاقہ ہربوئی اسکلکو نا ہند آ ٹہفوک کوزہ پاکستانی لشکر نا کیمپ ءِ ٹک کریر، سرمچار آک رکھوک چوکی آ ساڑی اسہ کارندہ ئسے مرگ ئنا گواچی کننگ آن گڈ کیمپ آ بھلا سلہہ تیٹ جلہو کریر ہرا نا سوب کم آن کم پین اِرا کارندہ ٹپی مسر۔
او پارے کہ سرمچار آک اسہ پین جلہو اسیٹ زامران نا علاقہ ارچنان کور ئٹ کلکی نا ہند آ کوزہ گیر پاکستانی لشکر نا پوسٹ ءِ بھلا سلہہ تیٹ ٹک کریر، جلہو ئٹ اِرا دژمن کارندہ ہند آ مرگ ئنا گواچی اندن کم آن کم مُسٹ ٹپی مسر، اندن دا وخت آ سرمچار آک پوسٹ آ خلوک اسہ جاسوس کیمرہ ئسے ہم ٹک کریسہ بھس کریر۔
جیئند بلوچ پارے کہ بی ایل اے نا سرمچار آک اسہ پین جلہو اسیٹ 24 اگست 2023 آ بولان نا علاقہ پیراسماعیل، انڈس ئٹ کوزہ گیر پاکستانی لشکر نا اسہ پوسٹ ئسے بھلا سلہہ تیٹ ٹک کریر، جلہو ئٹ کم آن کم مُسہ کارندہ ٹپی مسر۔
ایلو پارہ غان بلوچ سلہہ بند گل بلوچستان لبریشن فرنٹ بلیدہ ٹی اِرا جتا جلہو تا ذمہ واری ءِ ارفیسہ پارے کہ ننا سرمچار آک استو یک بجہ چِل منٹ آ تربت و بلیدہ نا کسر ئٹ ٹہفوک سوراپ چڑھائی نا شیف آ جھپ کریسہ پاکستانی لشکر نا گاڑی و موٹر سائیکل آتیا ہنوک اسہ قافلہ ئسے آ جلہو کریر ہرا نا سوب دژمن لشکر نا اسہ بھلو آفیسر اسیتون اوار چار کارندہ مرگ ئنا گواچی اندن اِرٹ ٹپی مسر۔
ترجمان نا پاننگ ئس کہ دا کارروائی گل ءِ رسینگوک ڈھکوک احوال تا بنداو آ سر تننگا، پن کروک آفیسر قافلہ نا دروشم ئٹ علاقہ ٹی لشکر کشی نا تیاری تا جاچ ءِ ہلنگ کن ہننگ ئس۔
اونا پاننگ ئس کہ درو 31 اگست آ سرمچار آک میناز بلیدہ ئٹ کہدا واجداد نا پمپ آن خڑک ریاستی منصوبہ تیا کاریم کروک اسہ ڈمپر ئسے ہشار۔ بلوچ سرمچار آک ریاستی منصوبہ آتیا کاریم کروک آ مزور آتے و ڈمپر ڈرائیور ءِ بندغی ہمدڑدی نا بنداو آ بیدس نسخان آن خبڑدار کریسہ یلہ کریر۔