2023 نا نوبل امن داد ایران ئٹ زالبول تا حق آتیکن کاریم کننگ نا بدلہ ئٹ 12 سال آن جیل ئٹ بند بندغی حق آتا باسک نرگس محمدی نا پِن آ کننگا۔
نرگس محمدی ایران ئٹ زالبول تا حق آتا بحالی و سزائے مرک ئنا ایسری کن کاریم کننگ ءِ ہرانا سوب آن اودے جتا وخت آتیٹ قیذ و بند ئتون مون تروئی تمانے۔
ناروے نا نوبل کمیٹی 2023 نا نوبل امن داد نا پڑو کریسہ پارے کہ دا فیصلہ ایران ئٹ زالبول تیتون مروک بے دادی نا برخلاف نرگس محمدی نا جہد، بندغی حق و غٹ بندغ آتیکن آجوئی نا تالانی کن اونا جہد نا سوب کننگا۔
ناروے نا نوبل کمیٹی نا سروک بیرت رئیس اینڈرسن پارے کہ او اندنو وخت ئسے آ نرگس محمدی کن نوبل امن داد نا پڑو کننگ ءِ کہ دا وخت نرگس جیل ئٹ بند ءِ۔
مجلس ئٹ بیرت رئیس اینڈرسن آن ہراتم سوج کننگا کہ دسمبر ئٹ نوبل داد تننگ نا مجلس نا وخت انت مرو، انتئے کہ نرگس تو جیل ئٹی ءِ۔
دانا ورندی تریسہ بیرت رئیس اینڈرسن پارے کہ ایرانی کوالخواہ تیکن دا جوانو فیصلہ اس مرو اگہ او نرگس محمدی ءِ یلہ کیرہ و اودے دسمبر ئٹ داد دوئی کننگ نا موکل ایترہ۔
نرگس محمدی دا وخت تہران نا اوین جیل بند ءِ۔ اودے جتا مقدمہ تیٹ 12 سال قیذ نا سزا تننگانے۔ بندغی حق آتا تنظیم فرنٹ لائن ڈفینڈرز نا ردئٹ نرگس محمدی جتا وخت آتیٹ قیذ کننگانے۔ اوڑا خلوک دوبہ آتیٹ ریاست نا برخلاف پراپیگنڈا کننگ ہم اوار ءِ۔
نرگس محمدی ڈفینڈرز آف ہیومن رائٹس سینٹر نا نائب راہشون ہم مسنے۔ دا بے سرکاری تنظیم نا سروک شیریں عبادی ءِ 2003 ئٹ امن نا نوبل داد تننگاسس۔
1901 آن 2022 اسکان 140 بندغ ءِ 103 وار امن داد نا شرف تننگانے۔ دا ہمو شش انگا داد آتیان اسٹ ءِ ہرادے سویڈش کیمیا دان الفریڈ نوبیل 1895 ٹی ٹہفیسس۔
ایلو داد آتا ڈول تیٹ ادب، فزکس، کیمسٹری، فزیولوجی اوار ءُ، ہرافتا پڑو برجاء ہفتہ ٹی مالو آن کننگانے۔
یاتی مرے خدو امن داد بیلاروس نا بندغی حق آتا وکیل ایلس بیالٹسکی تون اوار بندغی حق آتا اِرا تنظیم روسی گروپ میموریل و یوکرین نا سینٹر فار سول لبرٹیز ءِ تننگاسس۔