سفر زند و شاعری
نوشت: نزار قبانی | مَٹ: عتیق آسکوہ بلوچ
ہفتدہمیکو بشخ
بیدس اُروک آ ودار
شاعری کنا رہی آ بیدس اُروک آ ودار ءِ۔ دا ہمو عملی پروگرام ئس ہرادے ای مونا تخاٹ، و تینا بنائی شاعری آن پورو سختی تون داڑا عمل کریٹ۔ اگہ نن مخلوق تون ہمو ہیت ءِ کین ہرادے اوفک وڑ نا وڑ اسیٹ مالو نا دروشم ئٹ وختی آن چارہ، دنکہ، ‘رکھ دود و ربیدگ آتا گڑد لیک ئٹی مننگ آن ءِ۔’، ولے اگہ نن اوفتا مون آ ناگمان آن ہمو ہیت ءِ کین ہرانا اوفک ودار ئسر یا ودار الور ہم، گڑا دا تیوہ غاک ٹہیفوک ادبی دود آتا شیشہ ءِ شیشپہ کریسہ شعری گیاوان نا پارہ غا پیشن مننگ نا ہیت ءِ۔
کنا خڑک آ دود و ربیدگ شعری باوری تا کتاب ئسے ہرا مقدس گڑاتا دروشم دوئی کرینے، ہراڑا ہور ارفنگ یا اونا برخلاف ہیت کننگ ہچبر جائز اف۔ گڑا دود و ربیدگ نا مطلب ءِ دیہاڑ نا اسہ ٹہیفوک اسٹیشن ئسے آ مدامی کن سلینگ، ہراٹی پیہوک آتے نہ پیہنگ نا موْکل ءِ و نہ پیشن مروک آتے پیشن مننگ نا۔ دانا مطلب ہمودے ہرادے نم سرپد مننگ اُرے، کہ تیوہ غا شعرائے عرب ءِ، اونا ایب کیب، ربیدگ و زمانہ تا شرہ ئی تیان گڈ ہم، اسہ اندنو متکنو ہوٹل اسیٹ زوراکی تون بند کننگک ہراٹی نہ اسہ لفٹ اس مرے، نہ فرج و نہ ایرکنڈیشنر۔ و دانا ایسری مطلب دادے کہ بلاغت و درشان نا جتا دروشم بُت یا خل جوڑ مریر، یا اندنو جائے نماز ئسے نا دروشم دوئی کیر کہ نما نا قبولیت اوڑا خواننگ تون گنڈوک مرے، یا گڑا تریت نا رکابی نا دروشم دوئی کے ہراڑان نمن یا ایلو رکابی تون اودے بدل کننگ کس ئسے نا وس ئٹ مف۔ ای تریت آن دا سوب آن نمن افٹ کہ او تریت ئسے بلکن ای تو ہمو تیار آن تیار خوراک آن نمن اُٹ ہرا کنا زند ئٹ عادت و برجاء قدر ئنا ہند دوئی کے۔
شاعر نا گچینی نا درشان متکنا سرحال آتیان پوسکنا کلام جوڑ کننگ نا قدرت آن مریک، مثیال کن مابت اسہ متکنو سرحال ئسے ولے داٹی ساندئی پوسکنو کلام ٹہیفنگ نا گنجائشت ساڑی ءِ۔ ہمو شاعری نا انت قدر و نہاد اس مننگ کیک ہرا پٹ و پول مروک گڑاتے پٹے، و متکنا زمانہ نا خل تے اندن کاریم اٹ ہتے دنکہ اوفتے مالو کاریم اٹ ہتنگاسس؟ فطرت تو واپس درشان و ہم دروشم مننگ کیک، شاعری ہچبر نہ۔ ڈغار زیتون نا اِرا ہم دروشم درخت یا خولم نا اِرا ہم رنگ خوشہ تا مننگ کیک، ولے نم دا ہیت ءِ ہچبر دوست تخپرورے کہ اِرا شاعری اسہ ڈول نا کلام مونا ہتیر۔ دا ہمو گواچن ءِ ہرا نوشتہ کننگ وختا کنا ہور تیا گڈو مروک مریک۔ ای تینے تینٹ اُریسہ کیوہ ہرا دڑد ئنا کچ اسکان ہناکہ و دوارہ تینے آن سوج کریٹہ؛ انت دا لوز آک ہرافتے ای کاغد آ نوشتہ کرینٹ، لوز آتا اہرام آتیٹ اسہ گڑا ئسے نا ودکی کرور، لوز آتا ہمو اہرام ہرافتے متکن آن متکنا زمانہ آتیٹ پوسکن بندغی کاریم اٹ ایسنے؟ اگہ دا لوز اسہ گڑا ئسے نا ودکی کننگ افس گڑا دافتا و کنا قدر انت سلیک؟
کنا اُست خواہی ئس کہ کنا اسہ چنکو شعری اُرا اس مرے ہرادے ای تینا ذوق نا رِدئٹ شون ایتیو، اُرا نا گڑا تے تینا ذوق نا رِدئٹ بشخیو، دیوالی کاغذ تینا ذوق نا رِدئٹ گچین کیو۔ شاعری نا معاملہ ئٹ کرایہ داری والا پالیسی آ ای باوری تخپرہ، دا سوب کہ ایلوفتا اُرا تیٹ ہندی مننگ آن نہ ایشکامی نصیب مسونے نہ باسنی۔ سی سال اسکان نوشتہ کننگ آن گڈ، داسہ ای پورو معروضیت تون دا ہیت ءِ کننگ کیوہ کہ کنا اسہ چنکو شعری اُرا اس جوڑ مسونے۔ مخلوق اودے اونا خیسن آ ٹائل تیان چاہک۔ اونا درغ ساندہ دے و چُک آتیکن ملوک مریک۔
دود آتا مون آ سلینگ کنے دمدر کریکہ۔ ای دا ہم کننگ کریٹہ کہ ایلوفتیانبار مفادپرستی نا صدری ءِ بینوسٹ و پُتک تروک میخ تیا چرینگ آن چھپ مروسٹ۔ ای دا صدری آن ہمو وخت نمن مریوہ ہراتم دادے بیننگ نا مطلب دا مرے کہ ای تینا ٹوپ ءِ ہمو تیوہ غا افکار و دود آتا مون آ کاٹم آن شیف کیو ہرافتے ای تینا ودی مننگ وختا بیرم آ ساڑی خناٹ۔ صدری سلینگ نا اندنو ہند ئسے ہراڑے سلوئی مفک، دا اسہ لغوری و شیف حیثیت نا چمشانک ئسے ہرا نہ تو تینٹ اُست جم مریک و نہ کس ءِ خار ایتک۔ دا اسہ بدن ئسے ہرا نشہ نا عادتی مسونے۔ صدری بیننگ تو بھاز آسانی نا ہیت ئسے، یعنی نی ہچس کپہ و اودیم مہ۔ اودیم مننگ کن انداخس بھاز ءِ کہ نہ ٹَک خل، نہ نوشت کہ، نہ کتاب اس شینک کہ، نہ اسہ جلوس اسیٹ ہن، نہ اسہ سیاسی جماعت اسیٹ اوار مہ، نہ اسہ زالبول اسیتون اسہ اُلسی ہند ئسے آ خننگ۔
ہر بندغی کاریم اسہ نہ اسہ سختی اسیتون مریک، یا گڑا اسہ سختی ئسے نا پارہ غا دیک۔ دنکہ زوربا یونانی پاریسس؛ ‘بیرہ مرگ ءِ ہراٹی ہچو سختی اس اف۔’ بندغ بیرہ سُر پُر کننگ، ہیت کننگ و درشان کننگ آن ہی گٹ مریک۔ نوشت کننگ تو بھلو گٹ مننگ اس مریک۔ دا تو اسہ اندنو اسکینڈل ئسے ہرادے پینگن چینی سیاہی آن نوشت کننگ مرے۔ ای تیوہ زند ئنا تیوہ غا پِڑ و تینا تیوہ غا نوشت آتیٹ گٹ مسوٹ، و بے شرفی نا ہُلی آ سوار مسوٹ۔ دیکارت نا پنی آ اصول؛ ‘ای ٹَک خلیوہ اندا سوب ای ساڑی اُٹ۔’ کنے اسہ پین جتا فارمولہ ئسے نا پارہ غا دیک؛ ای شئر نوشتہ کیوہ، اندا سوب بے شرف اُٹ۔