کیچ نا علاقہ تربت ئٹ پاکستانی لشکر نا دو آن اسہ ورنا اس زوراکی ئٹ بیگواہ اندن اسٹ اس یلہ مریسہ تینا اُرا ءِ سر مس۔
تربت نا علاقہ آبسر ئٹ پاکستانی لشکر استو یک بجہ غا چھاپہ خلیسہ اسہ ورنا ئسے زوراکی ئٹ بیگواہی نا گواچی کریسہ نادرست ہند آ درینے۔ پن کروک ورنا نا چاہنداری مولا بخش نا مار بالاچ نا پن ئٹ مسنے۔
ہندی احوالکار تا ردئٹ استو یک بجہ غا تربت نا علاقہ آبسر ئٹ پاکستانی لشکر چھاپہ خلیسہ پن کروک ورنا ءِ دزگیر کریسہ نادرست ہند آ درینے۔
احوالکار تا پاننگ ءِ کہ پن کروک ورنا نا تعلقداری بھاز غریب ءُ خاہوت ئسے آن ءِ و ورنا پُچ موغنگ نا کاریم کریسہ تینا خاہوت ءِچلفک۔
ایلو پارہ غان تربت نا علاقہ آبسر آن چار دے مالو پاکستانی لشکر نا دو آن زوراکی ئٹ بیگواہ مروک ورنا نواب حاصل استو یلہ مریسہ تینا اُرا ءِ سر مس۔
نواب حاصل نا خاہوت تربت ئٹ برانز نا پڑو کریسس واہم استو نواب حاصل نا یلہ مننگ آن پد خاہوت برانز کپننگ نا پڑو کرے۔
ہندی احوالکار تا ردئٹ نواب حاصل استو یک بجہ نا وخت آ تینا اُرا ءِ سر مس۔
خیال ئٹ مرے چار دے مالو تربت نا جتا علاقہ تیان نواب حاصل تون اوار چار ورنا ءِ زوراکی ئٹ بیگواہ کننگاسس، ایلو مُسہ ورنا دائسکان یلہ کننگتنو۔
ورنا تا زوراکی نا بیگواہیک اندنو وخت ئسے آ مونا بسر ہراتم بلوچستان نا نگران وزیر اعلی علی مردان ڈومکی تربت نا دورہ غا ہناسس ہراڑے او تعلیمی ادارہ تا دورہ تون اوار سلہہ بند کوالخواہ تیتون اوڑدہی کرے۔
سلہہ بند کوالخواہ تیتون اوڑدہی ٹی نگران وزیر اعلی تربت شار و ایب کیب ئٹ رکھ ئنا بابت شرہ کریسس۔