بلوچ اسٹوڈنٹس کونسل بھاولپور نا سالانہ بلوچی دیوان پن آ شاعرِ آشوب خواجہ مبارک قاضی نا سرسہبی ئٹ ایسر مس، دیوان نا مہمان خاص بلوچ دیہاڑ نوشتکار و مورخ ڈاکٹر فاروق بلوچ و بلوچی بولی نا پروفیسر ڈاکٹر حامد علی بلوچ ئسر۔
ڈاکٹر فاروق بلوچ ہیت کریسہ پارے کہ انگریز اسہ کوزہ گیر ئسے نا دروشم ئٹ بلوچستان ئٹ بس و بلوچ دیہاڑ ءِ لتاڑیسہ بلوچ آتے بھاز نسخان تس، کوزہ گیر آن گلہ اف انتیکہ اونا کاریم بلوچ آتے ہر پارہ غان محکوم کننگ ئس، ولے اُست ہسونی نا ہیت دادے کہ ننا ہندی مورخ و نوشتکار آک انگریز نا تروکا بیانیہ ءِ بھلو کچ ئسے آ تالان کریر۔
ڈاکٹر حامد بلوچ تران کریسہ پارے کہ بلوچی بولی اسہ بھاز بھلو بولی ئسے ہرا ڈیہہ ئٹ پاننگک ولے اودے ایسر کننگ نا بھاز کوشست کننگانے و داسہ وخت بسنے کہ ہمو علاقہ تیٹ بولی آ کاریم کننگ مرے ہراڑے اودے ایسر کننگ نا کوشست کننگانےخاص وڑ ئٹ پنجاب و سندھ ئٹ ہراڑے بلوچ آتا بھلو کچ اس ساڑی ءِ۔
ڈاکٹر آے آر داد بلوچ مبارک قاضی نا زند، شاعری و کتاب آتا بابت تینا خیال آتا درشانی ءِ کرے۔
پینل ڈسکشن نا سرحال ’نوآبادیات‘ ئس و مہمان میردوست بلوچ و محمود بلوچ ئسر ہرافک نوآبادیاتی نظام نا زی آ ہیت کریر۔ داڑان پد مجلس ئٹ مشاعرہ، ٹیبلو، ڈرامہ و شئر و باگل پاننگا۔
مجلس نا ایسری بشخ شئر و باگل ئس ہراڑے استاد سلیم بلوچ و سعید بلوچ تینا فن ئنا درشانی کریر۔