بلوچستان ئٹ بیست و چار گھنٹہ نا وخت آ گچین کاری دفتر و امیت وار آتیا مسہ جلہو کننگا۔
بلوچستان نا شار مستونگ ئٹ درو ننکان پاکستان پیپلز پارٹی نا امیت وار نور احمد بنگلزئی نا گچین کاری دفتر آ چغلی بمب جلہو کننگا، ہرا ترند توار ئٹ ترخا۔
تراک نا سوب آن ہچو وڑ ئسے نا جانی نسخان آتا احوال اف۔
پیپلز پارٹی امیت وار نور احمد بنگلزئی آ دوبہ خلننگک کہ او پاکستانی لشکر و ڈھکوک ادارہ تا کمک ئٹ سلہہ بند ٹولی تا راہشونی ءِ کیک۔ تیوہ بلوچستان ئٹ دا سلہہ بند ٹولیک ڈیتھ اسکواڈ نا پن ئٹ چاہنگرہ۔
ضلع کیچ ئتون اوار ایلو ضلع تیٹی ووٹ آتا خڑک بننگ آن کیہی بندغ آک پیپلز پارٹی ٹی اوار مسر ہراڑان پیپلز پارٹی ءِ بلوچستان ئٹ نغد کاری تون مون تروئی تمنگ ءِ۔
سیاسی و چاگڑدی کڑدہ غاتا پاننگ ءِ کہ پیپلز پارٹی ٹی اوار مروکا بندغ آتیٹی ڈیتھ اسکواڈز نا سروک و نشہ بہا کروک بندغ آک اوار ءُ۔
ایلو پارہ غان اسلام آباد ئٹ بلوچ برانزی تا برانز ءِ لتاڑنگ کن ٹہیفوک ”سرکاری کیمپ“ نا سروکی ءِ پیپلز پارٹی آن تعلقداری تخوکا جمال رئیسانی کننگ ءِ۔ پن کروک کیمپ ئٹ ساڑی کیہی بندغ آتا چاہنداری بلوچستان ئٹ ڈیتھ اسکواڈز نا باسک و سروک آتا وڑ مسنے۔
استو خاران شار ئٹ ہم پیپلز پارٹی نا صوبائی اسمبلی نا امیت وار نور الدین نوشیروانی نا اُرا نا مون آ ترند ءُ تراک ئس مس واہم اونا سوب ہچو جانی نسخان ئس متو۔
داکان مست درو دشت کھنڈان نا علاقہ ٹی نادرست آ سلہہ بند بندغ آک نیشنل پارٹی نا امیت وار و مسکوہی وزیر لالہ رشید و سنیٹر کہدہ اکرم دشتی نا مچی آ سم کاری کریر ہراڑان او رکھوک مس۔
تدوکا دے تیٹی تربت ئٹ پاکستان مسلم لیگ ن نا قومی اسمبلی نا امیت وار سنیٹر اسلم بلیدی اسہ جلہو اسیٹی ٹپی مسوسس وختس کہ کوئٹہ ٹی جمعیت علمائے اسلام نا راہشون و امیت وار آ سم کاری کننگا ہراڑان او رکھوک مس۔
یاتی مرے کہ بلوچستان نا آجوئی دوست و راج دوست پارٹی و سلہہ بند تنظیم آک پاکستانی گچین کاری تے رد کریسہ کرینو وختس کہ زور مروکا گچین کاری تا بناء مننگ آن گڈ آجوئی دوست تنظیم آک اُلس ءِ گچین کاری مہم آتیان مر مننگ نا خواست کرینو۔