یوکرین نا سیم تون تفوک جاندمی بیلگورود ئٹی روس ئنا ایلیوشین 76 فوجی ٹرانسپورٹ جہاز تمِسہ بھس مس۔ تدینی ٹی کم آن کم شست و پنچ بندغ کھسکر۔
خبر تروک ادارہ روئٹرز روسی وزارت دفاع نا بارو ئٹ 65 بندغ کہنگ نا رپورٹ ءِ تس۔
روئٹرز نا رد ئٹ جہاز ئٹی عملہ نا پنچ بندغ اوار اسر، و دا 90 مسافر ءِ دننگ کریکہ۔ یوکرین نا سیم تون تفوک دا علاقہ دا زوت ئٹ روس ئنا اسہ وڑ جلہو تا پلویڑ ئٹ اس، ہرافتیٹی دسمبر نا میزائل جلہو ہم اوار ءِ ہراٹی 25 بندغ کھسکر۔
ریا نووستی نیوز ایجنسی نا پاننگ ءِ کہ جہاز ئٹ سوار بندغ آتیٹ یوکرین نا سلہہ بند لشکر نا دزگیر مروک کارندہ غاک ہم اوار اسر۔
چاگڑدی احوالکاری تلہ غا شنگ مروک وڈیو تیٹ خننگ مریک کہ یابلونوو خلق ئنا خڑک اسہ جہاز ئس تمِسہ بھس مریک ہراکان گڈ تراک ئس مریک۔
روسی وزارت دفاع نا پاننگ ءِ کہ “جہاز ئٹ یوکرین نا 65 فوجی سوار اسر ہرافتے بیلگورود نا علاقہ غا دننگ اسر۔ تدینی نا سوب نا بارو ئٹ پٹ و پول برجاء ءِ۔ اسہ خاص فوجی کمیشن ئس تدینی نا ہند آ رادہ کننگ مننگ ءِ۔”
بیلگورود نا ہندی گورنر ویاچیسلاو گلاڈکوف نا پاننگ ءِ کہ او سا تدینی نا بارو ئٹ سرپند ءِ وا ہم او دا بارو ئٹ ودیک شابیتی حوال تتو۔
آئی ایل-76 نا اسہ فوجی ہند و بر نا اسہ جہاز اسے ہرا فوجی، کارگو، فوجی مڈی و سلہہ تے جہاز ئٹ دننگ کن جوڑ کننگانے۔