بلوچستان لبریشن فرنٹ نا ترجمان میجر گھرام بلوچ میڈیا غا شنگ کروک تینا اسہ بیان ئسیٹی تربت ئٹ گچین کاری دفتر آ جلہو نا ذمہ واری ءِ ہرفے و الس آن خواست کرے کہ او گچین کاری تیان بائیکاٹ کیر۔
ترجمان پارے کہ پنچ شمبے نا دے دو بجہ غا تربت ئٹ گچین کاری کمیشن نا ہندی دفتر آ سرمچار آک چغلی بمب ئٹ جلہو کرسا تہٹی پیہار۔ دفتر ئٹ تومکا کنڈ آتیان سم کاری ٹی اسہ پولیس کارندہ ئس کھسک۔
بیان ئٹ پاننگا کہ سرمچار آک ہند آ ساڑی 3 پولیس کارندہ نا سلہہ تے ہم ہلکر۔
میجر گھرام بلوچ نا پاننگ اس کہ پاکستانی گچین کاریک کوزہ مروک بلوچستان ئٹ کوزہ گیر نا کوزہ ءِ سوگو کننگ کن ءُ۔ الس آن خواست کینہ کہ او گچین کاری تیان بائیکاٹ کیر۔ ریاستی گچین کاری تیٹ بشخ ہلنگ ریاستی غلامی ءِ منینگ نا بریبر ءِ۔
او پارے کہ ننا خبڑدار کننگ آن بیدس ہم پولیس و ایلو شیفکو ادارہ غاک کوزہ گیر پاکستانی لشکر نا دو آن کارمرز مننگ ءُ، درو جلہو ئٹ کہوک پولیس کارندہ مزاحمت کرے و سرمچار آتیا سم کاری کرے، ہرا نا ورندی ٹی سرمچار آک سم کاری کریر و پولیس کارندہ کھسک۔
ترجمان پارے کہ نن اسہ وار پدا پولیس تون اوار کُل ریاستی فورسز آتے خبڑدار کینہ کہ الیکشن نا دے ہرپولنگ اسٹیشن ءِ سرمچار آک ٹک کرور، گچین کاری تیٹ بشخ ہلوکا تینا ساہ و مال ئنا ذمہ وار تینٹ مرور۔
داکان بیدس بلوچستان لبریشن فرنٹ نا موہکش ڈاکٹر اللہ نظر بلوچ چاگڑدی حوالکاری ویب سائیٹ ایکس آ اسہ پوسٹ ئس کرسا بلوچ راج آن خواست کرے کہ او پاکستان نا گچین کاری تیٹ بشخ ہلپس۔
بلوچی بولی ئٹ لکھوک دا پوسٹ ئٹ اونا پاننگ اس کہ بلوچ راج آن خواست ءِ کہ او نئے بیرہ 8 فروری نا گچین کاری تیٹ بشخ ہلپس بلکن گچین کاری تا برخلاف کمپئین ہم کیر، انتئے کہ پاکستان نا تینٹ اڈ تروک اسمبلی بلوچ راج کن خونی ءُ زہر اسے، آجوئی آن بیدس ننتو پین ہچ کسر اف۔