ہدایت لوہار نا خون
ٹی بی پی سرگپ
پختونخواہ و بلوچستان ئٹ ہرا ریاستی پالیسی تا برخلاف مخلوق برانز کننگ ءِ، ہمو پالیسی تے سندھ ئٹ کاریم ئٹ ہتیسہ ءُ۔
سندھ ئنا راج دوست سیاست تون تفوک ہدایت لوہار ءِ کیہی توہ تے اسکان زوراکی ئٹ بیگواہ کننگ و یلہ کننگ آن پد اودے ٹک کریسہ کسفنگ آن اونا مَسن تے سندھی تا حق آتا سیاست، ریاستی تادی و زوراکی نا بیگواہی تا برخلاف توار ارفنگ آن توننگ مفک دا گام تا ردعمل ئٹ بلوچستان و پختونخواہ نا وڑ سندھ ئٹ ہم مزاحمتی سیاست بناء مرو۔
پاکستان نا جوڑ کننگ تون اوار سندھ مزاحمتی سیاست نا بنجاہ مسنے، آمریت نا برخلاف ترند آ توار سندھ آن بش مس، ایم آر ڈی و بحالی جمہوریت ئٹ اولیکو چر ئنا کڑد سندھ ئنا بندغ آک سر تسنو و مشرف آمریت نا برخلاف ہم اہم سنگر مسنے۔ سندھ ئنا الس ءِ ریاستی بیدادی تا وسیلہ ئٹ چھپ کرفنگ مفک و بیدادی تا برخلاف بلوچ آتا وڑ سندھ ئٹ سسئی و سورٹھ لوہار نا سروکی ٹی سیاسی بش تس بش مسنے۔
پوسکنا وخت ئٹ جنز آتے بیدادی نا زور آ ایسر کننگ مننگ کپک، بلوچستان ئٹ بندغ آتے چھپ کرفنگ کن جتاء چم آک آزموندہ کننگار ولے اینو برطانیہ نا پارلیمان ئٹ بلوچ آتیا ریاستی بیدادی نا برخلاف توار ارفنگسہ ءِ۔ سیاسی جنز آتے طاغت نا زور آ توننگ نا پالیسی تا برخلاف مخلوق سیاسی مزاحمت نا کسر ءِ دوئی کرو و ریاستی بیدادی نا پالیسیک سندھ ئٹ اندا وڑ برجاء مسر گڑا زوت سندھیک ہم السی مزاحمت نا کسر ءِ ہلور۔